جۇلدىزى جانعاندار – بولاشاق ساردارلار

جۋىردا ءبىلىم جانە عىلىم مينيس­ترلىگىنىڭ «دارىن» رەسپۋبليكالىق عىلىمي-پراكتيكالىق ورتالىعى قورعانىس مينيسترلىگىنىڭ اسكەري ءبىلىم جانە عىلىم دەپارتامەنتىمەن بىرلەسىپ 11 سىنىپ وقۋشىلارىنىڭ اراسىندا تۇڭعىش رەت «ساردار» رەسپۋبليكالىق كەشەندى وليمپياداسىن وتكىزدى. وليمپيادا ەلورداداعى گەنەرال س.نۇرماعانبەتوۆ اتىنداعى «جاس ۇلان» رەسپۋبليكالىق مەكتەبىنىڭ اياسىندا ۇيىمداستىرىلدى. بايقاۋ ەكى كەزەڭدە ءوتتى. العاشقى تەوريالىق ساتىدا وقۋشىلاردىڭ ءبىلىمى ماتەماتيكا, فيزيكا, ورىس ءتىلى, قازاق ءتىلى, العاشقى اسكەري دايىندىق جانە دەنەشىنىقتىرۋ پاندەرى بويىنشا تەستىلەنىپ, ساراپقا سالىندى. وسى سىناقتا جەڭىمپاز دەپ تانىلعان بالالار ەكىنشى كەزەڭگە ءوتتى. ەكىنشى تاجىريبەلىك ساتىدا بالالار نورماتيۆتەردى, اك-74 اۆتوماتىن ءىشىنارا بولشەكتەۋ جانە جيناقتاۋ پروتسەستەرىن ورىنداپ, 3000 مەترگە, 100 مەترگە جۇگىرىپ, تارتىلىپ وزدەرىنىڭ العاشقى اسكەري دايىندىق, دەنەشىنىقتىرۋ پاندەرى بويىنشا شاما-شارىقتارىن كورسەتتى. اتاپ وتەرلىگى, وليمپيادانىڭ «جاس ۇلان» مەكتەبىندە ۇيىمداستىرىلعان رەسپۋبليكالىق ەكىنشى قورىتىندى كەزەڭىنە ەلىمىزدىڭ بارلىق وڭىرلەرىنەن, الماتى جانە استانا قالالارىنان, رەسپۋبليكالىق اسكەري مەكتەپتەردەن ءبىرىنشى كەزەڭدە جەڭىمپاز اتانعان 62 وقۋشى مەن ولاردىڭ اسكەري دايىندىق پاندەرىنىڭ مۇعالىمدەرى قاتىستى. وليمپيادا اياسىندا مەملەكەتتىك باسقارۋ اكادەمياسىندا العاشقى اسكەري دايىندىق ءپانىنىڭ مۇعالىمدەرىنە «مەملەكەتتىك تىلدە ساپتىق دايىندىق ساباعىن وتكىزۋ ادىستەمەسى» اتتى ارنايى سەمينار وتكىزىلدى. سونىمەن قاتار, وليمپيادا قاتىسۋشىلارىنا تۇڭعىش پرەزيدەنت مۇراجايىنا, «استانا بايتەرەك» مونۋمەنتىنە, 68665-ءشى اسكەري بولىمىنە ساياحات ۇيىمداستىرىلىپ, «مەگا استانا» كينوتەاترىندا اسكەري فيلم كورسەتىلدى. «ساردار» رەسپۋبليكالىق كەشەن­دى وليمپياداسىنىڭ بارلىق قاتىسۋ­شىلارىنا سەرتيفيكاتتار مەن ەستەلىك سىيلىقتار بەرىلدى. وليمپيادانىڭ جابىلۋ راسىمىنە وقۋشىلاردى قۇتتىقتاپ ماراپاتتاۋ ءۇشىن ءماجىلىس دەپۋتاتتارى گەنەرال-لەيتەنانت ب.ەرتاەۆ, گەنەرال-لەيتەنانت ا.تاسبولاتوۆ, قازاقستان قارۋلى كۇشتەرىنىڭ ارداگەرى, گەنەرال-مايور گ.نوسونوۆسكي, قورعانىس ءمينيسترىنىڭ ورىنباسارى ب.ءابدىرايىم, ءبىلىم جانە عىلىم ۆيتسە-ءمينيسترى ە.يمانعاليەۆ جانە وسى وليمپيادانىڭ نەگىزگى دەمەۋشىسى «ۇلتتىق قازاقستان ينجينيرينگ كوم­پانيا­سى» باسقارما باستىعىنىڭ ورىنباسارى ق. تىلەبالدينوۆ قاتىستى. بايگە بەس كۇنگە سوزىلدى. وسى كۇندەر­دە قازىلار القاسىنىڭ شەشىمىمەن جەڭىمپازدار مەن جۇلدەگەرلەر, اتالىمدار بويىنشا ديپلومدار مەن گراموتالاردىڭ يەگەرلەرى انىقتالدى. سونىمەن, «ساردار» رەسپۋبليكالىق كەشەندى وليمپياداسىندا قازىلار القاسىنىڭ شەشىمىمەن «ارىستان» مامانداندىرىلعان ليتسەيىنىڭ وقۋشىسى نۇربەك رىسقوجاەۆ باس جۇلدەگە يە بولسا, «جاس ۇلان» رەسپۋبليكالىق مەكتەبىنەن ايبەك قۇرمانعاليەۆ, بەرنار ەرەجەپ, «ارىستان» مامانداندىرىلعان ليتسەيىنەن ايبەك كەرىمبەك ءبىرىنشى دارەجەلى ديپلومعا لايىق دەپ تابىلدى. وسكەمەن قالاسىنداعى «جاس ۇلان» مامانداندىرىلعان ەرلەر ليتسەي-ينتەرناتىنان نادىربەك نۇرلىبەكوۆ, «جاس ۇلان» رەسپۋبليكالىق مەكتەبىنەن ابىلاي بيقوجا, «ارىستان» مامانداندىرىلعان ليتسەيىنەن شىنبولات قايىربەكوۆ ەكىنشى دارەجەلى ديپلومدارمەن ماراپاتتالدى. ال, ءۇشىنشى دارەجەلى ديپلومدار ەلىمىزدىڭ ءار وڭىرىندەگى ءبىلىم وردالارىنان كەلگەن ۇلان سابىرقۇلوۆ, اسقار احمەتوۆ, جانبولات يگىباەۆ, ناۋرىزباي سەرىكباەۆ, اسقار بالتاشەۆ, تەلجان اسكەرجانوۆ سىندى مىقتى وقۋشىلارعا تابىستالسا, «ەڭ جۇيرىك» اتالىمىندا ءانۋار قۇرمانعاليەۆ, ولجاس ەدىك, «ەڭ كۇشتى» اتالىمىندا بەكتورە ءسمادىل, «ەڭ ءتوزىمدى» اتالىمى بويىنشا جاقسىلىق تاسبولات جەڭىسكە جەتتى. ايگۇل سەيىلوۆا, «ەگەمەن قازاقستان».