وتكەن جىلدىڭ قورىتىندىلارى مەن 2022 جىلعا ارنالعان جوسپارلار تالقىلانعان كەڭەس بارىسىندا يدم ازاماتتىق اۆياتسيا كوميتەتى ۇشۋ قاۋىپسىزدىگى دەڭگەيىن, ىشكى جانە حالىقارالىق اۋە قاتىناسىن ارتتىرۋ, اۋە كولىگى ينفراقۇرىلىمىن جاڭعىرتۋ باعىتىندا اتقارىلىپ جاتقان جۇمىستار جونىندە باياندادى.
كوميتەت توراعاسى تالعات لاستاەۆ كەلتىرگەن دەرەكتەر بويىنشا, يكاو-نىڭ ۇيلەستىرىلگەن ۆاليداتسيالىق ميسسياسى شەڭبەرىندە حالىقارالىق اۋديتورلاردىڭ تاۋەلسىز تەكسەرۋى قورىتىندىسىندا قازاقستان ۇشۋ قاۋىپسىزدىگىن قامتاماسىز ەتۋ دەڭگەيىن 84%-عا دەيىن كوتەردى. بۇل – ورتاشا الەمدىك كورسەتكىشتەن 15%-عا جوعارى.
زاڭنامالىق جۇمىستار شەڭبەرىندە ۇشقىشسىز ۇشاتىن اپپاراتتاردى پايدالانۋدى رەتتەۋ نورماسىن, اتاپ ايتقاندا, سەرتيفيكاتتاۋ ءراسىمىن ەنگىزۋ, قاشىقتان سايكەستەندىرۋگە قويىلاتىن تالاپتاردى بەلگىلەۋ جانە ولاردى پايدالاناتىن ايماقتاردى ايقىنداۋ قاراستىرىلۋدا.
سونداي-اق اۋە كومپانيالارىنا ۇشۋعا شەكتەۋ قويىلاتىن ادامداردىڭ جەكە ءتىزىمىن جاساۋعا مۇمكىندىك بەرەتىن نورما ەنگىزىلمەك. وعان ۇشاقتا ءتارتىپ بۇزعان جانە ونىسى زاڭمەن دالەلدەنگەن ادامدار عانا ەنۋگە ءتيىس.
ەلىمىزدە اۋە كولىگى ينفراقۇرىلىمىن جاڭعىرتۋ اياسىندا قازىر 6 نىساندا جۇمىستار ءجۇرىپ جاتىر. ولار – شىمكەنت اۋەجايىنىڭ جاڭا تەرمينالىنىڭ قۇرىلىسى, ورال اۋەجايىنىڭ تەرمينالىن, قوستاناي اۋەجايىنىڭ اەروۆوكزال كەشەنىن, وسكەمەن اۋەجايىنىڭ ۇشۋ-قونۋ جولاعىن, ءۇرجار جانە ءۇشارال اۋەجايلارىن جاڭعىرتۋ جوبالارى.
كەڭەستە سالانى اۋە وتىنىمەن قامتاماسىز ەتۋ, تاريفتىك ساياسات جانە ماماندارعا قاتىستى ماسەلەلەر تالقىلاندى. جىل سايىن مۇناي وڭدەۋ زاۋىتتارىنداعى جوندەۋ جۇمىستارىنا بايلانىستى اۆياوتىن تاپشىلىعى تۋىندايدى. قازىر جاعداي ءبىرشاما تۇراقتاندى, الايدا ماسەلەنى جۇيەلى شەشۋ ءۇشىن يدم قىسقا جانە ۇزاق مەرزىمدى پەرسپەكتيۆاعا ۇسىنىستار دايىنداپ, ولار ەنەرگەتيكا مينيسترلىگىمەن بىرگە پىسىقتالۋدا.
الداعى ەكى جىلدا ۇشۋ قاۋىپسىزدىگى ستاندارتتارىنا سايكەستىك دەڭگەيىن 90%-دان اسىرىپ, يكاو اۋديتىنەن ءساتتى ءوتۋ نەگىزگى مىندەت بولىپ وتىر. اقش-قا تىكەلەي رەيستەر اشۋ شەڭبەرىندە قازاقستاننىڭ اۆياتسيالىق اكىمشىلىگى مەن اقش-تىڭ كولىك قاۋىپسىزدىگى اكىمشىلىگى اراسىنداعى ىنتىماقتاستىق جالعاسادى.
سونداي-اق «قۋاتتى وڭىرلەر – ەل دامۋىنىڭ درايۆەرى» ۇلتتىق جوباسى اياسىندا الەمدەگى ەپيدەميالىق جاعدايدىڭ جاقسارۋىنا جانە ينفراقۇرىلىمدىق وبەكتىلەردىڭ جاڭعىرتىلۋىنا قاراي پاندەمياعا دەيىنگى دەڭگەيدەگى حالىقارالىق قاتىناستى قالپىنا كەلتىرۋ جۇمىستارى جالعاسادى.
