«قازىر بۇكىل الەمدەگى احۋال وزگەرىپ جاتىر. جاڭا قۇندىلىقتارمەن قاتار كۇردەلى سىن-قاتەرلەر پايدا بولۋدا. وسىنداي اۋمالى-توكپەلى ۋاقىتتا ەلىمىز دامۋدىڭ كەلەسى كەزەڭىنە قادام باستى. ءبىز «جاڭا قازاقستاندى» قۇرۋعا كىرىستىك. بۇل – وتە اۋقىمدى مىندەت. ءتىپتى بولاشاقتاعى تاعدىرىمىزدى شەشەتىن اسا ماڭىزدى جۇمىس دەۋگە بولادى», دەگەن قاسىم-جومارت توقاەۆتىڭ ءسوزى – بارىمىزگە ناقتى باعدار. پرەزيدەنت ەلدەگى جەتەكشى ساياسي ۇيىمدى جاڭعىرتۋ تۋرالى ايتقاندا قازاقتىڭ «ۇيىتقى» دەگەن ادەمى ءسوزىن قولداندى. شىن مانىندە بارلىق ءىس-ارەكەتكە ۇيىتقى بولار كۇش كەرەك. جاڭادان ۆەلوسيپەد ويلاپ تابۋدىڭ قاجەتى شامالى. قولداعى باردى ۇقساتۋ قاجەت.
وزگەرىستى ەڭ الدىمەن وزىمىزدەن باستايىق دەگەن پرەزيدەنت پارتيانىڭ اتى زاتىنا ساي بولسىن دەگەن تىلەك ءبىلدىردى. ءماجىلىس توراعاسى ەرلان قوشانوۆ ساياسي ۇيىمنىڭ اتاۋىن «امانات» دەپ وزگەرتۋدى ۇسىندى. «امانات» دەگەن ءسوز قازاق ءۇشىن قاسيەتتى.
«ەگەمەندىگىمىز, ەلدىگىمىز بەن بىرلىگىمىز, كەڭ-بايتاق جەرىمىز – بىزگە بابالاردان جەتكەن امانات. وسى قاستەرلى قۇندىلىقتارىمىزدى كوزدىڭ قاراشىعىنداي ساقتاپ, بولاشاققا ميراس ەتۋىمىز كەرەك. مەملەكەتتىلىك ءداستۇر جالعاستىعى, ۇرپاق ساباقتاستىعى دەگەنىمىز, مىنە, وسى. حالقىمىز ەشقاشان اماناتقا قيانات جاساماعان», دەپ قاسىم-جومارت كەمەل ۇلى اتالعان ۇسىنىستى قولدادى.
پارتيانىڭ اتاۋى وزگەردى. ەندى ونىڭ قۇرىلىمى دا, ساپالىق ولشەمى دە وزگەرۋى ءتيىس. ماڭدايشانى اۋىستىرعاننان ەشكىمنىڭ ماڭدايى جارقىراي قويمايدى. مازمۇندى ءىس-ارەكەت, پارتيالىق اپپاراتتىڭ ۋاقىتقا يكەمدەلۋى, «جانارىندا وتى بار» جانداردىڭ جارقىراپ شىعۋى, ەلمەن ەتەنە جۇمىس ىستەۋ امالدارىن تابۋ كەرەك-اق. ەڭ باستىسى, حالىقتىڭ سەنىمىنە يە بولۋ مىندەتى الدا تۇر. بۇل ءۇشىن ءماجىلىس پەن ماسليحاتتارداعى پارتيا فراكتسيالارى ناقتى شەشىمدەر قابىلداۋعا كوشۋى قاجەت. پارتيا جاس ساياساتكەرلەردى شىڭدايتىن, سۇرىپتايتىن ۇيىمعا اينالۋى كەرەك.
قازىر الەۋمەتتىك جەلىدە جەلپىنە سويلەپ, ماسەلەنىڭ كوبىن جاداعاي تالقىلاۋ كوپ. پرەزيدەنت جۇرتتى الاڭدا نەمەسە جەلىدە جەلكىلدەگەننەن گورى, پارلامەنت پەن ءماسليحات جيىندارىندا سىندارلى جۇمىس ىستەۋگە شاقىردى. ءسويتىپ, ساياسي مادەنيەتتى قالىپتاستىرۋدىڭ جولىن كورسەتتى.
ءجون سوزگە توقتاعان جۇرتپىز. ۇلاعاتتى تاربيە كورگەن ۇلتپىز. ءبىر نارسەنى انىق ۇعىنعان ابزال. بىزگە قۋاتتى دا ءال-اۋقاتتى قازاقستاندى ەشكىم قۇرىپ بەرمەيدى. ءبارىن ءوزىمىز ىستەۋىمىز قاجەت. وسىنى قاپەردە ۇستايىقشى.
نۇرتورە ءجۇسىپ,
سەنات دەپۋتاتى
