وتىرىستا اقپارات جانە قوعامدىق دامۋ ءمينيسترى اسقار وماروۆ 2021 جىلدىڭ نەگىزگى قورىتىندىلارى مەن ۆەدومستۆونىڭ 2022 جىلعا ارنالعان مىندەتتەرى تۋرالى ايتىپ بەردى. «اقپارات جانە قوعامدىق دامۋ مينيسترلىگى 2021 جىلى اۋقىمدى جۇمىس اتقاردى. سونىمەن بىرگە زامان وزگەرىسىنە ساي مەملەكەت باسشىسى مەن ۇكىمەت مينيسترلىكتىڭ باسىم باعىتتارىن جاڭا فورماتتا ىسكە اسىرۋدى تاپسىردى. مينيسترلىك 2021 جىلى ازاماتتىق قوعاممەن قارىم-قاتىناسقا تىڭ سەرپىن بەردى. وسى ورايدا قازاقستاننىڭ ازاماتتىق فورۋمىنىڭ مەرەكەلىك ونىنشى جيىنىن ەرەكشە اتاپ وتكەن ءجون. ءىس-شارا بيلىك پەن قوعام ديالوگىنىڭ ماڭىزىن تاعى ءبىر مارتە دالەلدەدى. فورۋم بارىسىندا ۇكىمەتتىك ەمەس ۇيىمدار, بۇقارالىق اقپارات قۇرالدارى, بيزنەس جانە جالپى ازاماتتىق سەكتور وكىلدەرىنەن مىڭنان اسا ۇسىنىس پەن ۇسىنىم كەلىپ ءتۇستى», دەدى مينيستر.
ۆەدومستۆو باسشىسىنىڭ ايتۋىنشا, 2021 جىلى «قوعامدىق كەڭەستەر تۋرالى» زاڭعا تۇزەتۋلەر ەنگىزىلدى. زاڭ قوعامدىق كەڭەستەردىڭ وكىلەتتىكتەرىن ايتارلىقتاي كۇشەيتتى. «ماجىلىسكە قوعام وكىلدەرىمەن تالقىلاۋدىڭ بارلىق كەزەڭىنەن وتكەن «قوعامدىق باقىلاۋ تۋرالى» زاڭ جوباسى ەنگىزىلدى. ۇكىمەتتىك ەمەس ۇيىمدارعا گرانت بەرۋ ەرەجەلەرىنە وزگەرىس ەنگىزدىك. حالىقتىڭ سۇرانىسىن ەسكەرىپ, ونى العاش رەت جالپى تالقىعا سالدىق», دەدى ا.وماروۆ.
2021 جىلى «ۇكىمەتتىك ەمەس ۇيىمدار اكادەمياسى» جوباسى جالعاسىن تاۋىپ, سونىڭ اياسىندا بىلتىر 800-دەن اسا ازاماتتىق سەكتور وكىلى وقىتىلعانى ءمالىم بولدى. جالپى, مينيسترلىك ۇكىمەتتىك ەمەس ۇيىمدارمەن بىرگە ءتۇرلى جوبالاردى ىسكە اسىرىپ جاتىر. جىل سايىن رەسپۋبليكا بويىنشا الەۋمەتتىك ماڭىزى بار 2 مىڭعا جۋىق جوبا قولعا الىنادى ەكەن.
