قر پارلامەنتى سەناتىنىڭ دەپۋتاتى اقىلبەك كۇرىشباەۆ «پريگورودنىي» شاعىن اۋدانىنىڭ تۇرعىندارىمەن, سونداي-اق نۇر-سۇلتان قالاسىنداعى پاتەر يەلەرى كووپەراتيۆتەرىنىڭ وكىلدەرىمەن كەزدەستى. سەناتوردىڭ ايتۋىنشا, ەلوردادا ءالى دە جەدەل شەشۋدى تالاپ ەتەتىن بىرقاتار پروبلەمالار بار. ول قالا ىشىندەگى ساياجايلار ون مىڭنان استام ادام تۇراتىن ەلدى مەكەنگە اينالعانىن اتاپ ءوتتى.
«بۇل ساياجاي الاپتارى ەلوردانى دامىتۋدىڭ باس جوسپارى بويىنشا بۇزىلۋعا جاتادى, تيىسىنشە, جەر تەلىمدەرىن ينۆەستور نەمەسە مەملەكەت نارىقتىق باعامەن ساتىپ الۋى ءتيىس. بىراق ازىرگە مۇنداعى بار ادامدار كۇتۋمەن ءومىر ءسۇرىپ وتىر» , - دەدى سەناتور.
اقىلبەك كۇرىشباەۆ ەلوردا مەن قالالىق ءماسليحات دەپۋتاتتارىن جانە قالالىق كوممۋنالدىق قىزمەت جەتەكشىلەرىن حالىقپەن كەزدەسۋگە ارنايى شاقىردى. مۇنداي ءتاسىل وسىنداعى پروبلەمالار تۋرالى ايتۋعا جانە ولاردى جان-جاقتى تالقىلاۋمەن قاتار سول جەردە اكىمدىك الدىندا ايتىپ, شەشۋ جونىندەگى جوسپار جاساۋعا مۇمكىندىك بەرەدى.
«مۇندا «اسى-سۋى مول» ورىنداردى جەكەشەلەندىرىپ الىپ, مەملەكەت پەن حالىق اراسىندا دەلدال بولعان جەرگىلىكتى وليگارحتار بار. اكىمدىك ولاردى سوتقا بەرىپ, زاڭعا ساي كەلگەن نارسەنى مەملەكەتكە قايتارۋعا تىرىسادى», دەدى ول. اقىلبەك كۇرىشباەۆ قوسىمشا قارجىلاندىرۋدى تالاپ ەتەتىن ماسەلەلەر قالالىق بيۋدجەت تۇزەتىلگەننەن كەيىن قارالاتىنىن اتاپ ءوتتى.
