باقىلاۋ – باعالاۋدىڭ باستى تەتىگى

كەشە قازاقستان رەسپۋبليكاسى پرەزيدەنتى اكىمشىلىگى باسشىسىنىڭ ورىنباسارى باۋىرجان بايبەكتىڭ توراعالىعىمەن سەمينار-كەڭەس بولىپ ءوتتى. وعان پرەزيدەنت اكىمشىلىگىنىڭ جانە پرەمەر-مينيستر كەڭسەسىنىڭ جاۋاپتى قىزمەتكەرلەرى, مەملەكەتتىك ورگاندار باسشىلارى, بىرقاتار مينيسترلىكتەردىڭ جاۋاپتى حاتشىلارى, وبلىس, استانا مەن الماتى قالالارى,  اكىمدىكتەرىنىڭ باقىلاۋىنداعى تاپسىرمالارعا جاۋاپتى اپپارات باسشىلارى مەن ءبولىم مەڭگەرۋشىلەرى قاتىستى. كەڭەستىڭ باستى تاقىرىبى سترا­تەگيالىق جوسپارلاۋ, مەملەكەتتىك ورگاندار قىزمەتىنىڭ تيىمدىلىگىن باعالاۋ, مەملەكەت باسشىسىنىڭ اكتىلەرى مەن تاپسىرمالارىنىڭ ورىن­دالۋىن قالىپتاستىرۋ جانە باقىلاۋ تۋرالى قازاقستان رەسپۋب­لي­كاسىنىڭ پرەزيدەنتى جارلىق­تا­رىن ىسكە اسىرۋ شارالارىنا ار­نال­دى. مەملەكەت باسشىسى قازاقستان حالقىنا ارناعان بيىلعى جول­داۋ­ىندا ەلىمىزدىڭ 2020 جىلعا دەيىنگى ستراتەگيالىق دامۋ جوسپارىنىڭ نەگىزگى باعىتتارىن ايقىنداپ بەر­گەنى بەلگىلى. ب.بايبەك وسى رەتتە مەم­لەكەتتىك ورگاندارعا بارشا قا­زاقستاندىقتاردىڭ ءومىر ءسۇرۋ دەڭگەيىن ارتتىرۋ مىندەتى جۇكتەل­گە­نىن ەرەكشە اتاپ ءوتتى. سوڭعى ۋا­قىت­تارى مەملەكەت باسشىسى اتالعان ماسەلەلەرگە وراي, ياعني ستراتەگيا­لىق جوسپارلاۋعا, پرەزيدەنت اكتى­لە­رى مەن تاپسىرمالارىنىڭ ورىن­دا­لۋىن باقىلاۋعا جانە مەملە­كەت­تىك ورگاندار جۇمىسىنىڭ ءتيىمدى­لىگىن باعالاۋعا قاتىستى بىرقاتار جارلىقتار جاريالادى. سونداي-اق, ەلباسى وبلىس, وبلىستىق ماڭىزى بار قالا, اۋدان اكىمدەرىنىڭ رەي­تين­گىن وتكىزۋدى تاپسىرعان-دى. مۇنىڭ بارلىعى مەملەكەتتىك اپپارات جۇمىسىنىڭ تيىمدىلىگىن ارتتىرۋعا باعىتتالىپ وتىر. ەلىمىز 2030 ستراتەگيالىق جوس­پارىنىڭ ونجىلدىق بەلەسىن ارتقا تاستاپ, وتكەن جىلى داعدارىستان ايتارلىقتاي تيىمدىلىكپەن شىعا ءبىلدى. قازىر داعدارىستان كەيىنگى دامۋ كەزەڭى باستالدى. جەدەلدە­تىل­گەن دامۋ باعدارلاماسى بەكىتىلىپ, جۇمىس ىستەۋدە. الايدا, اتالعان باعدارلامانى جۇزەگە اسىرۋ ءۇشىن