ا.وماروۆ ءوز بايانداماسىندا 2022 جىلى مينيسترلىكتىڭ بارلىق باعىتى بويىنشا جۇمىس اقپارات سالاسىن دامىتۋ جانە ازاماتتىق قوعاممەن ءوزارا ءىس-قيمىل تەتىكتەرىن جەتىلدىرۋگە باعىتتالاتىنىن اتاپ ءوتتى. وسىلايشا, ول 2021 جىلى وتكەن قازاقستاننىڭ X ازاماتتىق فورۋمىنىڭ قورىتىندىسى بويىنشا ۇەۇ, باق, بيزنەس جانە جالپى ازاماتتىق سەكتور وكىلدەرىنەن 1000-نان اسا ۇسىنىس پەن ۇسىنىمدار كەلىپ تۇسكەنىن اتاپ ءوتتى. ءمينيستردىڭ ايتۋىنشا, قوعامنان كەلىپ تۇسەتىن بارلىق سىندارلى ۇسىنىس نازاردان تىس قالمايدى جانە ولار مينيسترلىك پەن باسقا دا مۇددەلى مەملەكەتتىك ورگاندار تاراپىنان ەگجەي-تەگجەيلى زەردەلەنەدى.
مينيسترلىك بيىل ازاماتتىق قوعامدى دامىتۋ تەتىكتەرىن جەتىلدىرۋگە باسىمدىق بەرىپ وتىر. ەڭ الدىمەن, ۇكىمەتتىك ەمەس ۇيىمداردى گرانتتىق قارجىلاندىرۋ تەتىكتەرى جەتىلدىرىلەدى. ءتيىستى زاڭ جوباسى ازىرلەنگەن. قۇجات ۇكىمەتتىك ەمەس ۇيىمدار مەن حالىقتىڭ قالاۋىنا ساي كەلەتىن وزەكتى جوبالاردى عانا ىرىكتەۋگە مۇمكىندىك بەرەدى. وسىلايشا, وزەكتى ماسەلەلەر ناقتى شەشىلمەك.
ەكىنشىدەن, قوعامدىق كەڭەستەر جۇمىسىنىڭ ساپاسىن ارتتىرۋ جوسپارلانىپ وتىر. وسى ماقساتتا ۇكىمەتتىك ەمەس ۇيىمدار, ازاماتتىق بەلسەندىلەر, باق كەڭىنەن تارتىلماق. ءسويتىپ مەملەكەتتىك ورگاندار مەن وڭىرلەر اكىمدىكتەرىنىڭ قوعامدىق كەڭەستەرى قۇرامى جاڭارتىلماق. «ۇشىنشىدەن, قايىرىمدىلىق پەن ۆولونتەرلىكتى ىنتالاندىرۋعا جانە دامىتۋعا ەكپىن بەرەمىز. وسىعان بايلانىستى ءتيىستى زاڭ جوباسىن ۇسىندىق. زاڭ قابىلدانعاننان كەيىن كوتەرمەلەۋ كۆوتالارى كوبەيەدى. وسىلايشا, جۇمىسقا ورنالاسقان ۆولونتەرلەر سانى ايتارلىقتاي ارتادى. جالپى, بيىل ءتۇرلى فورماتتاعى 20 مىڭنان اسا ءىس-شارا وتكىزۋدى جوسپارلاپ وتىرمىز. تورتىنشىدەن, اۋىلدىق ۇكىمەتتىك ەمەس ۇيىمدار مەن ازاماتتىق بەلسەندىلەردىڭ باستامالارىنا 50 شاعىن گرانت بەرۋدى جوسپارلاپ وتىرمىز. ياعني جەرگىلىكتى قوعامداستىقتى جۇمىلدىرۋ, اۋىل باستامالارىن دامىتۋدا كوشباسشىلاردى انىقتاۋ جانە اۋىل تۇرعىندارىنىڭ تسيفرلى جانە قارجىلىق ساۋاتتىلىعىن ارتتىرۋعا باعىتتالعان شاعىن گرانتتار كونكۋرسى ۇيىمداستىرىلادى», دەدى مينيستر.
