الدىمەن كوماندالار تانىمال قازاق اندەرىنىڭ اياسىندا توپتىق تانىستىرىلىمدارىن جاسادى. جاس زياتكەرلەر اقىندىق ونەرىمەن جانە مۋزىكالىق داعدىلارىمەن ەرەكشەلەندى. ەكىنشى كەزەڭدە بەرىلگەن اۋەندى تىڭداي وتىرىپ, اتاۋى مەن اۆتورىن تاۋىپ جارىسسا, سۇراق-جاۋاپ ايدارىندا وقۋشىلار «قازاقتىڭ 100 ءانى» تىزىمىنە ەنگەن شىعارمالار تۋرالى بىلىمدەرىن ورتاعا سالدى. توپتىق جۇمىس بارىسىندا كوماندالار كاراوكەدە ءان ايتىپ, حالىق جانە ەسترادالىق اۋەندەردىڭ اتاۋى مەن اۆتورلارىن سايكەستەندىرۋدە شاپشاڭدىقتارىن بايقاتتى.
ء«ىس-شارادا تىزىمگە ەنگەن 100 شىعارمانىڭ 77-گە جۋىعى اتاپ ءوتىلدى. وقۋشىلار ۇمىت بولىپ بارا جاتقان مادەني مۇرالاردى قايتا جاڭعىرتىپ, تۋعان جەرىنە, تاريحىنا, مادەنيەتى مەن ونەرىنە دەگەن سۇيىسپەنشىلىكتەرىن كورسەتتى», دەيدى جوبا جەتەكشىسى, پەداگوگ-ۇيىمداستىرۋشى ءارى كۋراتور دينا اشىرباەۆا.
دومبىرانىڭ ۇنىنەن بويىنا قۋات الىپ, اۋەزدى اۋەندەرىمەن اينالاعا نۇر شاشۋدى جانىنا سەرىك ەتكەن قاتىسۋشىلار بايقاۋدىڭ بەرەر تاربيەلىك ءمانى زور دەپ سانايدى.
«قازاقتىڭ ۇلتتىق مۋزىكا مادەنيەتىن دامىتۋدا العاش ءىز سالعان – حالىق ەتنوگرافى الەكساندر زاتاەۆيچ. ول – 1 000 ءاندى زەرتتەپ, نوتاعا تۇسىرگەن العاشقى تۇلعا. 977 ءان مەن 23 كۇيدى جيناققا ەنگىزدى. مەكتەبىمىزدە جۇرگىزىلەتىن «100 ءان» جوباسى بىزگە حIح عاسىرداعى اقان سەرىنىڭ اندەرىنەن باستاپ, زاماناۋي شىعارمالارمەن جاقىنىراق تانىسۋعا سەپتىگىن تيگىزەدى. بۇل اندەر ادامنىڭ رۋحىن كوتەرىپ, ىشكى جان دۇنيەسىن بايىتادى», دەيدى د.اشىرباەۆا.
تارتىستى وتكەن سايىس قورىتىندىسى بويىنشا 1-ءشى ورىندى 9«ۆ» سىنىبىنىڭ, 2-ءشى ورىندى 9«س» سىنىبىنىڭ, ال 3-ءشى ورىندى 9«G» سىنىبىنىڭ وقۋشىلارى ءوزارا ءبولىستى.
ەلەنا رىبينا,
حيميا-بيولوگيا باعىتىنداعى نازارباەۆ
زياتكەرلىك مەكتەبىنىڭ ءباسپاسوز حاتشىسى
قىزىلوردا
