جاپپاي تارتىپسىزدىك كەزىندە بۇزاقىلارعا ساۋاتتى جانە جانقيارلىق ەرلىكپەن تويتارىس بەرىپ, قالانىڭ ب ۇلىنۋىنە جول بەرمەي, بەيبىت تۇرعىنداردىڭ رياسىز العىسىن ارقالاعاندار اراسىندا شىمكەنتتىك ءتارتىپ ساقشىلارىنىڭ ەرەن ەرلىگى انىق كورىندى. ەل باسىنا كۇن تۋعان «قاندى قاڭتاردا» ءدال وسى شىمكەنت قالاسى پوليتسيا دەپارتامەنتىن سالاداعى تاجىريبەسىمەن عانا ەمەس, حالىققا جاقىن ءارى جاريالىعىمەن, اشىقتىعىمەن تانىلعان ەرالى جۇماحانبەتوۆ باسقارعان ەدى.
پوليتسيا گەنەرال-مايورى ىشكى ىستەر ورگاندارىنداعى العاشقى قىزمەتىن 1990 جىلى كەنتاۋ قالالىق ىشكى ىستەر بولىمىندە جەدەل ۋاكىل بولۋدان باستاعان. 1996 جىلى – جەدەل ىزدەستىرۋ سالاسىندا الماتى قالاسى ىشكى ىستەر دەپارتامەنتى پوليتسيا باسقارماسىنىڭ باستىعىنا دەيىن كوتەرىلگەن. 2000-2004 جىلدارى ءىىم كپد وڭتۇستىك ءوڭىرى بويىنشا ۇيىمداسقان قىلمىسپەن كۇرەس باسقارماسىندا, ال 2005 جىلدان 2018 جىلدارعا دەيىن قر ءىىم-ءنىڭ ورتالىق اپپاراتىندا ءتۇرلى لاۋازىمدى قىزمەتتەر اتقارعان. 2018 جىلدان باستاپ وسى 2022 جىلدىڭ اقپانىنا دەيىن شىمكەنت قالاسى پوليتسيا دەپارتامەنتىنىڭ باستىعى بولعان. ارانداتۋشىلارعا قارسى كوشتى دە ءوزى باستاپ, ساقشىلاردىڭ ءار باسقان قادامى مەن ارەكەتتەرىنە كۇنى-ءتۇن دەمەي نۇسقاۋدى دا تىكەلەي ءوزى بەرگەنىن سونداعى پوليتسەيلەر قازىر دە ماقتانا-مارقايا ايتىپ ءجۇر. سوندىقتان, ازاتتىقتىڭ اق تاڭى مەن بەيبىت كۇندەرمىزگە سەبەپكەر بولعانداردىڭ ءبىرى ءارى بىرەگەيى, قوعامنىڭ قۇرمەتىنە لايىقتى وفيتسەر, ءىىى دارەجەلى ايبىن وردەنىنىڭ يەگەرى – ەرالى مۇساالى ۇلىمەن ارنايى سۇحباتتاسۋدى ءجون كوردىك.
