جۋرناليستەردىڭ حالىقارالىق ءسامميتى

2014 جىلدىڭ 20-23 مامىرى ارا­لىعىندا قازاقستاندا تۇڭعىش رەت  حا­لىقارالىق «G-Global» جۋرناليس­تيكاسى ءسامميتى ۇيىمداستىرىلادى. ايتۋلى شارا VII استانا ەكونوميكالىق فورۋمى اياسىندا وتەدى. سامميت بارىسىندا الەمدىك داعدارىس جاعدايىنداعى جۋرناليستيكا ءرولى, مەديا سالاسىنداعى يننوۆاتسيالار مەن تەحنولوگيالار تالقىلانىپ, ەكونوميكالىق كورسەتكىشتەر مەن اقپاراتتى تاراتۋدىڭ جاڭا تاسىلدەرىندەگى ارەكەت ەتۋشى قۇرالدار جايلى تىلگە تيەك ەتىلەدى. بۇل شارانى ۇيىمداستىرۋشىلار – قازاقستان رەسپۋبليكاسى ۇكىمەتى, «G-Global» كوممۋنيكاتيۆتىك پلاتفورماسى, «عالىمداردىڭ ەۋرازيالىق ەكونوميكالىق كلۋبى» قاۋىم­داستىعى جانە «Success K» مەديا-اگەنتتىك وكىلدەرىنىڭ ايتۋىنشا, سامميتكە تانىمال مەديا-تۇلعالار, بلوگگەرلەر, حالىقارالىق مەديا-حولدينگتەر, تاجىريبەلى عىلىمي قايراتكەرلەر قاتىسادى. اشىق ۇنقاتىسۋ الاڭىندا ەكونوميكا مەن قارجى تاقىرىپتارىنا باعىتتالعان زاماناۋي جۋرناليستيكاداعى وزەكتى ماسەلەلەردى تالقىلاپ, ماڭىزدى ترەندتەر مەن داعدارىسقا قارسى اقپاراتتىق ساياسات اعىندارى جاي­لى پىكىرتالاستار وتكىزۋ جوسپار­لانۋدا. حالىقارالىق جۋرناليس­تي­كا ءسامميتىنىڭ ماڭىزدى شارا­لارىنىڭ ءبىرى الەمدىك جۋرنا­ليس­تيكاعا قوسقان ۇلەسى ءۇشىن «ەكونوميكالىق ماسەلەلەردى ناسي­حاتتاۋداعى جاڭا مەديا-تەحنولوگيالار مەن يننوۆاتسيالىق قۇرالدار» اتتى «G-Global» سىيلىعى بولادى. سىيلىقتى الۋعا شەتەلدىك جانە وتاندىق مەديا-حولدينگتەر, بىرلەستىكتەر, مەديا-تەحنولوگيا ازىرلەۋشىلەر, IT-كومپا­نيالار جانە تاۋەلسىز جۋرناليستەر وزدەرىن ۇسىنا الادى. بايقاۋ قورىتىندىسى بويىنشا جاڭا تەحنولوگيالار, قۇرالدار جانە باعدارلامالار ارقىلى ەكونوميكالىق اقپاراتتى ەرەكشە تاراتا بىلگەن, الەمدىك قو­عام­داستىقتاعى ەكونوميكالىق ماسەلەلەردى اۋديتوريا وڭاي قابىلداي الاتىنداي ەتىپ جەتكىزىپ, ولاردىڭ قىزىعۋشىلىعىن تۋدىرا الاتىن ەڭ ۇزدىك جۋرناليستىك جوبا انىقتالادى. جەڭىمپاز VII استانا ەكونوميكالىق فورۋمى اياسىندا وتكىزىلەتىن ماراپاتتاۋ كەشىندە 15 000 اقش دوللارىمەن ماراپاتتالادى. سونىمەن قاتار, جاھاندىق جۋرناليستيكا سالاسىندا اقپا­راتپەن الماسىپ, سوڭعى تەحنولوگيالاردى كورسەتۋ ءۇشىن سامميت اياسىندا حالىقارالىق «شەكسىز اقپارات» مەديا-كورمەسى (IMX) وتكىزىلەدى. كورمە تانىمال مەديا-حولدينگتەردىڭ, ازىرلەۋشىلەردىڭ, تاجىريبەلەرى بار, ءوز جەتىستىكتەرىن باق-قا كورسەتۋگە دايىن يندۋستريانىڭ عىلىمي قايراتكەرلەرىنىڭ, ەكونوميكا جۋرناليستيكاسىنداعى اقپاراتتىق بيزنەس پەن ءبىلىمدى قۇرۋعا ارنالعان داعدىلاردىڭ, مەديا قۇرالدار مەن تەحنولو­گيالاردىڭ كەزدەسەتىن ورنىنا اينالاتىنى ءسوزسىز. جىلقىباي جاعىپار ۇلى, «ەگەمەن قازاقستان».