ا.وماروۆتىڭ ايتۋىنشا, اقپاراتتىق سالا – مينيسترلىك قىزمەتىنىڭ ماڭىزدى باعىتىنىڭ ءبىرى. 2021 جىلى مينيسترلىك قۇقىعى بۇزىلعان جۋرناليستەردىڭ قۇقىعىن قورعاۋ رەگلامەنتىن قابىلدادى. قۇجات قوعام وكىلدەرىمەن, بۇقارالىق اقپارات قۇرالدارىمەن جانە ءتيىستى ورگاندارمەن بىرلەسىپ مۇقيات تالقىلانعان. ءمينيستردىڭ ايتۋىنشا, جۋرناليستەردى اككرەديتتەۋدىڭ جاڭا قاعيدالارى بەكىتىلدى. سالاماتتى ءومىر سالتىن ناسيحاتتايتىن الەۋمەتتىك جارنامالاردى وتاندىق تەلەارنالاردا كورسەتۋ قاعيدالارى ناقتىلاندى. تسيفرلى تەلەراديونى ەنگىزۋ جوباسىن ىسكە اسىرۋ جالعاستى. بۇگىندە 11 ءوڭىر تسيفرلى تەلەۆيزياعا تولىق كوشكەن. ەل تاۋەلسىزدىگىنىڭ 30 جىلدىعىن مەرەكەلەۋ اياسىندا 73 مەديا جوبا ىسكە اسىرىلدى.
ا.وماروۆ پرەزيدەنتتىڭ تاپسىرماسىنا سايكەس, 2021 جىلى وتاندىق تەلەسەريالدار, دەرەكتى تاريحي فيلمدەر ءوندىرىسىن ۇلعايتۋعا دەن قويىلعانىن اتاپ ءوتتى. تەلەارنالاردان احمەت بايتۇرسىن ۇلى, قانىش ساتباەۆ سەكىلدى ۇلت زيالىلارى تۋرالى سەريالدار كورسەتىلىپ, كورەرمەن كوزايىمىنا اينالدى. الەۋمەتتىك ماڭىزى زور جوبالاردىڭ اراسىندا «Balapan» تەلەارناسى جانىنان اشىلعان ەرەكشە ءبىلىم بەرۋ قاجەتتىلىكتەرى بار بالالارعا ارنالعان انيماتسيا مەكتەبىنىڭ جۇمىسىن ايتۋعا بولادى. بۇل جوبانىڭ ىسكە اسىرىلۋى بيىل دا ءوز جالعاسىن تابادى.
مينيستر ءوز سوزىندە قوعامدىق سانانى جاڭعىرتۋ سالاسىندا التى نەگىزگى باعىت جاتقانىن اتادى. «بىلتىردان باستاپ باعدارلاما وسكەلەڭ ۇرپاقتى, اسىرەسە وقۋشىلاردى جانە مەكتەپ جاسىنا دەيىنگى بالالاردى تاربيەلەۋگە باسىمدىق بەردىك. «ۇلتتىق تاربيە», Tiji جانە Nickelodeon ارنالارىنىڭ بالالار كونتەنتىن قازاق تىلىنە اۋدارۋ سەكىلدى اۋقىمدى جوبالاردى جۇزەگە اسىرىپ جاتىرمىز. ايتپاقشى, Tiji جانە Nickelodeon قازاق تىلىندە جاقىندا شىعادى, تۇساۋكەسەرى وتەدى», دەدى ۆەدومستۆو باسشىسى.
ونىڭ مالىمەتى بويىنشا بۇل باعىتتاعى باستى باسىمدىق – «ۇلتتىق رۋحاني جاڭعىرۋ» جانە جول كارتاسى جوبالارىن ساپالى ىسكە اسىرۋ. «بۇل ستراتەگيالىق قۇجاتتار قازاقستاندىق بىرەگەيلىك پەن زياتكەرلىك الەۋەتتى, مەملەكەتتىك ءتىلدى دامىتۋعا, ۇلتتىڭ مادەني كودىن ساقتاۋعا جانە ىلگەرىلەتۋگە, جاستاردىڭ جان-جاقتى دامۋى مەن ءوزىن-ءوزى تانىتۋىنا باعىتتالعان», دەدى ول.
