وسى اۋلەتتەن ءتىل ءبىلىمىنىڭ ايتۋلى وكىلى, پروفەسسور قۇدايبەرگەن جۇبانوۆ پەن كورنەكتى مۋزىكا زەرتتەۋشىسى, كومپوزيتور, ديريجەر احمەت جۇبانوۆ سەكىلدى دارا تۇلعالار شىقتى. سول الىپتاردىڭ جولىن جالعاعان كورنەكتى كومپوزيتور عازيزا جۇبانوۆانىڭ دا ورنى ەرەكشە.
−احمەت جۇبانوۆتى حالقىمىز جاقسى بىلەدى دەپ ويلايمىن. قازاق ۇلتتىق وركەسترىن قۇرىپ, ونىڭ العاشقى ديريجەرى بولدى. وتىزىنشى جىلداردىڭ اياعىندا قازاقستان كومپوزيتورلار وداعىن باسقاردى. كومپوزيتور لاتيف حاميديمەن بىرىگىپ «اباي» وپەراسىن جازدى. ۇلتتىق مۋزىكانىڭ دامۋىنا ونىڭ قىزى عازيزا جۇبانوۆا دا ۇلكەن ۇلەس قوستى. بيىل ارداقتى تۇلعانىڭ مەرەيتويى. ول كىسىنىڭ «حيروسيما», «قاراگوز» بالەتتەرى مەن «جىگەر», «اقساق قۇلان» اتتى سيمفونيالىق پوەمالارى الەمدىك دەڭگەيدەگى تۋىندىلار سانالادى. ءوزىم عازيزا اپايدىڭ شاكىرتى بولعانىما قۋانامىن. ول كىسىدەن ونەگەلى ءتالىم-تاربيە الدىق, −دەيدى قازاقستان كومپوزيتورلار وداعىنىڭ توراعاسى, كومپوزيتور سەرىكجان ءابدىنۇروۆ.
مۋزىكالىق كەشتە «استانا وپەرا» تەاترىنىڭ وركەستر ارتىستەرى مەن سوليستەرى احمەت جۇبانوۆ, عازيزا جۇبانوۆا, سونداي-اق داڭقتى اۋلەتتىڭ كەيىنگى وكىلدەرى ءالىبي مامبەتوۆ پەن كارينا يزمايلوۆانىڭ كامەرالىق جانە ۆوكالدىق تۋىندىلارىن ورىنداپ, كلاسسيكالىق اۋەنگە سۋساپ جۇرگەن تىڭدارمانداردىڭ ءشولىن قاندىردى. ايتا كەتەيىك, كارينا يزمايلوۆا –عازيزا جۇبانوۆانىڭ شوبەرەسى. قازاقستان كومپوزيتورلار وداعىنىڭ ەڭ جاس مۇشەسى, قازىر ماسكەۋ كونسەرۆاتورياسىندا وقيدى. ءبىرتالاي حالىقارالىق بايقاۋلاردىڭ لاۋرەاتى.
سونىمەن قاتار كەش بارىسىندا كورنەكتى كومپوزيتور مۇقان تولەباەۆ, ەركەعالي راحماديەۆتەن باستاپ, قازىرگى زاماناۋي اۆتورلار − بالنۇر قىدىربەك, نازگۇل تاڭاتار, سەرىكجان ءابدىنۇروۆ, ءالىبي ءابدىنۇروۆ, ارمان جايىم, ايسۇلۋ ءتاني, ازىمبەك جامباەۆ, الىبەك قادىروۆ, ءلاززات جۇمانوۆانىڭ تۋىندىلارى ورىندالدى.
