فوتو: Alejandra Leyva/AP Photo/picture alliance
ەل بويىنشا جاپپاي تارتىپسىزدىكتەر باستالدى
وسەگەرانىڭ قازا تابۋى مەكسيكانىڭ بىرنەشە وڭىرىندە جاپپاي تارتىپسىزدىكتەرگە ۇلاستى. كەمىندە بەس شتاتتا, سونىڭ ىشىندە حاليسكودا, كولىكتەر ورتەلىپ, جولدار ادەيى بوگەلگەن. بۇل جەرگىلىكتى ەسىرتكى كارتەلدەردىڭ بيلىككە قارسى ءجيى قولداناتىن تاكتيكاسى.
حاليسكو شتاتىنىڭ گۋبەرناتورى پابلو لەمۋس ناۆاررو قۇقىق قورعاۋ ورگاندارى مەن كارتەل مۇشەلەرى اراسىندا قاقتىعىستار بولعانىن راستادى. ونىڭ ايتۋىنشا, بەلگىسىز قارۋلى توپتار ارنايى وپەراتسياعا كەدەرگى جاساۋ ءۇشىن اۆتوكولىكتەردى ورتەپ, كوشەلەردى جاپقان.
شتاتتا توتەنشە جاعداي رەجيمى ەنگىزىلدى. كەيبىر اۋدانداردا قوعامدىق كولىك جۇمىسى توقتاتىلىپ, تۇرعىندارعا ۇيلەرىنەن شىقپاۋعا كەڭەس بەرىلدى. ءورت قويۋ وقيعالارىنىڭ ءبىر بولىگى شتات استاناسى –گۆادالاحارا قالاسىندا تىركەلگەن. ايتا كەتەيىك, بۇل قالادا الداعى ايلاردا فۋتبولدان الەم چەمپيوناتىنىڭ ويىندارى ءوتۋى ءتيىس ەدى.
اۋەجايلار جابىلدى, اقش ەسكەرتۋ جاسادى
پۋەرتو-ۆاليارتا حالىقارالىق اۋەجايى گۆادالاحارا حالىقارالىق اۋەجايلارى ۋاقىتشا رەيستەردى قابىلداۋدى توقتاتتى. الەۋمەتتىك جەلىلەردە جولاۋشىلاردىڭ اۋەجاي عيماراتتارىندا جاسىرىنۋعا ءماجبۇر بولعانى تۇسىرىلگەن بەينەجازبالار تارالعان.
اقش مەملەكەتتىك حاتشىسىنىڭ ورىنباسارى كريستوفەر لانداۋ «ەل مەنچونىڭ» قازاسىن «مەكسيكا, اقش, لاتىن امەريكاسى جانە بۇكىل الەم ءۇشىن ماڭىزدى وقيعا» دەپ اتادى.
تارتىپسىزدىكتەرگە بايلانىستى اقش-تىڭ مەكسيكاداعى ەلشىلىگى حاليسكو, تاماۋليپاس, ميچواكان, گەررەرو جانە نۋەۆو-لەون شتاتتارىندا جۇرگەن امەريكالىق ازاماتتارعا قاۋىپسىز جەرگە پانالاپ, سىرتقا شىقپاۋعا كەڭەس بەردى.
