الەمنىڭ ۇزدىك ساحنالارىندا 30 جىلدان اسا ۋاقىت قويىلىپ جۇرگەن بۇل تۋىندى – بالەتمەيستەردىڭ «قارا جانە اق» اتتى بالەتىنىڭ ءبىر ءبولىمى. ونى ەلوردالىق تەاتردا دارىندى حورەوگراف ستەفان جەرومسكي ساحنالايدى. اكادەميالىق بالەتتەن بولەك, وزگەشە ءستيلىن قالىپتاستىرعان تانىمال چەح حورەوگرافىنىڭ قويىلىمى استانالىق تەاتردا العاش رەت ۇسىنىلىپ وتىر.
− يرجي كيلياننىڭ شىعارماشىلىعىمەن تانىستىعىم ناق وسى تۋىندىدان باستالىپ ەدى. بۇل بالەتتى العاش كورگەنىمدە توبەم كوككە جەتكەندەي ەرەكشە كۇي كەشتىم. وسى تەكتەس دۇنيە جاساۋعا بولادى-اۋ دەگەن, ءۇش ۇيىقتاسام تۇسىمە كىرمەپتى. ونىڭ بالەتىندە بيلەۋ − ءار ءبيشىنىڭ ارمانى. كوپ ۇزاماي قازاقستاندىق كورەرمەننىڭ تەاترىمىزدىڭ دارىندى ارتىستەرىنىڭ ورىنداۋىندا وسى سپەكتاكلدى تاماشالاي الاتىنى, شىنىمدى ايتسام, مەنى قۋانتادى, − دەيدى «استانا بالەت» تەاترىنىڭ كوركەمدىك جەتەكشىسى نۇرلان كانەتوۆ.
يرجي كيليان حورەوگرافياسى مەن ستيۆەن رايحتىڭ ايرىقشا كومپوزيتسياسىنىڭ اسەم ۇندەستىگىنەن سەگىز بالەرينانىڭ عاجايىپ ءبيى پايدا بولعان. ال حورەوگرافتىڭ ءوزى: «بۇل − ءبىزدىڭ ماماندىق تۋرالى بالەت» دەيدى. ءبىر ايتارلىعى, بۇل تۋىندى − عاجايىپ مۋزىكالىق اۋەزدىگىمەن, مونوحرومدىق ەستەتيكاسىمەن جانە ءبيدىڭ الەمدىك دەڭگەيىمەن ەرەكشەلەنەدى. كيلياننىڭ بالەتى – سان ءتۇرلى سەزىمدەردىڭ بۇلقىنىسى ىسپەتتى: سەزىمتال ءارى تاماشا بي پلاستيكاسى ءون بويىڭىزدى باۋراپ اكەتەدى.
كەشتىڭ ەكىنشى بولىمىندە كورەرمەنگە بەكزات ونەر ورداسىنىڭ بىلتىرعى ەرەكشە پرەمەراسى – «تاعدىر بۇلتارىستارى» تارتۋ ەتىلەدى. بالەتتىڭ مۋزىكاسى مەن ليبرەتتوسىن تانىمال ءانشى, قازاقستاننىڭ ەڭبەك سىڭىرگەن قايراتكەرى كارينا ابدۋللينا جازعان. حورەوگراف – قازاقستاننىڭ ەڭبەك سىڭىرگەن قايراتكەرى, «استانا بالەت» تەاترىنىڭ باس بالەتمەيستەرى مۋكارام اۆاحري.
ايتا كەتەيىك, مادەني ءىس-شارا مادەنيەت جانە سپورت مينيسترلىگىنىڭ قولداۋىمەن وتەدى.