- الدىمەن سۇحبات بەرۋگە كەلىسكەنىڭىز ءۇشىن راحمەت. العاشقى ساۋالىمىز ارينە «قاڭتار وقيعاسى» تۋراسىندا بولماق. ميلليوندى قالا – شىمكەنتتى قالاي امان قالىپ قالدىڭىزدار؟
ءبىز ءبارىمىز ءبىر دۇنيەنى ءتۇسىنۋ كەرەكپىز, ول - ايدىڭ-كۇننىڭ امانىندا تاۋەلسىزدىگىمىزدەن ايىرىلىپ قالا جازدادىق. ەڭ ءبىرىنشى حالىق بەيبىت ميتينگىگە شىقتى, ءبىز كوپشىلىكتەن ول كەزدە ەشقانداي جامان پيعىل كۇتكەن جوقپىز. سەبەبى, ولار الاڭعا شىعىپ, ءوزارا سويلەسىپ تۇردى. ءبىر كەزدە تالاپتارىن قويا باستادى. ءبىز تەك قوعامدىق قاۋىپسىزدىكتى قامتاماسىز ەتتىك. اراعا از-كەم ۋاقىت سالىپ, شەرۋشىلەر ءال فارابي الاڭىنان اكىمدىكتىڭ عيماراتىنا قاراي بەت الدى. دۇربەلەڭ سول اكىمدىك الدىندا ورىن الدى. سىرت جاقتان ءبىر توپ ارانداتۋشىلار كەلىپ جاڭاعى بەيبىت تۇرعىندارعا قوسىلدى. سوسىن, ارام پيعىلدارىن جۇزەگە اسىرا باستادى: عيماراتتارعا قاراي تاس اتىپ, ءتارتىپ ساقشىلارىنىڭ قىزمەتتىك كولىكتەرىن ورتەۋگە كوشتى. جاپپاي تارتىپسىزدىككە جول بەردى. انىقتالعانىنداي, بۇزاقىلاردىڭ دەنى - وزگە وڭىرلەردەن كەلگەن جاستار, ياعني تۇركىستان وبلىسى, سارىاعاش جانە كەلەس اۋداندارىنىڭ تۇرعىندارى بولىپ شىقتى. ارينە, قازىر سول ءبىر قيىن قىستاۋ كەزەڭدى ەسكە الۋدىڭ ءوزى قورقىنىشتى. بىراق, وسى ءبىر سىناققا تولى ءسات پەن ارانداتۋشىلىقتان ەل پرەزيدەنتى قاسىم-جومارت كەمەل ۇلىنىڭ ۇتىمدى شەشىمدەرى مەن باتىل قادامدارى ارقىلى عانا ءبۇتىن ءبىر مەگاپوليسىمىزدى عانا ەمەس, قازاقستاندى حالقىمەن قوسا ءدىن-امان الىپ قالدىق. مەملەكەت باسشىسىنىڭ تىكەلەي تاپسىرمالارى مەن باسقارۋىنىڭ ناتيجەسىندە, ءتارتىپ ساقشىلارى – ءبىز دە رۋحتانىپ, وتانىمىزدى الاۋىزدىقتان قورعاي الدىق.
- مويىنداۋ كەرەك, ءسىز ميلليوندى قالا – شىمكەنتتىڭ جۇرتىنا وتە جاقىن ءارى اشىق بولعان باسشىلاردىڭ ءبىرىسىز. حالىقتىڭ قۇرمەتىنە بولەنىپ, العىسىن ارقالاعانىڭىزعا دا كۋاگەرمىز. ءيا, حالىق ءسىزدى قۇرمەتتەيدى, جاقسى كورەدى. ايتىڭىزشى, جەرگىلىكتى جۇرتتىڭ سونشالىقتى سەنىمىنە يە بولارلىقتاي ء سىز پوليتسيا دەپارتامەنتىن باسقارعاندا قالادا ناقتى قانداي وڭدى ىستەر ورىن الدى؟
كوبىنە جاسالعان جۇمىستاردى تىزبەكتەپ ايتپايمىن, باستىسى - حالىق بىلەدى. بۇل ءۇشىن باعاسىن دا, باتاسىن دا بەرىپ ءجۇر. دەپارتامەنت باستىعى قىزمەتىنەن كەتكەن كەزدە تەلەفونىما حابارلاسقانداردى قوسپاعاندا, الەۋمەتتىك جەلى مەن مەنىڭ جەكە پاراقشاما جۋرناليستەر جانە تۇرعىنداردان تۇسكەن تولاسسىز حاتتار مەن جىلى لەبىز-العىستاردى وقىعاندا, ءوزىم دە تاڭقالدىم. جۇرەگىم تىنىشتالدى. ال قازىر ءسىزدىڭ تاراپىڭىزدان ارنايى سۇراق قويىلعان سوڭ, جاۋاپ بەرەيىن. مەن شىمكەنت قالاسى پوليتسيا دەپارتامەنتىنىڭ باستىعى لاۋازىمىنا تاعايىندالعان كەزدەن وسى قىزمەتتەن كەتكەنگە دەيىن قالا حالقىمەن بىرلەسىپ, وڭ ناتيجەسىن بەرگەن بىرقاتار باستامالار مەن تىڭ جوبالاردى جۇزەگە اسىردىق.
