فوتو: سۋ رەسۋرستارى جانە يرريگاتسيا مينيسترلىگى
بۇلاقتار كارتاسى جاسالدى
مەكەمە ماماندارى قور جانە ارحيۆ ماتەريالدارىن زەردەلەي وتىرىپ, ەل اۋماعىنداعى 2 772 بۇلاقتى قامتيتىن ارنايى كارتا ازىرلەدى. بۇلاقتار الداعى ۋاقىتتا اۋىزسۋ مەن شارۋاشىلىق قاجەتتىلىككە پايدالانۋعا بولاتىن قوسىمشا رەسۋرس بولماق.
جەراستى سۋ قورى مول
قازاقستاندا اۋىزسۋ, تەحنيكالىق سۋ, سۋارۋ جانە وزگە دە ماقساتتارعا ارنالعان جەراستى سۋىنىڭ 4 803 كەن ورنى بارلانعان. مەملەكەتتىك بالانس بويىنشا تاۋلىگىنە 43,2 ملن تەكشە مەتر پايدالانۋ قورى تىركەلگەن. الايدا سونىڭ شامامەن 1,5 ملن تەكشە مەترى عانا نەمەسە 3,6 %-ى پايدالانىلىپ وتىر.
سالالىق دەرەكتەرگە سايكەس:
-
شارۋاشىلىق-اۋىزسۋعا ارنالعان قور – تاۋلىگىنە 21,2 ملن تەكشە مەتر;
-
وندىرىستىك-تەحنيكالىق قاجەتتىلىككە – 2,4 ملن تەكشە مەتر;
-
سۋارۋ ماقساتىندا – 19,6 ملن تەكشە مەتر.
بۇل كورسەتكىشتەر جەراستى سۋىنىڭ الەۋەتى جوعارى ەكەنىن اڭعارتادى.
مونيتورينگ جانە تسيفرلاندىرۋ
«قازگيدروگەولوگيا» ۇلتتىق گيدروگەولوگيالىق قىزمەتىنىڭ باسقارما توراعاسى بولات بەكنياز سالاداعى باقىلاۋ تەتىكتەرى جۇيەلى جولعا قويىلعانىن ايتتى.
«قازاقستاندا جەراستى سۋىنا ارنالعان مەملەكەتتىك مونيتورينگ جەلىسى جۇمىس ىستەيدى. وعان 4 مىڭعا جۋىق باقىلاۋ ۇڭعىماسى كىرەدى. ولار سۋ دەڭگەيىن, تەمپەراتۋراسىن جانە ساپاسىن قاداعالاۋعا مۇمكىندىك بەرەدى. قازىر مونيتورينگتىك جانە پايدالانۋ ۇڭعىمالارىن سۋ رەسۋرستارىنىڭ ۇلتتىق اقپاراتتىق جۇيەسىنە ەنگىزۋ جۇمىستارى جۇرگىزىلىپ جاتىر», دەدى ول.
سالانى تسيفرلاندىرۋ جەراستى سۋ قورىن ءتيىمدى باسقارۋعا, دەرەكتەردىڭ اشىقتىعىن ارتتىرۋعا جانە عىلىمي نەگىزدەلگەن شەشىم قابىلداۋعا جول اشادى.
سۋ رەسۋرستارى جانە يرريگاتسيا ءمينيسترى: «كولەڭكەلى» نارىقپەن كۇرەستى كۇشەيتۋ ماڭىزدى
