پرەزيدەنت جولداۋى اياقتالىسىمەن كابينەتكە كەلىپ, كومپيۋتەردى قوسىپ قالسام ق.ك. توقاەۆتىڭ جاڭا قازاقستاندى قۇرۋ جولىنداعى باتىل رەفورمالارىن الەمدىك الەۋمەتتىك جەلى جەر-جاھانعا تاراتىپ ۇلگەرىپتى.
قاشاندا ابجىلدىگىمەن ەرەكشەلەنەتىن رەسەيلىك ربك پورتالى جولداۋ باستالعانىنا نەبارى 39 مينۋت وتكەندە «توقاەۆ «سۋپەرپرەزيدەنتتىك» بيلىك جۇيەسىنەن كەتۋدى ۇسىندى» دەگەن تاقىرىپپەن مەملەكەت باسشىسىنىڭ ساياسي باستامالارىنا قولداۋ ءبىلدىرىپتى.
ءيا, تاۋەلسىزدىك العانىنا 30 جىل وتكەن قازاقستان كەڭ كولەمدەگى ساياسي رەفورمالار جۇرگىزۋگە ابدەن دايىن. جولداۋدا حالىق ءوزى كوپتەن كۇتكەن وسىنداي وڭ وزگەرىستەردى ەستىدى.
اتاپ ايتار بولساق, پرەزيدەنتتىك قىزمەتتى اتقارۋ كەزىندە مەملەكەت باسشىسىنىڭ ەشبىر پارتياعا مۇشە بولماۋى, ونىڭ جاقىن تۋىستارىنا ساياسي قىزمەتكە جانە مەملەكەتتىڭ ۇلەسى بار ۇلتتىق كومپانيالاردا قىزمەت اتقارۋعا تىيىم سالىنۋى, بارلىق اكىمدەرگە پارتيا فيليالدارىن باسقارۋعا رۇقسات بەرىلمەۋى, پارتيالاردى تىركەۋ ءۇشىن جينالاتىن قولدىڭ 20 مىڭنان 5 مىڭعا دەيىن ازايۋى, باسقا دا بەرەكە-بىرلىككە باستايتىن باتىل قادامدار ەلىمىزدەگى كەڭ كولەمدەگى دەموكراتيالىق ۇردىستەرگە جول اشاتىنى انىق.
قازاقستان حالقى اسسامبلەياسىنان ماجىلىسكە دەپۋتات سايلاۋدىڭ كونستيتۋتسيامىز بەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا قايشىلىعى تۋرالى اڭگىمە دە قوعامدا كوپتەن كوتەرىلىپ جۇرگەن ماسەلە ەدى. ەندى بۇل دا ۇلتتىق زاڭناما شەڭبەرىندە ءوز ورنىن تاپتى.
جولداۋداعى ءماجىلىس دەپۋتاتتارىن پروپورتسيونالدى جانە ماجوريتارلى نەگىزدە سايلاۋ, بارلىق دەڭگەيدەگى ءماسليحاتتاردىڭ ءرولىن كۇشەيتۋ مەن ولاردىڭ دەپۋتاتتارىن دا ارالاس نەگىزدە سايلاۋ, وبلىس جانە رەسپۋبليكالىق ماڭىزداعى قالا اكىمدەرىن بالامالىق نەگىزدە تاعايىنداۋ سياقتى وزگەرىستەر جاڭا قازاقستاندى العا جەتەلەيتىن جاڭا كادرلاردىڭ شىعۋىنا جارقىن جول اشادى.
سەنات تۋرالى قابىلدانعان شەشىمدەر دە قوعامدا ءجيى قوزعالاتىن ماسەلەلەردىڭ ءبىرى بولاتىن. ەندى وعان دا ءبىرجولاتا نۇكتە قويىلدى.
بارشا حالىق اباي, ۇلىتاۋ جانە جەتىسۋ وبلىستارىنىڭ قۇرىلۋى تۋرالى شەشىمدى «اق تۇيەنىڭ قارنى جارىلعان» ەڭ اقجارما جاڭالىق رەتىندە قابىلدايتىنى انىق. بۇگىندە الماتى وبلىسىندا 2,1 ميلليون, ال شىعىس قازاقستان مەن قاراعاندى وبلىستارىنىڭ ارقايسىسىندا 1,3 ميلليوننان استام حالىق ءومىر سۇرەدى.
قازىرگى تاڭدا سولتۇستىك قازاقستان وبلىسىندا 500 مىڭنان, اتىراۋ مەن باتىس قازاقستاندا 600 مىڭنان, ال پاۆلودار, ماڭعىستاۋ جانە اقمولا وبلىستارىندا 700 مىڭنان استام ادام ءومىر سۇرەدى. سوندىقتان جاڭادان اشىلعان ءۇش وبلىس حالقى ەكونوميكالىق, دەموگرافيالىق الەۋەتى جونىنەن وزگە وبلىستارمەن تەز ارادا تەڭەلىپ, ەلىمىزدىڭ ءوسىپ-وركەندەۋى مەن گۇلدەنۋىنە زور ۇلەسىن قوساتىن بولادى.
قازىرگى قازاقستانداعى ەڭ باستى پروبلەمالاردىڭ ءبىرى – جۇمىسسىزدىق ماسەلەسى. جاڭادان اشىلاتىن ءۇش وبلىستا الداعى ۋاقىتتا جۇمىس ورىندارى پايدا بولىپ, وبلىس ورتالىعى مارتەبەسىنە يە بولعان ءۇش قالا وسى زامانعا ساي قايتا تۇلەيدى. بۇل «وشكەنى جانىپ, ولگەنى تىرىلگەندەي» بولعان سول ءوڭىر حالقىنىڭ زور پاتريوتتىق ورلەۋىن تۋعىزاتىنىنا نىق سەنەمىن.
سەمەيلىك ازامات رەتىندە اباي وبلىسىنىڭ قۇرىلۋىنا جۇرەگىم جارىلا قۋاندىم. بۇل – قازاقتىڭ ۇلى ۇستازى حاكىم ابايعا دەگەن, ۇلىقبەك اقىن ايتقانداي «قاسىرەتتەن كوز اشپاعان» سەمەي وڭىرىنە دەگەن زور قۇرمەتتەن تۋعان شەشىم. بۇل – ناعىز ادىلدىكتىڭ سالتاناتى.
مۇحتار قۇل-مۇحاممەد,
قازاقستان رەسپۋبليكاسى
پارلامەنتى سەناتى
حالىقارالىق قاتىناستار, قورعانىس جانە قاۋىپسىزدىك كوميتەتىنىڭ توراعاسى