اتاپ وتەتىن بولسام:
- قالا اۋماعىنداعى كوشە قيىلىستارىندا ءۇش اۋىسىمدى پوليتسيا قىزمەتكەرلەرىنىڭ كەزەكشىلىگى ۇيىمداستىرىلدى. ناتيجەسىندە, قالا جولدارىندا كولىك كەپتەلىستەرى مەن جول-كولىك وقيعالارىنىڭ سانى ەسەلەي ازايدى;
- ەلىمىز بويىنشا العاش رەت شىمكەنت قالاسىنداعى بارلىق مەكتەپتەردىڭ الدىندا يۋۆەنالدى پوليتسيا ينسپەكتورلارى ءۇش اۋىسىمدى كەزەكشىلىككە تۇردى. ونىڭ ناتيجەسىندە, جاسوسپىرىمدەردىڭ قاتىسۋىمەن جول-كولىك وقيعالارى بولمادى. بۇل باستامانىڭ وڭ ناتيجەسىن قر ىشكى ىستەر ءمينيسترى قىزمەتىن اتقارعان, پوليتسيا گەنەرال-لەيتەنانتى ەرلان تۇرعىمباەۆ جوعارى باعالاپ, قازاقستاننىڭ بارلىق وڭىرلەرىنە وسى جوبانى ەنگىزۋدى بۇيىردى;
- جەرگىلىكتى تۇرعىندارمەن كەرى بايلانىستى كۇشەيتۋ ماقساتىندا WhatsApp جەلىسىندە «جەدەل ارەكەت ەتۋ» چاتى قۇرىلدى. وندا باق وكىلدەرى مەن قوعام بەلسەندىلەرى, جەرگىلىكتى تۇرعىندار قالا اۋماعىندا ورىن العان قۇقىق بۇزۋشىلىقتاردى فوتو نەمەسە بەينەجازباعا ءتۇسىرىپ, چاتقا جىبەرەدى. جولدانعان اقپاراتتىڭ نەگىزىندە پوليتسيا قىزمەتكەرلەرى بولعان جايتتاردى دەر كەزىندە تەكسەرىپ, زاڭدى شەشىم قابىلدايدى;
- ەلىمىزدە ءبىرىنشى بولىپ, اپتا سايىن وتەتىن مەنىڭ ارىزدانۋشىلاردى جەكە قابىلداۋىمنىڭ بارىسى تۇراقتى تۇردە فەيسبۋك الەۋمەتتىك جەلىسىنىڭ تىكەلەي ەفيرىندە كورسەتىلدى. بۇل پوليتسيا دەپارتامەنتىنىڭ اشىق ءارى جاريالى تۇردە قىزمەت اتقارىپ, حالىققا ەتەنە جاقىنداي ءتۇسىپ, قىزمەتتەگى مولدىرلىكتى قامتاماسىز ەتتى;
- قالا ورتالىعىنا شالعاي ورنالاسقان ەلدىمەكەندەردىڭ تۇرعىندارىمەن ارنايى بارىپ كەزدەسۋلەر ۇيىمداستىردىم. ونداعى بەكىتىلگەن ۋچاسكەلىك پوليتسيا ينسپەكتورلارىنىڭ جۇمىسىن تالداۋ, زەردەلەۋ ماقساتىندا حالىقتىڭ تالاپ-تىلەك, پىكىرلەرىن تىڭدادىم. تۋىنداعان ماسەلەگە قاتىستى ءتيىستى ماماندارعا تاپسىرمالار جۇكتەپ, بەلگىلى ۋاقىت ارالىعىندا ونىڭ ورىندالۋىنا كوز جەتكىزۋ ماقساتىندا حالىقپەن كەزەكتى رەت قورىتىندى كەزدەسۋلەر ۇيىمداستىردىم;
شىمكەنت قالاسى №4 بالالار ءۇيىنىڭ 100-گە جۋىق تاربيەلەنۋشىلەرىن دەپارتامەنت قامقورلىققا الىپ, ءتۇرلى سپورتتىق سەكتسيالار اشىلدى. ناتيجەسىندە بالالاردىڭ مادەني-اعارتۋشىلىق, سپورتتىق باعىتتاعى وي-ءورىسىنىڭ دامۋىنا اسەر ەتىپ, ءتۇرلى سالادا جەتىستىككە جەتۋىنە سەبەپشى بولدىق. سونداي-اق, قۇقىق قورعاۋ سالاسىنا قىزىعۋشىلىق تانىتقان تۇلەكتەرگە وسى باعىتتاعى جوو-دارىنا تۇسۋىنە دە تىكەلەي اتسالىستىم;
