قاراعاندى وبلىسىندا ءبىر اۋىلدى سۋ باسىپ قالدى

كەشە, 30 ناۋرىز كۇنى قاراعاندى وبلىسى بۇقار جىراۋ اۋدانىنداعى كوكپەكتى سۋ قويماسىنداعى پلوتينانىڭ جىرىلىپ كەتۋىنە بايلانىستى كوكپەكتى اۋىلىن توپان سۋ باسىپ قالدى. بۇل تۋرالى قاراعاندى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى حابارلادى. «ۇلكەن اعىن سۋدىڭ كەلىپ قۇيىلۋى مەن شليۋز كامەراسىنىڭ وتكىزۋ قابىلەتىنىڭ ناشارلىعىنان تاسقىننىڭ پلوتينادان اسىپ ءتۇسۋ ىقتيمالدىلىعى 18 ساعات 30 مينۋت بايقالدى», - دەلىنگەن حابارلامادا. وسىعان بايلانىستى كوكپەكتى اۋىلىنىڭ وزەننىڭ جاعالاۋىنا ورنالاسقان 70 ءۇيى (210 ادام) مەن قاراعاندى قالاسىنا قاراستى سورتيروۆكا ەلدى مەكەنىنىڭ 30 ۇيىنە (150 ادام) جاعداي حابارلانىپ, تۇرعىنداردى باسقا جاققا كوشىرۋ ورىن الىپ قالۋى مۇمكىن ەكەنى ەسكەرتىلدى. تۇرعىنداردىڭ كوشىرىلەتىنى تۋرالى اقپار كوكپەكتى وزەنى مەن بۇدان ءارى نۇرا وزەنى جاعالارىندا تۇراتىن تۇرعىنداردىڭ بارلىعىنا جەتكىزىلدى. ول ۇيمە-ءۇي ارالاپ شىعۋ تارتىبىمەن جۇرگىزىلدى. ال 31 ناۋرىز كۇنى تۇنگى 1 ساعات 30 مينۋتتا كوكپەكتى سۋ قويماسىندا پلوتينا  جىرىلىپ كەتتى. ناتيجەسىندە كوكپەكتى اۋىلىندا 100 ءۇيدى (810) سۋ باسىپ قالدى. سۋدىڭ دەڭگەيى 1,5-1,8 مەترگە دەيىن جەتىپ وتىر. تۇنگى 2 ساعات 45 مينۋتتان باستاپ كەنتتە سۋدىڭ دەڭگەيى قايتا باستادى. توتەنشە جاعدايدى جويۋ مەن سۋ باسقان جەرلەردەگى تۇرعىنداردى كوشىرۋگە توتەنشە جاعدايلار مينيسترلىگىنىڭ 124 ادام قۇرامىنداعى جەكە قۇرامى مەن 15 جوعارى ءوتىمدى تەحنيكا بىرلىگى, ازاماتتىق قورعانىس پولكى, مەديتسينالىق اپات بولىمشەلەرى, قۇتقارۋشىلار تارتىلدى. جۇرگىزىلگەن جۇمىستاردىڭ ناتيجەسىندە كوكپەكتى كەنتىنىڭ 125 ادامى قۇتقارىلدى. قۇتقارۋ جۇمىستارى بارىسىندا قازا تاپقان 4 ادامنىڭ دەنەلەرى تابىلدى. قازىرگى تاڭدا توتەنشە جاعدايلار قىزمەتى قۇتقارۋ جۇمىستارىن جالعاستىرىپ جاتىر. وقيعا بولعان جەرگە توتەنشە جاعدايلار ءمينيسترى ۆلاديمير بوجكو ۇشىپ كەلدى. مۇرات ايتقوجا. دەرەككوز: قاراعاندى وبلىسى توتەنشە جاعدايلار دەپارتامەنتىنىڭ ءباسپاسوز قىزمەتى. ءراسىم: e-arhiv.vko.gov.kz.