وقتاي ۇشقان دوپ, ابىر-سابىر ويىنشىلار, جاتتىقتىرۋشىنىڭ ىشقىنعان ىسقىرىعى... جەڭىستەن جەڭىس بەرمەي جۇرگەن «التاي» كومانداسىنىڭ جاتتىعۋى. سپورتشىلارى شەتىنەن مىقتى, وسالى جوق. قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى سانا انارقۇلوۆا دا كوپ ارۋدىڭ ىشىندە دوپ سوعىپ ءجۇر. قيمىلى شيراق, سوققىسى جويقىن...
– مەنىڭ بىلۋىمشە, سىزدەردە كۇندەلىكتى جاتتىعۋ. ءۇزىلىس بولماي ما؟
– وي, جوق. 12 ناۋرىزدا پلەي-وفف سەرياسى باستالادى. جاۋاپتى ويىندار. ال ءبىر ايدان سوڭ سەمەيدە ازيا چەمپيوناتى وتەدى. سول ءۇشىن جاتپاي-تۇرماي دايىندالۋىمىز كەرەك. ءۇزىلىس دەگەن جوق بىزدە. جارىسقا بارىپ كەلگەن سوڭ دا ءارى كەتسە, جارىستان كەيىن ەكى-اق كۇن دەمالامىز. پاندەميا دەندەگەن كەزدە عانا جاتتىعۋلاردىڭ بەرەكەسى كەتىپ قالدى. قازىر ءبارى ويداعىداي ءجۇرىپ جاتىر.
– وسى «التاي» كومانداسىنا قاشان كەلدىڭىز؟ كىمدەر ۇسىنىس ءبىلدىردى؟
– 2016 جىلى ەدى, «التاي» كومانداسى قۇرىلىپ, العاش رەت ەل چەمپيونى بولعان. دەكرەتتىك دەمالىستان شىققان سوڭ «التاي» كلۋبىنىڭ ديرەكتورى دوسجان ءۋالحانوۆ (بۇگىندە وبلىستىق سپورت باسقارماسىنىڭ باسشىسى) ۇسىنىس ءبىلدىردى. ءسال ويلانىپ قابىل الدىم. كەلە سالا جاتتىعۋلارعا كىرىستىم. ەشقانداي وكىنىش جوق. كومانداعا كەلگەلى جەتكەن جەتىستىكتەرىمىز از ەمەس, ەستىپ جاتىرسىزدار ءبارىن.
– جەڭىستەرىڭىزدەن جاقسى حاباردارمىز. قازاقستاننىڭ بەس دۇركىن چەمپيونى بولۋ وڭاي ەمەس. تاباندىلىقتى قاجەت ەتەدى. «اعايىننىڭ اتى وزعانشا, اۋىلداستىڭ تايى وزسىن» دەپ وتىراتىن قازاقپىز. ازيا چەمپيونى بولعاندارىڭىزدا توبەمىز كوككە جەتتى. ال ءسىزدىڭ تۋعان جەرىڭىز رەسەي. وسكەمەنگە ۇيرەنىسە الماي جۇرگەن جوقسىز با؟
– رەسەيدىڭ ورىنبور وبلىسى سول-يلەتسك قالاسىندا تۋدىم. باسقا بالالاردان تۇك ەرەكشەلىگىم جوق. وقىدىم, جاتتىقتىم. اكە-شەشەم تەمىرجولشىلار. ولاردىڭ سپورتقا قاتىسى جوق. مەنى 6-سىنىپتا سپورتقا الىپ كەلگەن تۋعان اعام تيمۋر جارىلعاسوۆ. ول قازىرگى ۋاقىتتا سەمەيدە «التاي-3» كومانداسىنىڭ جاتتىقتىرۋشىسى.
– بويىڭىز 188 سانتيمەتر. كۇيەۋىڭىز سىزدەن دە ۇزىن. سيرەك كەزدەسەتىن ۇزىن جىگىتتى قالاي جولىقتىردىڭىز؟ ء(ازىل ارالاستىرا قويعان سۇراققا جاۋاپ بەرمەس بۇرىن, ك ۇلىپ الدى).