كۇرمەۋى كۇردەلى ماسەلەگە اينالعان ت.رىسقۇلوۆ پەن م.دۋلاتي كوشەلەرىنىڭ قيىلىسىندا بايدىبەك بي باعىتىنا قاراي جۇرەتىن تاكسي كولىكتەرىنىڭ زاڭسىز توقتاۋىن بولدىرماي, سول اۋماقتاعى كولىك كەپتەلىسىن تۇبەگەيلى جويۋ ماقساتىندا تاكسيلەرگە ارنايى جولاق سالىندى. ناتيجەسىندە, تاكسي جۇرگىزۋشىلەرى جولاۋشىلاردىڭ ومىرىنە ەشقانداي قاۋىپ توندىرمەيتىن بولدى;
ەلىمىزدە العاش بولىپ شىمكەنت قالاسى پوليتسيا دەپارتامەنتىنىڭ تەرگەۋ باسقارماسىندا ايەلدەر مەن كامەلەتكە تولماعاندارعا قاتىستى جىنىستىق زورلىق-زومبىلىق جايتتارى بويىنشا قىلمىستىق ىستەردى تەرگەۋشى-ايەلدەر تەرگەيتىن قىزمەتتىك بولمەلەر اشىلدى. زورلىق-زومبىلىق قۇرباندارىنىڭ تەرگەۋشى ايەلدەرگە سەنىم ءبىلدىرۋى ءىستىڭ بارلىق ءمان-جايىن ۋاقتىلى جانە ەگجەي-تەگجەيلى انىقتاۋعا مۇمكىندىك بەردى;
قالا اۋماعىندا قوعامدىق ءتارتىپ پەن جول قوزعالىسىنىڭ قاۋىپسىزدىگىن قاداعالايتىن جاڭا 3177 بەينەباقىلاۋ كامەرالارى ورناتىلىپ, ىسكە قوسىلدى. بۇل قۇرىلعىلار ارقىلى پوليتسەيلەر تاۋلىك بويى قىلمىستىڭ الدىن الۋ, ولاردى اشۋ جانە اكىمشىلىك قۇقىق بۇزۋشىلىقتى انىقتاۋ بويىنشا جۇمىس اتقارۋدا. ايتا وتەتىن اقپارات, 2021 جىلى بەينەكامەرالاردىڭ كومەگىمەن 306 قىلمىس اشىلىپ (2020 جىلى - 284), 74155 اكىمشىلىك قۇقىق بۇزۋشىلىق انىقتالعان (2020 جىلى - 47264). بۇل كورسەتكىشتەر الدىنعى جىلدارمەن سالىستىرعاندا ەداۋىر جاقسارعان;
مەگاپوليستە قۇقىق بۇزۋشىلىقتاردىڭ الدىن الۋ جانە قوعامدىق قاۋىپسىزدىكتى نىعايتۋ بويىنشا جۇمىستىڭ تيىمدىلىگىن ارتتىرۋعا باعىتتالعان 8 مودۋلدىك پوليتسيا بەكەتى ىسكە قوسىلدى. بۇل بەكەتتەردە قوعامدىق ءتارتىپتىڭ ساقتالۋىن قاداعالايتىن, اۋماقتى پاترۋلدەيتىن پوليتسيا قىزمەتكەرلەرى تاۋلىك بويى كەزەكشىلىك ەتەدى. مودۋلدىك بەكەتتەر ارقىلى قالا تۇرعىندارى پوليتسيا قىزمەتكەرلەرىنە ارىز-شاعىم جازۋمەن بىرگە, وتىنىشتەرىنە سايكەس قاجەتتى زاڭ كەڭەستەرىن دە الا الادى. وندا ۋچاسكەلىك پوليتسەيلەر, كامەلەتتىك جاسقا تولماعانداردىڭ ىسىمەن اينالىساتىن ينسپەكتورلار جانە جەدەل ۋاكىلدەر ازاماتتارعا قىزمەت كورسەتەدى.
