ادام ارقاشان ەرتەڭىنەن جاقسىلىق كۇتەدى. قىزىقتىڭ ءبارى الدا سياقتى كورىنەدى. ەرتەڭنەن باستاپ باقىتتى بولۋعا, ەرتەڭنەن باستاپ جاقسى ءومىر سۇرۋگە تىرىساسىڭ. سوعان سەنەسىڭ. ءبىر ءسات كوڭىلىڭ قۇلازىپ قالسا, «بۇگىن جىلاپ الايىن, ەرتەڭنەن باستاپ مۇڭايمايمىن» دەيسىڭ. ءوز-وزىڭە سەرت بەرەسىڭ. ال اقىندار الداعى ۋاقىتتا ايتەۋىر ءبىر جاقسى ولەڭ جازاتىنىنا سەنەدى. جازۋشى جاقسى شىعارما جازاتىنىنا سەنەدى. عاشىق ادام سول جاننىڭ ءبىر كەلەرىنە سەنەدى. بالكي, تەلەفون شالار, حات جازار, پيون گ ۇلىن سىيلار, وعان باتىلى جەتپەسە, «م-عا» دەپ ولەڭ جازار... ءيا, ادام ۋاقىتقا ۇلكەن ءۇمىت ارتادى (ۋاقىت سونى بىلە مە ەكەن؟..) سودان بولار كەيدە ادامعا قىسقا عۇمىرى دا ۇزاق بولىپ كورىنەدى.
بىلەسىز بە, ءسىز كۇتكەن وسى ساتتەردىڭ ءبارى كوكتەمدە بولۋى مۇمكىن. قار استىنان ءبۇر جارعان بايشەشەكپەن بىرگە ءسىزدىڭ جاقسى ەستەلىكتەرىڭىز دە ومىرگە كەلگەن بولار. جەر ءجىپسىپ, كوكتەمنىڭ ءيىسى كوڭىل سەرگىتەر ۋاقىت ءبارىمىزدىڭ ارمان-مەزگىلىمىز. جۇرەكتە جينالعان وكپە, رەنىش, قاياۋ, جاس, مۇڭدى كوكتەمنىڭ جىپ-جىلى جاڭبىرى شايىپ كەتەردەي كۇتەسىڭ. سۋىعان, جاۋراعان, ساعىنعان, ۇمىتىلعان سەزىمدى كوكتەمنىڭ تامىزىق اۋاسى جىلىتارداي. ال قۇستار سالعان كوكتەم ءانى سەنىڭ انىڭدەي...جۇرەك سوزىڭدەي. سول سەنىممەن, سول ۇمىتپەن ىشتەي كوكتەمگە دايىندالاسىڭ. 1 ناۋرىزدا كۇنگە سالەم بەرەسىڭ. ء«ومىر دەگەن – كۇندى اينالۋ» دەپ سەرىك اقسۇڭقار ۇلىنىڭ ولەڭىن قايتا وقيسىڭ. ال قىزدار ەندى ءبارى وزگەرەتىندەي شاش قيادى, جاڭا كويلەك كيەدى. ءبارى كوڭىل كۇي ءۇشىن, ىشكى جان دۇنيەڭنىڭ ۇيلەسىمى ءۇشىن. قىزىق.
جەر-انا بۋسانعان شاقتا عارىشتا دا ەرەكشە قۇبىلىستار ورىن الادى. عالىمدار بۇل كەزەڭدى «گالاكتيكا ماۋسىمى» دەپ اتايدى. كوكتەمدە اسپاننان جارقىراي كورىنەتىن جۇلدىز – شولپان (ۆەنەرا). كۇن مەن ايدان كەيىنگى ەڭ جارىق جۇلدىزدى اشىق اۋا رايىندا, ءتىپتى كۇندىز دە كورۋىڭىز مۇمكىن. اگاراكي, كوكتەمنىڭ العاشقى كۇندەرىندە اي جانىنان اسپانعا تۇيمەدەي بولىپ قادالعان شولپاندى كورە قالساڭىز, مىندەتتى تۇردە جاقسى تىلەك تىلەڭىز. ەڭ جارىق جۇلدىز وزىنە قول سوزعان ءار جاننىڭ ءسوزىن ەستيدى, جانىن تۇسىنەدى, ءۇنسىز عانا سىرلاسادى, بالكي جۇباتار.
