سەرىك شاپكەنوۆتىڭ مالىمەتى بويىنشا, 2021 جىلدىڭ قورىتىندىسى بويىنشا 198,4 مىڭ وتباسىنا اتاۋلى الەۋمەتتىك كومەك تاعايىندالعان. بۇل 2020 جىلدىڭ كورسەتكىشىنەن 7,4% جوعارى.
«اتاۋلى الەۋمەتتىك كومەك الاتىن وتباسىلاردان شىققان 517,2 مىڭ بالاعا كەپىلدىك بەرىلگەن الەۋمەتتىك توپتاما بەرىلدى. ونىڭ ىشىندە 259,4 مىڭ مەكتەپ جاسىنا دەيىنگى بالا, 257,8 مىڭ مەكتەپ جاسىنداعى بالا بار. كەپىلدىك بەرىلگەن الەۋمەتتىك توپتاما تولەۋگە 20,5 ملرد تەڭگە قاراستىرىلعان. ااك الۋشىلار سانىنىڭ وسۋىنە بايلانىستى 2021 جىلى مينيسترلىك قىزمەتكەرلەرى ااك تاعايىنداۋعا كوشپەلى مونيتورينگ جۇرگىزدى. ونىڭ قورىتىندىسى بويىنشا جەكەلەگەن وڭىرلەردە زاڭ بۇزۋ فاكتىلەر انىقتالدى. بۇل كومەك الۋشىلاردىڭ وسۋىنە اكەلدى. مىسالى, شىمكەنتتە 2021 جىلدىڭ قورىتىندىسى بويىنشا ااك الۋشىلار سانىنىڭ ءوسۋى 28,5% بولدى», دەدى ۆەدومستۆو باسشىسى.
ونىڭ ايتۋىنشا, مۇنداي فاكتىلەر قايتالانباۋى كەرەك.
«ول ءۇشىن بيىل تولەمدەردى ااك تەتىگىنىڭ اشىقتىعىن قامتاماسىز ەتەتىن «ازاماتتارعا ارنالعان ۇكىمەت» مەملەكەتتىك كورپوراتسياسى ارقىلى ورتالىقتاندىرۋ جۇمىستارى باستالدى», دەدى مينيستر.