اتالعان جۇمىستاردىڭ بارلىعى پوليتسيا ورگاندارىنىڭ اشىقتىعىن ءارى قولجەتىمدىلىگىن قامتاماسىز ەتۋگە باعىتتالعان. وسى ۋاقىت ارالىعىندا قالا اۋماعىندا قاۋىپسىزدىكتى قامتاماسىز ەتۋدە بىرلەسىپ اتقارىلعان اۋقىمدى جۇمىستار ءۇشىن تۇرعىندارعا العىسىمدى بىلدىرەمىن. ولار باستامالارىمدى اركەز قولداپ, وزدەرى دە اتسالىستى. راسىندا, الداعى ۋاقىتقا جوسپارلانعان جوبالاردىڭ دا سانى از ەمەس ەدى. ەندىگى جەردە, بۇل جۇمىستاردى ميلليوندى قالا – شىمكەنتتىڭ ەلىمىزدىڭ ەڭ قاۋىپسىز قالالارىنىڭ قاتارىنان تابىلۋى ءۇشىن ءتارتىپ ساقشىلارى ايانباي ەڭبەك ەتسە ەكەن دەپ نيەت بىلدىرەمىن.
- ءسىزدىڭ قوعامعا ەتكەن ەسەلى ەڭبەگىڭىزدەن بولەك, ادامي پاراساتىڭىز بەن قامقورلىعىڭىز جونىندە كوپ ەستيمىز. ءيا, ءسىزدىڭ بولمىسىڭىزدى جۇرتشىلىق جاقسى بىلەدى, ءتىپتى پرەزيدەنتىمىزدىڭ «جۇرتقا جاقىن پوليتسيا» تۇجىرىمداماسىنداعى بار قاسيەتتى ءوزىڭىزدىڭ بويىڭىزدان كورىپ ءجۇر. بالالار ۇيىندەگى تاربيلەنۋشىلەردى دە نازاردان تىس قالدىرماي, ءومىرىڭىزدىڭ ءبىر بولشەگىنە اينالدىرعان ەكەنسىز...
- حالقىمىز «جەتىم كورسەڭ – جەبەي ءجۇر» دەگەن. راسىندا, بۇل بۇلدىرشىندەر وسىنداي تاعدىردىڭ تالكەك-تاۋقىمەتىنە تاپ بولعانىنا كىنالى ەمەس قوي؟! ولار دا انانىڭ مەيىرىمى مەن اكەنىڭ قامقورلىعىن كورگىسى كەلەدى, سەزىنگىسى كەلەدى. ءزارۋ. سوندىقتان, قولىمنان كەلگەنشە اكە ورنىنا - اكە, اعا ورنىنا – اعا بولىپ, قولعانات بولاتىنىم راس. ولار دا – قوعامنىڭ ءبىر بولشەگى, باقىتتى بالالىق شاقتى سەزىنسە ەكەن دەيمىن. وسى ماقساتتا شىمكەنت قالاسىنىڭ سايرام تۇرعىنالابىندا ورنالاسقان №4 بالالار ءۇيىنىڭ تاربيەلەنۋشىلەرى تىكەلەي مەنىڭ باستاماممەن 2019 جىلدان بەرى ءتارتىپ ساقشىلارىنىڭ قامقورلىعىنا الىنعان ەدى. وسىلايشا پوليتسيا قىزمەتكەرلەرى بالالارعا بارىنشا كومەكتەسىپ, قولداۋ كورسەتىپ كەلەدى. بالالار ەشبىر مەرەكەدە نازاردان تىس قالماعان. قۋانتارلىعى, ءتارتىپ ساقشىلارى وسى ۋاقىت ارالىعىندا بالالارعا ارناپ ويىن-ساۋىق, سپورتتىق جانە تالىمگەرلىك