رەسپۋبليكالىق «لەنين-كۋرچاتوۆ» تاس جولىندا جۇيتكىپ, كوكتوبە اۋىلىنىڭ تۇسىنان وتە بەرگەندە كولىگىم جولدان ۇشىپ كەتتى. قۇداي ساقتادى. ەشقانداي جاراقات المادىم. كولىگىمە دە زاقىم كەلمەدى. جالعىز بولعانىما ىشتەي قۋاندىم. «جامان ايتپاي جاقسى جوق» دەمەكشى, جولاۋشىلارمەن كەلە جاتىپ ۇلكەن اپاتقا ۇشىراسام... وسى ماندەگى ءتۇرلى ويلار مازا بەرمەدى. قاراڭعى قاپاستا اقىلداساتىن ەشكىمنىڭ بولماۋى دا سانامدى سان-ساققا جۇگىرتتى. ءبىراز ۋاقىتتان سوڭ ەسىمدى جيناپ, 102 نومىرىنە حابارلاستىم. وقيعا ورنىنا ءاپ-ساتتە 2 پاترۋلدىك كولىك توقتاي قالدى. ماي اۋدانىنىڭ پوليتسيا قىزمەتكەرلەرى نۇرلان اۋباكىروۆ, ميرحات مۋرزالينوۆ, باحتيار نىعمەت جانە الماز راحمەتوۆ العاشقى مەديتسينالىق كومەك كورسەتىپ, سىمارقان ارقىلى جولدان شىققان كولىگىمدى تارتىپ الدى.
مۇنداي جاعدايعا العاش رەت تاپ بولىپ وتىرمىن. «پەرىشتە قاقتى» دەگەن وسى شىعار. ۇزاق ۋاقىت ەسەڭگىرەپ ءجۇردىم. نەگىزى كولىك جىلدامدىعىن ارتتىرماي, جول ەرەجەلەرىنە مۇقيات قارايتىن جۇرگىزۋشىلەردىڭ ءبىرى ەدىم. بۇل جولى جاڭا جىلدىق كوڭىل كۇيمەن جاقىندارىما اسىعىپ, رۋلگە يە بولا الماي قالدىم. ۇلكەن ساباق الدىم. وقيعا ورنىنا تەز جەتكەن پوليتسيا قىزمەتكەرلەرىنە راحمەتىمدى ايتامىن. ساقشىلار جان-جاقتى ەكەن. دارىگەردىڭ دە, پسيحولوگتىڭ دا قىزمەتىن اتقارىپ, بارىنشا قولۇشىن سوزدى. «جانار-جاعارمايىڭ جەتە مە؟» دەپ سۇراعاننىڭ ءوزى پوليتسيا قىزمەتكەرلەرىنىڭ ادامگەرشىلىگى مول ەكەنىن اڭعارتقانداي. ءوز ماماندىعىنىڭ مايتالمانى دەگەن وسىندايدا ايتىلسا كەرەك. تۇرعىنداردىڭ اماندىعى ءۇشىن كۇنى-ءتۇنى ءبىر تىنباي, دەمالىس كۇندەرى دە شاپقىلاپ جۇرەتىن ازاماتتار كەز كەلگەن ماراپاتقا لايىق. ءتارتىپ ساقشىلارىنىڭ جۇمىسىنا تابىس, وتباسىلارىنا اماندىق تىلەيمىن!
نۇرسۇلتان ەرنازاروۆ
پاۆلودار وبلىسى
