جوعارى تەحنولوگيانى قولدانۋ ارقىلى بولاتىن قىمبات وپەراتسيالار ءمامس-ءتىڭ كومەگىمەن 23 رەت جاسالعان, سونىڭ 16-سى – جۇرەككە جاسالعان كارديوحيرۋرگيالىق وتالار. ال مۇنداي وتالاردى حالىق ءوز قالتاسىنان جاساتسا, ورتا ەسەپپەن 3,6 ملن تەڭگە تولەگەن بولار ەدى.
2021 جىلى ءبىزدىڭ وبلىسقا ءمامس اياسىندا «اڭساعان ءسابي» ارنايى باعدارلاماسى بويىنشا 217 كۆوتا بولىنگەن. باعدارلاما بويىنشا 213 ايەل وڭ ناتيجەمەن وتكەن. بۇل باعدارلاما جۇمىسىنىڭ تيىمدىلىگىن كورسەتەدى. 2022 جىلعا 203 كۆوتا ءبولىندى.
جۋىردا بريفينگ وتكىزگەن «الەۋمەتتىك مەديتسينالىق ساقتاندىرۋ قورى» سولتۇستىك قازاقستان وبلىستىق فيليالىنىڭ ديرەكتورى لاريسا گوردەەۆا مەن وسى فيليالدىڭ ءبولىم باسشىسى قارلىعاش ءىلياسوۆا «اڭساعان ءسابي» باعدارلاماسىنا ەرلى-زايىپتىلاردىڭ قاتىسۋ جولدارىنىڭ ءتارتىبىن دە تاپتىشتەپ بايانداپ بەردى. بۇگىنگى تاڭدا قازاقستاندا رەپرودۋكتيۆتىك مەديتسينانىڭ 24 ورتالىعى بار ەكەن.
قازىر سولتۇستىك قازاقستان وبلىسىندا 600 مىڭعا جۋىق تۇرعىن بولسا, سونىڭ 78 پايىزى, ياعني 440 مىڭداي ادام ءمامس-پەن قامتىلعان. بۇل سانداردىڭ ىشىندە قورعا جارنا تولەۋدەن بوساتىلعان جەڭىلدىك كاتەگورياسىنداعى 280 مىڭداي ادام دا كىرىپ وتىر. ولار ءۇشىن جارنانى مەملەكەت تولەيدى.
الايدا 2021 جىلى ەڭبەككە جارامدى ادامداردىڭ 86 مىڭى قورعا جارنا تولەمەگەن. جاسالعان ساراپقا قاراعاندا, مۇندايلار 30 بەن 40 جاس اراسىنداعى بارلىق جارنا تولەمەگەن ازاماتتىڭ 32 پايىزىن قامتيدى. ال 41 مەن 50 جاس ارالىعىنداعىلار – 25 پايىزداي.
سپيكەرلەردىڭ ايتۋىنشا, قورعا تۇسەتىن بارلىق قارجى جيناقتالۋدى ماقسات ەتپەيدى, ول پاتسيەنتكە جەدەل كومەكتەسۋ ءۇشىن جۇمسالادى. سونىمەن قاتار پاتسيەنتتىڭ ءوزى تىركەلگەن ەمحانادا جالپى, تاجىريبەلىك دارىگەردى تاڭداۋىنا قاتىسى بار ەكەنى ايتىلدى. وسى قور ارقىلى ەمدەۋگە رەسپۋبليكا بويىنشا 4 مىڭداي جەكەمەنشىك ەمحانالار دا قاتىسادى. سونىڭ 16-سى سولتۇستىك قازاقستاننىڭ اۋماعىندا ورنالاسقان. اتاپ ايتقاندا, پەتروپاۆل قالاسىندا «اينا-كوز» كوز ەمدەۋ ورتالىعى», «فورمۋلا زدوروۆيا» جشس, «نەفروس-سك» جشس, ء«ۇمىت سولتۇستىك» جشس, «پاناتسەيا» وتباسىلىق مەديتسينا ورتالىعى» جشس جانە ت.ب. حالىق اراسىندا بۇلاردىڭ ەمىنە ايتىلعان ريزاشىلىقتاردى ءجيى ەستيمىز.
ارينە, مۇنداي قورلاردىڭ بولعانى, حالىقتى ەمدەۋگە قىزمەت ەتكەنى جاقسى عوي, بىراق سوندايلار اقشا العانىمەن, ءاربىر پاتسيەنتتىڭ قۇقىن قورعاپ, ەمدەلۋىنە مۇمكىندىك تۋدىرا ما دەگەن سۇراقتار قويىلعان ەدى. بۇل رەتتە ءاربىر ەم ورىندارىندا پاتسيەنتتى قولداۋ جانە ىشكى ساراپتاما قىزمەتى بار ەكەنى ايتىلدى.
«بۇل قىزمەت مەديتسينالىق قىزمەت كورسەتۋ تولىعىمەن ستاندارتقا ساي بولۋىن باقىلايدى. ەگەر پاتسيەنتتىڭ ەمحاناعا شاعىمى بولسا وسى قىزمەتكە قايىرىلۋى كەرەك. ال ەگەر بۇل قىزمەت ماسەلەنى شەشە الماسا, ءمامس قورىنىڭ وزىنە fms.kz سايتى ارقىلى (Call ورتالىعى 1406) شاعىم جاساي الاسىز», دەدى ل.گوردەەۆا.
پەتروپاۆل