ءىس-شارالار ۇيىمداستىرىپ كەلدى. سونداي-اق, بالالار ۇيىندە بىرنەشە سپورت تۇرىنەن ۇيىرمەلەر اشىلعان. بۇل ۇيىرمەلەردە تاربيەلەنۋشىلەردى پوليتسيا قىزمەتكەرلەرى قاتارىنان شىققان جاتتىقتىرۋشىلار سپورتقا باۋلىدى. ناتيجەسىندە, بالالار رەسپۋبليكالىق سپورتتىق جارىستارعا قاتىسىپ, جۇلدەلى ورىندارعا يە بولۋدا. پوليتسەيلەر ولاردىڭ جارقىن بولاشاققا جول اشاتىن دۇرىس تاڭداۋ جاساۋىنا ىقپال ەتتى. وسىنداي قامقورشى پوليتسەي-اعالارىنىڭ قىزمەتىنە قىزىعىپ قاراعان بالامىزدىڭ ءبىرى - الەكساندر ءوزىنىڭ پوليتسيا بولعىسى كەلەتىن ارمانىن ايتتى. ەگەر, ءار بالا وسىلاي قۇقىق بۇزۋشىلىقتاردىڭ الدىن الىپ, ادامداردى قورعاپ, پوليتسيا قىزمەتكەرى بولسا – بۇل ءبىزدىڭ قوعامعا قوسقان ۇلەسىمىز ءارى جەتىستىگىمىز بولماق. بۇگىندە قولداۋىمىزدىڭ ارقاسىندا جاس تالاپكەر قر ءىىم ب.بەيسەنوۆ اتىنداعى قاراعاندى اكادەمياسىنا وقۋعا ءتۇستى.
- ەرالى ءمۇساالى ۇلى, كەيىنگى كەزدەرى الەۋمەتتىك جەلىدەن ساقشىلاردى سىناپ, مارتەبەسىن تۇسىرەتىن بەينەجازبالاردى كورىپ قالىپ ءجۇرمىز. ونىڭ ىشىندە ءسىزدىڭ دە ۆيدەوڭىزدى كورىپ قالدىق...
مويىنداۋ كەرەك, ءاۋ باستا شىمكەنتكە قىزمەتكە كەلگەنىمدە حالىقتىڭ پوليتسياعا دەگەن كوزقاراسى مۇلدەم بولەك ەدى. ءتىپتى جاقتىرماي ۇركە قارايتىنىن بايقادىم. سەنسەڭىز, حالىق ءتىپتى ءوز ۋچاسكەلىك پوليتسيا ينسپەكتورىن تانىمايتىن. ءتىپتى ءبىر كورگەن ەمەسپىز دەپ اشىنعان جۇرتتى كورىپ, جۇمىستى ءتيىستى دەڭگەيدە جانداندىرۋ قاجەت ەكەنىن ءتۇسىندىم. كۇن-ءتۇن دەمەي وسى باعىتتا ەڭبەك ەتتىم. پاراقورلىقتى جويۋ ءۇشىن بىرقاتار جاڭا جۇيەلەردى ەنگىزدىم. قىزمەتكەرلەردى تۋعان بالامداي كورىپ, جەمقورلىقتان جيرەنۋ كەرەكتىگىن, ول قادامنىڭ قىلمىس ەكەندىگىن سانالارىنا قۇيىپ ءجۇردىم. ءبىرى – ءتۇسىندى, ەكىنشىسى – مەنىڭ جاناشىرلىقپەن ايتقان سوزدەرىمدى تەرىسكە بالاپ, جەلىگە جۇكتەپ جاتتى. ارينە, ول ۆيدەو-جازبالاردا نە ايتسام دا, تەك زاڭسىز ارەكەتتەردەن الشاق بولۋدى, وندايعا جول بەرمەۋ قاجەتتىلىگى تۋراسىندا ايتقانمىن