روبوت تەحنيكاسى دەگەنىمىز – زياتكەرلىك اۆتوماتتاندىرىلعان تەحنيكالىق جۇيەلەردى ازىرلەۋ جانە پايدالانۋمەن اينالىساتىن قولدانبالى عىلىم. جالپى, بۇل باعدارلامانىڭ وزەكتىلىگى ءبىلىم بەرۋ جۇيەسىندە جاراتىلىستانۋ عىلىمي باعىتىندا وقۋشىلارمەن جۇمىس ىستەۋ جانە وقۋشىلاردىڭ وي-ءورىسىن دامىتا وتىرىپ, ينجەنەرلىك ويلاۋ نەگىزدەرىنىڭ العىشارتتارىن قالىپتاستىرۋ دەپ ويلايمىن.
2030 جىلعا قاراي ادام ساناسىمەن تەپە-تەڭ نانوروبوتتار شىعارىلادى دەگەن جاڭالىق بار. بۇدان جاساندى ينتەللەكتتىڭ بولۋ مۇمكىندىگى جوعارى ەكەنىن كورىپ وتىرمىز. سەبەبى روبوتتارعا كەز كەلگەن ماسەلەنى تالداۋ جانە شەشىم قابىلداۋ قابىلەتى قاجەت. زامان اعىمىنان قالىپ قويماي روبوتتەحنيكانى ءوزىمىز دە ۇيرەنىپ, سونىمەن بىرگە وقۋشىلارىمىزعا دا ۇيرەتۋگە دە كىرىسىپ كەتتىك.
اقمولا وبلىسى تسەلينوگراد اۋدانى قوياندى اۋىلىنىڭ №2 جالپى ورتا ءبىلىم بەرەتىن مەكتەبىنىڭ ينفورماتيكا ءپانى مۇعالىمدەرى اتىنان وقۋشىلارىمىزعا روبوتتەحنيكاسىنىڭ بازالىق جيىنتىعىن سىيلادىق. وسىنداي جابدىقتامالار كوبەيىپ, وقۋشىلارىمىزدىڭ مۇمكىندىكتەرى ارتا بەرسە نۇر ۇستىنە نۇر بولار ەدى.
مەن «روبوت تەحنيكاسى» بويىنشا كۋرستى 2019 جىلى ساۋىردە نۇر-سۇلتان قالاسىندا وقىدىم. 2020 جىلى قازاننان باستاپ وقۋشىلارعا بەينەروليكتەردى پايدالانىپ, تەوريانى ۇيرەتە باستادىم. سەبەبى روبوتتىڭ ءوزى بولمادى. وقۋشىلار بۇل ساباققا ىنتالى بولىپ, وزدەرى ىزدەنىپ, ينتەرنەتتەن روبوتتىڭ تۇرلەرىمەن, ونىڭ قولدانىلۋ سالالارى تۋرالى مالىمەتتەرمەن تانىسىپ, ءبىر-بىرىمەن ءبولىسىپ وتىردى. جوسپارداعى روبوتتاردى جاساپ ۇيرەندى. ونى قۇراستىرۋ ونشا قيىن ەمەس, ونىڭ باعدارلاماسىن جازىپ, قۇراستىرعان روبوتتى قوزعالىسقا كەلتىرۋ ءسال قيىن بولاتىنىن كورىپ ءبىلدى. توپتاعى وقۋشىلاردىڭ ءبىرى قۇراستىراتىن روبوت ءتۇرىن ويلاستىرىپ, وعان قانداي بولشەكتەردىڭ كەرەك ەكەنىن انىقتاپ كەلسە, باسقالارى سول بولشەكتەردى قولدانۋعا ىڭعايلى ەتىپ باسقا بولشەكتەردەن ايىرىپ جيناپ بەرەدى, ەندى بىرەۋلەرى ۇلگى بويىنشا قۇراستىرۋعا كومەكتەسەدى.
روبوتتەحنيكا باعىتىنىڭ دامۋ بولاشاعى زور. روبوتتەحنيكا نەگىزدەرىن وقىپ-ۇيرەنۋدە بىرقاتار جالپى ءبىلىم بەرەتىن پاندەردەن بىلىمدەرىن پايدالانۋ قاجەت. روبوتتەحنيكا وقۋشىلاردىڭ سىن تۇرعىسىنان ويلاۋىن دامىتۋعا جانە پراكتيكالىق تاپسىرمالاردى شەشە بىلۋگە ىقپال ەتەدى. سونىمەن قاتار بۇل جاستاردى عىلىم, تەحنولوگيا, ماتەماتيكا ارقىلى جاڭاشىلدىققا شابىتتاندىراتىن, بۇگىنگى كۇننىڭ ماسەلەلەرىن شەشۋ ءۇشىن ءوز داعدىلارىن قولدانۋعا, جاعدايدى تالداۋعا, شىعارماشىلىقپەن ويلاۋعا مۇمكىندىك بەرەتىن وتە تارتىمدى ءبىلىم ورتاسى.
روبوتتەحنيكا ساباعى فيزيكا, ماتەماتيكا, ينفورماتيكا پاندەرىنەن الىنعان ءبىلىمدى قاجەت ەتەدى. بۇعان قوسا ءتىل بايلىعى دا كەرەك. سەبەبى روبوتتان جارىسقا قاتىسقان وقۋشى ءوز جوباسىن قورعاپ, ءوز ويىن اشىق جەتكىزە ءبىلۋ كەرەك.
روبوت تەحنيكاسىن وقىتۋ بالالاردىڭ قورشاعان ورتامەن تىعىز قارىم-قاتىناس جاساي وتىرىپ, شىنايى ءومىر پروبلەمالارىمەن شۇعىلدانا الاتىن وقۋ ورتاسىن قالىپتاستىرادى. بۇل ورايدا «روبوت تەحنيكاسى» ەلەكتيۆتى كۋرسى بالالار ءۇشىن قۇراستىرۋشىلىق وقۋ تاجىريبەسىن مەڭگەرۋدىڭ تاپتىرماس قۇرالى بولا الادى.
راحاتگۇل بوكەي,
قوياندى اۋىلىنىڭ №2 جالپى ورتا ءبىلىم بەرەتىن مەكتەبىنىڭ ينفورماتيكا ءپانى مۇعالىمى,
تەحنيكا عىلىمدارى ماگيسترى
اقمولا وبلىسى