جالپى, بيىل دا الدىمىزدا مەملەكەتتىڭ اقپاراتتىق جۇمىسى ساپاسىن, وتاندىق باق-تىڭ باسەكەگە قابىلەتىن ودان ءارى دامىتۋ مىندەتى تۇر. مەملەكەت باسشىسىنىڭ تاپسىرماسىنا سايكەس ۇكىمەتتىڭ اقپاراتتىق جۇمىسى دەڭگەيىن ايتارلىقتاي كوتەرۋ قاجەت. وسىعان بايلانىستى مەملەكەتتىك مەكەمەلەردىڭ جۇمىسىن باق ارقىلى باعالاۋ كوزدەلىپ وتىر. «بيىل باق سالاسىن دامىتۋدى باق جانە ۇەۇ وكىلدەرىمەن كەڭىنەن تالقىلاماقپىز. بۇل جۇمىس اقپارات سالاسىن دامىتۋدىڭ 2023-2025 جىلدارعا ارنالعان ۇلتتىق جوسپارى شەڭبەرىندە جۇرگىزىلەدى. 2022-2023 جىلدارعا ارنالعان وقىتۋ جونىندەگى ارنايى جوسپاردى ىسكە اسىرۋ جوسپارلانعان. بۇل مەديا مامانداردىڭ بىلىكتىلىگىن دامىتۋعا, حالىقتىڭ مەديا جانە اقپاراتتىق ساۋاتتىلىعىن قالىپتاستىرۋعا باعىتتالعان», دەدى ا.وماروۆ.
سونىمەن قاتار مەملەكەتتىك تەلەارنالاردى جەتىلدىرۋدىڭ جاڭا تاسىلدەرى ازىرلەنگەنى ءمالىم بولدى. ماسەلەن, بيىل 24 kz مەملەكەتتىك تەلەارناسى جاڭا فورماتتا جۇمىس ىستەۋدى باستاپ وتىر. بۇل مەملەكەتتىڭ اقپارات ساياساتتى ءتيىمدى ءارى ساپالى جۇزەگە اسىرۋعا مۇمكىندىك بەرەدى.
مينيسترلىك وكىلى 2030 جىلعا دەيىنگى وتباسىلىق جانە گەندەرلىك ساياسات تۇجىرىمداماسى ىسكە اسىرىلىپ جاتقانىن دا حابارلادى. قازىرگى تاڭدا تۇجىرىمداما اياسىندا قوعامداعى ايەلدەردىڭ قۇقىقتارى مەن مۇمكىندىكتەرىن ىنتالاندىرۋ جانە ىلگەرىلەتۋ جۇمىستارى جۇرگىزىلىپ كەلەدى. «بىلتىر 24 جەلتوقساندا گەندەرلىك تەڭدىكتى قامتاماسىز ەتۋ جانە ايەلدەر قۇقىعىن قورعاۋ جونىندەگى ءىس-شارالار جوسپارى بەكىتىلگەنىن اتاپ وتكىم كەلەدى. قۇجات بۇۇ قاۋىپسىزدىك كەڭەسىنىڭ 2022-2025 جىلدارعا ارنالعان بىرنەشە قارارىن ىسكە اسىرۋعا باعىتتالعان. وڭىرلەردە تۇرمىستىق زورلىق-زومبىلىققا ۇشىراعان ايەلدەر مەن بالالاردىڭ ۋاقىتشا تۇرۋىنا جاعداي جاسالعان وتباسىن قولداۋ ورتالىقتارى جۇمىس ىستەيدى. ورتالىقتار قۇقىقتىق, پسيحولوگيالىق, الەۋمەتتىك, تۇعىن ءۇي سۇراقتارى بويىنشا جان-جاقتى كەڭەستەر بەرەدى. سونداي-اق 2021 جىلى «مەرەيلى وتباسى» كونكۋرسىن وتكىزۋ ەرەجەسىنە وزگەرىستەر ەنگىزىلدى. ەلىمىزدىڭ 17 وڭىرىنەن 17 ۇلگىلى وتباسى جەڭىمپاز اتاندى. ولار تۋرالى روليكتەر مەن سيۋجەتتەر باق پەن الەۋمەتتىك جەلىلەردە كەڭىنەن تارالدى», دەدى مينيستر.