– مەنى ابدەن زەرتتەپسىز عوي. بويىم نەگىزى 189 سانتيمەتر. بىرقاتار دەرەكتى 188 دەپ ءجۇر. ال ءسىز ايتپاقشى, سيرەك كەزدەسەتىن كۇيەۋىمنىڭ بويى 197 سانتيمەتر. تانىستىعىمىز وسى وسكەمەندە باستالدى. ول ۋاقىتتا تاعدىر مەنى وسى قالاعا قايتا ايداپ اكەلەرىن سەزبەگەن دە ەدىم. 2009 جىل ەدى. «پرەزيدەنت كۋبوگى» وسكەمەندە ساراپقا سالىندى. مەن ايەلدەر كومانداسىندا ويىن كورسەتىپ ءجۇردىم, ول ەرلەر كومانداسى اتىنان شىقتى. ءسويتىپ, سپورت سارايىندا تانىستىق. كەيىن ءبىلىسىپ, تاعدىردىڭ جازۋىمەن وتباسىن قۇردىق.
– تاعدىر دەيسىز, ىرىمعا سەنەسىز بە؟ ونى سۇراپ وتىرعانىم, «التاي» كومانداسىنا كەلگەلى 2-ءنومىرلى ويىنشىسىز. ساتتىلىك اكەلىپ ءجۇر مە؟
– كوپ جىلدان بەرى 2-نومىردە وينايمىن. وعان دەيىن 3-ءنومىر, 1-ءنومىر بولدى. العاش «التاي» كومانداسىنا كەلگەندە بىرنەشە ءنومىردىڭ ىشىندە 2-ءنومىر بوس بولىپ, سونى تاڭداپ الدىم. ۇنايدى ماعان. سيقىرى جوق قوي, بىراق جولىم بولىپ ءجۇر.
– ال كومانداعا شەتەلدەردەن لەگيونەر تارتۋ دەگەن قانشالىقتى دۇرىس؟ ونى سۇراپ وتىرعانىم, جەرگىلىكتى ويىنشىلار شەتتەتىلىپ قالماي ما دەگەنىم عوي.
– لەگيونەر تارتۋ چەمپيوناتتىڭ دەڭگەيىن ارتتىرادى. ول – شەتەلدىك تاجىريبە. مەنىڭ ويىمشا, ويىنشىلاردى جەرگىلىكتى جەردەن ىرىكتەپ, لەگيونەرلەرمەن ارالاستىرۋ كەرەك. سوندا ناتيجە جاقسى بولادى.
– ەسىڭىزدە قالعان تارتىستى ويىندار بار ما؟ ماسەلەن, ەسەپ سوڭعى ساتتەردە تەڭەسىپ كەلىپ, باسىم ءتۇسىپ نەمەسە قارسىلاس جەڭىپ كەلە جاتىپ جەڭىلىس تاپقان كەزدەر دەگەندەي.
– ءبىز ءۇشىن ءار ويىن جاۋاپتى. قيىن. ءار ويىن الدىندا قوبالجيمىز. سەبەبى «التاي» دەگەن اتىمىز, بىزگە سەنىم ارتقان حالقىمىز بار. سونداي-اق قارسىلاسقا دەگەن قۇرمەتىمىز بولعان سوڭ دا الاڭدايمىز. ءيا, جەڭىلىپ بارا جاتىپ باسىم تۇسكەن كەزدەر بولادى. مىسالى, ەسەپ 19:24 بولىپ تۇرادى. وندايدا ويىنشىلار پسيحولوگيالىق تۇرعىدا بوساڭسىپ بارا جاتادى. بىراق ءبىز بىرنەشە رەت جيناقتالىپ, ويىندى جەڭىسپەن اياقتاپ جاتتىق. كەرىسىنشە ءبىر دوپ قانا جەتپەي تۇرىپ, ۇتىلىپ قالاتىن كەزدەر دە بولدى.
– قاربالاس جاتتىعۋدىڭ اراسىندا ۋاقىت ءبولىپ, سۇحبات بەرگەنىڭىزگە مىڭ العىس! «Egemen Qazaqstan» گازەتىنىڭ ۇجىمى اتىنان «التاي» كومانداسىنىڭ ارۋلارىن
8 ناۋرىز مەرەكەسىمەن شىن جۇرەكتەن قۇتتىقتايمىز! سىزدەردى تەك بيىكتەردەن كورەيىك. ومىردە دە, ويىندا دا جەڭىستى ساتتەرىڭىز كوپ بولسىن!
اڭگىمەلەسكەن
مەرەي قاينار ۇلى,
«Egemen Qazaqstan»