مەملەكەتتىك اپپاراتتىڭ ءتيىمدى دە كۇش بىرىكتىرگەن ارەكەتى قاجەت. ول ءۇشىن مەملەكەتتىك جوسپارلاۋدىڭ ءبىرتۇتاس جۇيەسىن كۇشەيتۋ مىندەتى تۇر. مۇنداي جۇيە بۇرىنعى كەڭەس­تىك داۋىردە بولعانى بەلگىلى. اسىرەسە, جوسپارلاۋدى وڭىرلەردە كۇشەيتۋ باستى ماقساتقا اينالىپ وتىر. ور­تالىقتا قابىلدانعان شەشىمدەردىڭ جەرگىلىكتى جەرلەردە جۇزەگە اسۋى ما­ڭىزدى. العا قويىلعان مىندەتتەردىڭ جەرگىلىكتى جەرلەردە بەلسەندى شەشى­لۋىنەن ونىڭ تيىمدىلىگى ايقىن كو­رىن­بەك. بۇل ورايدا جۇمىستىڭ ءنا­تي­جەلىلىگى باعالاۋ ارقىلى انىقتا­لا­تىن بولادى. باعالاۋدىڭ التى ءتۇرى انىقتالسا, ۇستىمىزدەگى جىلى اقمو­لا وبلىسىندا, ەڭبەك جانە حا­لىق­تى الەۋمەتتىك قورعاۋ مي­نيسترلىگى مەن تابيعي مونوپوليا­لاردى رەت­تەۋ اگەنتتىگىندە 3 قانات­قاقتى با­عالاۋ ەنگىزىلمەك. كەلەسى جىلى بار­لىق مەملەكەتتىك ورگان­دار وسىنداي باعالاۋعا الىن­باق­شى. مۇنداي ءتاسىل مەملەكەتتىك ورگاندار جۇمى­سى­نىڭ تيىمدىلىگىن ارتتىرۋى ءتيىس. سونىمەن قاتار, باعالاۋ سارالاۋ تەتىكتەرىن بەرىپ, قانداي باعدارلا­مالار مەن مىندەتتەردىڭ قالاي ورىن­دالىپ جاتقانىنان حاباردار ەتەدى دەپ كۇتىلۋدە. قازىرگى كەزدە كوپ­تەگەن اكتىلەر مەن تاپسىر­ما­لارعا رەۆيزيا جۇرگىزىلىپ, ۇستىمىزدەگى جىلدىڭ 1 شىلدەسىنەن باستاپ پرە­زيدەنت تاپسىرمالارىنىڭ ورىن­دا­لۋى­نا تەك ساياسي مەملەكەتتىك قىز­مەتكەرلەر جاۋاپتى بولادى دەپ بەل­گىلەنگەن. مۇنداي تاپسىرمالاردىڭ ۇزىن سانى 400-دەن اسادى ەكەن. ولاردىڭ دەنى حالىقتىڭ تۇرمىس جاعدايىن جاقسارتۋعا باعىتتالعان. تۇپتەپ كەلگەندە, مەملەكەتتىك ورگاندار جۇمىسىن جۇيەلى باعالاۋ باقىلاۋدىڭ ماڭىزدى بولىگى بولىپ تابىلادى. بۇل جۇمىستى پرەزيدەنت اكىمشىلىگى مەن پرەمەر-مينيستر كەڭسەسىنىڭ وكىلدەرىنەن قۇرالعان ساراپشىلار كوميسسياسى ۇيلەستىرىپ وتىرادى. سونداي-اق, مەملەكەتتىك ورگاندار جۇمىسىن باعالاۋعا ۇكى­مەت­تىك ەمەس ۇيىمدار, تاۋەلسىز سا­راپ­شىلار قاتىسسا, ناتيجەسى مەم­لەكەت باسشىسىنىڭ الدىنا ۇسىنى­لىپ,  باق-تاردا جاريالاۋ دا قاراستىرىلعان. اسقار تۇراپباي ۇلى.