اقپارات جانە قوعامدىق دامۋ ۆيتسە-ءمينيسترى الەكساندر دانيلوۆ مەملەكەتتىك جاستار ساياساتىن ىسكە اسىرۋدىڭ جاڭا تاسىلدەرى تۋرالى ايتىپ بەردى. ول اۋىل جاستارىن جانە الەۋمەتتىك وسال جاستاردى الەۋمەتتەندىرۋ, كاسىبي باعدارلاۋ, جۇمىسقا ورنالاستىرۋ بويىنشا ۇسىنىلعان شارالار تۋرالى مالىمدەدى. «قازىر جاستار ساياساتىنا قىزىعۋشىلىق تا, جاستار سانى دا ايتارلىقتاي ءوسىپ كەلەدى. بۇل ءبىر جاعىنان دەموگرافيالىق ستاتيستيكا, ونىڭ ىشىندە پرەزيدەنتتىڭ جاستار ساناتىنا كىرەتىندەردىڭ جاسىن 35-كە دەيىن ۇلعايتۋ جونىندەگى تاپسىرماسىنا دا بايلانىستى», دەدى ۆيتسە-مينيستر ا.دانيلوۆ.
ۆيتسە-مينيستر جاستار ساياساتىنىڭ بىرقاتار جاڭا قاعيداسى ازىرلەنگەنىن ەسكە سالدى. ء«بىرىنشى كەزەكتە, جاستاردى وبەكت رەتىندە قاراستىرۋعا بولمايدى. جاستار – مەملەكەت ءۇشىن ەڭ ماڭىزدى
سۋبەكت, ماڭىزدى رەسۋرس. جاستاردى وبەكت رەتىندە قاراۋدى قويىپ, سۋبەكت رەتىندە ساناسۋ تاسىلىنە كوشۋگە ءتيىسپىز. جاستاردىڭ ءوزى دە مەملەكەت ولارمەن قانداي تۇرعىدا جۇمىس ىستەۋى كەرەكتىگىن ايتىپ, سۇرانىستارىن جەتكىزە ءبىلۋى كەرەك. بۇل وتە ماڭىزدى ماسەلە. ەكىنشى ماڭىزدى مىندەت – اتاۋلى جۇمىس. جاستارعا بىرجاقتى قاراپ, جالپىلاما قارىم-قاتىناس ورناتۋ ازدىق ەتەدى. ويتكەنى ءار وڭىردەگى جاستاردىڭ ۇمتىلىستارى ءار ءتۇرلى. سوندىقتان جاستار ساياساتى يكەمدى, اتاۋلى بولۋعا ءتيىس», دەدى ۆيتسە-مينيستر.
سونىمەن قاتار «قوعامدىق كەلىسىم» رمم قىزمەتى تۋرالى عالىمجان قۇسمانعاليدىڭ ءوز بايانداماسىندا ەتنوسارالىق قاتىناستاردى دامىتۋ سالاسىندا اتقارىلىپ جاتقان جۇمىستار تۋرالى ايتىلدى.
سونداي-اق نەگىزگى سپيكەرلەر اراسىندا ازاماتتىق قوعام وكىلدەرى قازاقستان ازاماتتىق اليانسىنىڭ پرەزيدەنتى بانۋ نۇرعازيەۆا, قازاقستان ينتەرنەت قاۋىمداستىعىنىڭ پرەزيدەنتى شاۆكات سابيروۆ ءسوز سويلەدى. ولار اقپارات جانە قوعامدىق دامۋ سالاسىنداعى وزەكتى ماسەلەلەرگە توقتالىپ, وزدەرىنىڭ ناقتى ۇسىنىستارىن ايتتى.
