سيان سينحاي – ايتۋلى قىتاي كومپوزيتورى, 250-دەن استام شىعارما اۆتورى. سونىڭ ىشىندە كانتاتا, وپەرا, سيمفونيا, وركەسترلىك مۋزىكاعا ارناپ جازعان تۋىندىلارى ۇلتتىق ورنەگىمەن ەرەكشەلەنەدى. تالانتتى مۋزىكانت 1940 جىلى ماسكەۋگە جىبەرىلگەن, سوندا «ۇلت ازاتتىعى» دەگەن ءبىرىنشى سيمفونياسىن اياقتاعان. 1941 جىلى الماتىعا كوشىپ كەلىپ, سول جىلدارى «قاسيەتتى سوعىس» اتتى ەكىنشى سيمفونياسىن جازادى. سونىمەن قاتار قازاقتىڭ بىرقاتار حالىق ءانىن جيناپ, قايتا وڭدەگەن. 1944 جىلى قوستانايدا تۇرىپ, وبلىستىق فيلارمونيانىڭ نەگىزىن قالاۋعا ۇلەسىن قوسادى. توبىل وڭىرىنە كەلۋىنە قازاق كومپوزيتورى باقىتجان بايقاداموۆ سەبەپكەر بولعان. حالىق باتىرى تۋرالى سيمفونيالىق شىعارماسى وسى جىلدارى ومىرگە كەلگەن.
وسىدان ەكى-ءۇش جىل بۇرىن قازاقستاندىق جانە قىتايلىق ونەر شەبەرلەرى باقىتجان بايقاداموۆ پەن سيان سينحاي اراسىنداعى دوستىق پەن ولاردىڭ شىعارماشىلىق ءومىرىن بەينەلەگەن «كومپوزيتور» اتتى كوركەم فيلم تۇسىرگەنى ەسىمىزدە.
بۇگىندە ەكى تۇلعانىڭ اراسىنداعى سىيلاستىق ۇرپاقتارىمەن دە ساباقتاسىپ وتىر. باقىتجان بايقاداموۆتىڭ جيەنى, قالامقاس ارىسلانقىزى (كومپوزيتوردىڭ اپاسى دانابيكە بايقاداموۆانىڭ قىزى) قوس مۋزىكانتتىڭ ءومىرى مەن شىعارماشىلىعى جايىندا كىتاپ جازىپ, ارحيۆتەن سيان سينحايدىڭ بىرقاتار تۋىندىسىن ىزدەپ تاپقان. سونىڭ ىشىندە «امانگەلدى» پوەماسى دا بار. وسى شىعارمانىڭ كوشىرمەسىن مۋزەيگە تاپسىرعان جۇپار تاتكەنوۆا دا باقىتجان اعامىزدىڭ جيەنى.
«بولە اپام قالامقاس ارىسلانقىزى ءوزى شىعارعان كىتاپ پەن سيمفونيالىق تۋىندىنىڭ نوتاسىن ارنايى ارقالىققا بەرىپ جىبەرگەن ەدى. اماناتىن ورىنداپ, مۋزەي قورىنا تاپسىردىم. سيان سينحاي مۋزىكا عانا جازباعان, قازاقتىڭ بي ونەرىن دە زەرتتەگەن. ناعاشىممەن جاقىن دوس بولعان. ەندى ولاردىڭ مۇراسىن قازىرگى جاس ۇرپاق تا بىلگەنى دۇرىس», دەيدى ول.
ارقالىقتاعى دالا ولكەسى تاريحى مۋزەيىنىڭ ديرەكتورى اسحات قاسەنوۆ ءبىر سوزىندە سيمفونيالىق شىعارمانىڭ كوشىرمەسىن ەلۋباي ومىرزاقوۆ اتىنداعى قوستاناي وبلىستىق فيلارمونياسى دا العانىن ايتادى. اتالعان ونەر ۇجىمى تۋىندىنى امانگەلدى باتىردىڭ 150 جىلدىعى قارساڭىندا قايتا جاڭعىرتۋدى ويلاپ وتىرعان كورىنەدى.
