مازمۇندى شارا الدىمەن كورنەكتى اقىننىڭ شىعارماشىلىعى مەن قايراتكەرلىگىنە ارنالعان دوڭگەلەك ۇستەل ماجىلىسىمەن باستالدى. وندا ءسوز العان زيالى قاۋىم وكىلدەرى قالامگەردىڭ ءومىرى مەن ونەرى تۋرالى ايتا كەلىپ, بۇگىندە شىعارماشىلىقپەن اينالىسىپ جۇرگەن ايەلدەر جايىندا دا سالماقتى وي قوزعادى. سونداي-اق قوعامداعى سۋرەتشىلەردى مازالاعان وزەكتى ماسەلەلەر دە ايتىلدى.
ودان كەيىن ءىس-شارا كورمەنىڭ اشىلۋىنا ۇلاستى. مۇندا ۇلتتىق مۋزەيدەگى ونەرتانۋ ءبولىمىنىڭ جەتەكشىسى ەلدوس مەرتەنوۆ مەرەيتوي يەسىنىڭ شىعارماشىلىعىنا جان-جاقتى توقتالدى.
− ءماريام حاكىمجانوۆا پوەزياسىنان وتان, ءومىر, بەيبىتشىلىك تۋرالى تولعاعان ازاماتتىق ءۇن ايقىن اڭعارىلىپ تۇرادى. ول كىسىنىڭ ءتۇرلى اۋىرتپالىقتى كەشكەن ءومىر جولىن كوپشىلىك بىلە بەرمەيدى. سوندىقتان بۇگىنگى كورمەنىڭ, اسىرەسە جاستار ءۇشىن وي تۇيەتىن ءتالىمى مول» دەي كەلىپ, وسى ءىس-شارانى وتكىزۋگە مۇرىندىق بولعان ازاماتتارعا ريزاشىلىعىن جەتكىزدى.
كورمەگە 47 سۋرەتشىنىڭ 123 تۋىندىسى قويىلدى. ول سۋرەتشىلەردىڭ ءبارى دە جالپاق ەلگە ەسىمدەرى تانىس, رەسپۋبليكالىق, حالىقارالىق بايقاۋلاردىڭ لاۋرەاتتارى. ولاردىڭ بارلىعىن الەمگە كوزقاراستارى مەن كوركەم ءتىلى, ءپىشىن مەن كومپوزيتسيا مانەرى بىرىكتىرەدى.
«تاڭ شولپان» حالىقارالىق تاۋەلسىز سۋرەتشى ايەلدەر قورىنىڭ پرەزيدەنتى, قازاقستان سۋرەتشىلەر وداعىنىڭ مۇشەسى ءجاميلا تاكەن ءوز سوزىندە اتالعان قور − سۋرەتشى ايەلدەردىڭ شىعارماشىلىق دامۋىنا ارنالعان الاڭ, وندا ءاربىر سۋرەتشى ءوزىنىڭ بىرەگەي كوركەمدىك ءستيلى مەن كومپوزيتسيالىق يدەياسىن كورسەتەدى دەيدى.