عوي. سەبەبى, ولاردىڭ دا وتباسى بار, جەمقورلىققا جول بەرسە, سوڭىندا وپىق جەپ, قامالادى. بۇل – ءبىر قىزمەتكەردىڭ عانا ەمەس, ونىڭ وتباسىنا دا كەرى اسەر ەتەدى. وتباسى ويران بولادى. سونى ويلاپ, اركەز بالداردى ادىلدىك پەن ادالدىققا باۋلىدىم. زاڭعا باعىنۋدى, تەك زاڭ اياسىندا جۇمىس جاساۋدى ۇيرەتتىم. قالاي دەسەكتە, ءتارتىپ بار جەردە, جۇمىس جۇرەدى. سوندىقتان, سول ءتارتىپ پەن ءتالىمنىڭ ارقاسىندا تالاي ساقشىلار جاقسى مەن جاماننىڭ, پاراساتتىلىق پەن قىلمىستىڭ ارا-جىگىن اجىراتتى. «تۋرا بيدە – تۋعان جوق», دەپ دانا حالقىمىز تەككە ايتپاسا كەرەك-ءتى. شىمكەنت – وتتى جەر! اۋقىمى كەڭ قالا! سوندىقتان, جەلىگە جاريالانعان دۇنيەلەردىڭ تەك وڭدى وزگەرىستەر اكەلگەنىنە جانە جەرگىلىكتى جۇرت مەنى ءتۇسىنىپ, ءوز كەزەگىندە قولداپ وتىرعانىنا العىسىمدى ايتامىن.
- سۇحبات سوڭىندا تاقىرىپقا الىپ-قوسارىڭىز نەمەسە وتانداستارىڭىزعا جولدار تالاپ-تىلەگىڭىز بولسا, مارحابات!
راسىندا, قازاقتىڭ ءبىرتۋار پەرزەنتى ءاليحان بوكەيحانوۆتىڭ ءوزى «ۇلتقا قىزمەت ەتۋ – بىلىمنەن ەمەس, مىنەزدەن», - دەگەن. سوندىقتان, ەلگە ەڭبەك ەتۋدە بيىك پاراسات پەن انتقا ادالدىق, قوعام ومىرىندەگى ادىلدىك, حالىقشىل قاسيەتتەر ادام بويىنان تابىلۋى ماڭىزدى. قر پرەزيدەنتى ق.ك.توقاەۆتىڭ «جۇرتقا جاقىن پوليتسيا» تۇجىرىمداماسىنىڭ تىكەلەي ورىندالۋى جولىندا دا جاۋاپكەرشىلىكتى ءجىتى سەزىنىپ, حالىقتىڭ قاۋىپسىزدىگىن تولىقتاي قامتاماسىز ەتۋ – بۇگىنگى پوليتسيانىڭ مىندەتى. ءدال وسى مىندەت-جۇكتەمە جۇگەندى جۇزەگە اسسا, پوليتسيا – ەلدىڭ قورعانى رەتىندە قازاقستانىمىزدىڭ قاۋىپسىزدىگى ەسەلەي ارتىپ, تۇرعىنداردىڭ تىنىشى ورنايتىنى ءسوزسىز. مەملەكەت باسشىسىنىڭ ءوزى قازىرگى كەزدە ءتارتىپ ساقشىلارىنىڭ جۇمىس جۇيەسى جاقسارۋى ءۇشىن ءتيىستى جاعدايلاردى جاساپ كەلەدى. الەۋمەتتىك ماسەلەلەرى دە باستى نازارعا الىنعان. قالعانى تەك – حالىققا ادال ءارى ءادىل قىزمەت ەتۋ! ناعىز انتقا ادال وفيتسەرلەر مەن جاستارعا كەدەرگى كەلتىرمەي, تيىسىنشە وسۋىنە مۇمكىندىك بەرۋ!
