پارتيا باسشىلىعىنىڭ اۋىسىپ, زامان تالابىنا ساي وزگەرە باستاعانى سونىڭ ايعاعى. ونسىز ورىن العان قاسىرەتتىڭ الداعى ۋاقىتتا قايتالانۋىنا جول بەرمەي, ءادىل دە گۇلدەنگەن قوعامعا قول جەتكىزۋ مۇمكىن ەمەس. تيىسىنشە «جاڭا قازاقستان» تۇجىرىمداماسى حالىق يگىلىگى تۇرعىسىنداعى ناقتى ىستەرمەن عانا باياندى بولماق.
الايدا اتالعان مىندەت كەيبىر شولاق بەلسەندىلەردىڭ ايتۋىنشا, قولدا باردى تۇگەلىمەن ىسىرىپ قويىپ جوقتان باستاۋمەن نەمەسە قۇر ايقايشىلدىقپەن شەشىلمەيدى. قايتا ەلدى جىككە ءبولىپ السىرەتۋ قازىرگى كەزەڭنىڭ ىشتەگى دە, سىرتتاعى سىن-قاتەرلەرىنە توتەپ بەرۋگە كەدەرگى كەلتىرەدى. بۇل تىعىرىققا تىرەيتىن جول ەكەنىن الاشتىڭ كەشەگىسى مەن رەسەيدىڭ بۇگىنى كورسەتتى.
ولاي بولسا ەنشىمىزدەگى ميراستى تالان-تاراجعا سالماي ساقتاپ, كەرەك بولسا كەمشىن تۇستارىن تۇزەتىپ, كەلەر ۇرپاققا تاپسىرۋ كەرەك. پارتيانىڭ جاڭاشا AMANAT دەپ اتالۋى مەن وسى ابىرويلى مىڭدەتتىڭ, سونداي-اق سايلاۋشىلاردىڭ اماناتىن ورىنداۋ اراسىندا ايقىن ۇندەستىك بايقالادى. پارتيانىڭ قايتا قۇرۋ باعدارلاماسىنا توقتالار بولساق, ول ناقتى ءارى جان-جاقتى, سونىمەن قاتار كەز كەلگەن قاتارداعى مۇشە مەن ازامات باقىلاي الاتىن شارۋالار جوسپارى بولىپ تابىلادى.
اشىقتىق, ادىلدىك, مەملەكەتشىلدىك قاعيداتتارى AMANAT پارتياسىنىڭ ەڭ تومەنگى بىرلەستىكتەرىنەن باستاپ ماجىلىستەگى فراكتسيا دەڭگەيىنە دەيىن بۇلجىتپاي ساقتالىنباق. ءوز كەزەگىندە بۇدان بىلاي پارتيانىڭ پرەزيدەنت نە توراعا ەمەس, ۇلتتىق مۇددەنىڭ, اتاپ ايتقاندا جاڭا قازاقستان يدەياسىنىڭ اينالاسىندا توپتاسۋى قاجەت. سەبەبى 30 جىلدىق تاريحىندا قازاق مەملەكەتىندەگى پارتيا اتاۋلىلار نەگىزىنەن جەكەلەگەن كوشباسشىلاردىڭ رايىنا قاراي قۇرىلىپ, ەلدەن گورى سولاردىڭ ءسوزىن سويلەپ كەلدى. مەيلى بيلىكتە بولسىن ءيا, وپپوزيتسيا قاناتىندا بولسىن.
ال ەندى وسىنداي ويىن ەرەجەلەرىنە يكەمدەلگەن ورتادا ناعىز ساياسي باسەكەلەستىك پەن دەموكراتيانىڭ ورناۋى ەكىتالاي. ولاي بولسا قازاقتىڭ قوعامدىق الاڭىندا ورىن تەپكەن ساياسي كۇشتەر ەسكى الىس-ج ۇلىستى, ءبىر-ءبىرىن قارالاۋدى قويىپ, جاڭاشىلدىق تالابىنا ساي بوي تۇزەگەنى ابزال. كوكتەمنىڭ العاشقى كۇنى باستاۋ الىپ جاتقان وڭ ءۇردىستى جاقسىلىققا جوريىق.
راسۋل جۇمالى,
ساياساتتانۋشى
