ايتا كەتەيىك, بۇل رەجيسسەردىڭ دەبيۋتتىك قويىلىمى. «قاسقىر مەن ەگىنشى», «الدار كوسەنىڭ ايلاسى», «كۇي قۇدىرەتى» اتتى تانىمدىق ەرتەگىلەر ءداستۇرلى اندەرمەن ارلەنىپ, اگۋگاي مەن يگيگاي كەيىپكەرلەرى ارقىلى ءبىر جەلىدە باياندالعان.
يتاليان تەاترلارىنىڭ ەلەمەنتتەرى استاسقان قويىلىم اكتەر وبرازدارى, كوستيۋمدەر ءستيلى, كوشە تەاترىن بەينەلەيتىن اربالاردىڭ بەزەندىرىلۋىمەن ەرەكشەلەندى. ءانسامبلدىڭ سۇيەمەلدەۋى سپەكتاكل كوركەمدىگىن ارتتىرىپ, بالالارعا ارنالعان تۋىندىنىڭ تىڭ باعىتىن اڭعارتادى. رەجيسسەر ويدان شىعارىلعان كەيىپكەرلەرگە اگۋگاي مەن يگيگاي ەسىمدەرىن تاڭداۋ ارقىلى حالىق اندەرىنە باسىمدىق بەرگەندەي.
ءۇش ەرتەگىنى ءبىر اربا ارقىلى كورسەتە بىلگەن قويىلىمنىڭ العاشقىسى – «قاسقىر مەن ەگىنشى». جاقسىلىققا جاماندىقپەن جاۋاپ بەرۋگە بولمايتىنىن ايتاتىن بۇل ەرتەگىدە تۇلكى وبرازى بالالارعا كوڭىل كۇي سىيلاپ, تاربيەلىك جاعىنان دا جاقسى اسەر قالدىردى. ال ساحناعا حالىق ەرتەگىلەرىنەن تانىمال ءارى كوپشىلىكتىڭ سۇيىكتى كەيىپكەرى – الدار كوسە شىققاندا كىشكەنتاي كورەرمەننىڭ قۋانىشى ەرەكشە بولدى.
سونداي-اق «كۇي قۇدىرەتى» اڭىز ەرتەگىسى – اق بوكەن بەينەسىمەن ەستە قالىپ, وبراز جاساۋدا كوستيۋمەر مەن حورەوگرافتىڭ ەڭبەكتەرى انىق كورىندى. ياعني جانۋاردى بەينەلەۋدە بىرلەسكەن جۇمىس ساحنالىق سۇلۋلىقتى بەرە العان.
ايتا كەتەيىك, ءانى مەن ءبيى, ويىن-ساۋىعى ۇشتاسقان قويىلىمدى ەڭبەكتەگەن بالادان باستاپ تاماشالاي الادى. تەاتر رەپەرتۋارىنداعى بۇل جاڭالىق بۇلدىرشىندەرگە تاربيەلىك ءمانى مەن مازمۇنى جاعىنان ولجا بولماق.
