«قىلمىستىق ءىس «قازاقتەلەكوم» اق-نىڭ قاراجاتىن جىمقىرۋ فاكتىسى بويىنشا تەرگەلىپ جاتىر. كەشە وسى بويىنشا ءتيىستى اقپارات تاراتىلدى. قازىرگى كەزدە قاراجات سوماسى انىقتالىپ جاتىر, ول بويىنشا بىرنەشە ەپيزود قامتىلعان. وسى ورايدا ساراپتاما جۇرگىزىلگەننەن كەيىن, ءبىز بۇل سومانى جاريا ەتەمىز. دەگەنمەن وسى ىسكە قاتىستى ميللياردتاعان قاراجات بار دەپ ايتا الامىن», دەدى و. بەكتەنوۆ ءماجىلىستىڭ جالپى وتىرىسىنان كەيىن باق وكىلدەرىنىڭ ساۋالىنا جاۋاپ بەرە وتىرىپ.
سونىمەن قاتار ول ق. ساتىبالدى اۋەجاي اۋماعىندا ۇستالعانىن ايتتى. «ول الماتى اۋەجايىنىڭ اۋماعىندا ۇستالدى. ۇستالعاننان كەيىن ۋاقىتشا ۇستاۋ يزولياتورىنا قامالدى. تەرگەۋ امالدارى بارىسىندا قارايمىز, بۇلتارتپاۋ شاراسىن سوت ايقىندايدى», - دەدى اگەنتتىك باسشىسى.
بۇعان دەيىن سىبايلاس جەمقورلىققا قارسى قىزمەت «قازاقتەلەكوم» اق-قا قاتىستى لاۋازىمدىق وكىلەتتىكتى اسىرا پايدالانۋ جانە اسا ءىرى مولشەردە قارجى جىمقىرۋ دەرەگى بويىنشا قىلمىستىق ءىستى تەرگەپ جاتقانى بەلگىلى بولدى. قىلمىس جاسادى دەگەن كۇدىكپەن قايرات ساتىبالدى ۇلى ۇستالىپ, ۋاقىتشا ۇستاۋ يزولياتورىنا قامالدى.
