ۇزاق جىلدار بويى سەمەيدە, الماتىدا, اقتوبەدە مەكتەپتە اعىلشىن ءتىلى پانىنەن ساباق بەردىم. ەلىمىز ەگەمەندىك العان جىلدارى اتىراۋعا «تەڭىزشەۆرويل» كومپانياسىنا اۋىسىپ, اعىلشىن ءتىلىنىڭ اۋدارماشىسى بولىپ جۇمىسقا تۇردىم. وكىنەتىنىم, جولداسىمنىڭ ومىردەن ەرتە كەتكەنى. ول 1996 جىلى قايتىس بولدى.
مەن تۋعان وتانىم قازاقستاننىڭ بەيبىتشىل ەل بولعانىن انالىق جۇرەگىممەن تىلەيمىن. ەكونوميكامىز وركەندەپ, بالالارىمىزدىڭ ءبىلىمدى, ەڭبەكسۇيگىش, وتانشىل بولۋى ءۇشىن ەڭ الدىمەن ۇلكەندەر ونەگە كورسەتىپ, ولارعا باعىت-باعدار كورسەتۋ كەرەك دەگەن پىكىردەمىن. ۇلدارىم مەن كەلىندەرىمە, قىزدارىم مەن كۇيەۋ بالالارىما بالا تاربيەسىندە ءالى دە كومەكتەسەمىن.
ءوزىم اقتوبە وبلىسى قازاقستان حالقى اسسامبلەياسى جانىنداعى «انالار كەڭەسىنىڭ» مۇشەسىمىن جانە «شاتلىك» تاتار مەن باشقۇرت ەتنو-مادەني بىرلەستىگى جانىنان قۇرىلعان «اك كالفاك» كەڭەسىن دە باسقارامىن. ءبىزدىڭ بىرلەستىكتىڭ نەگىزگى ماقساتى – وتباسى قۇندىلىعىن دارىپتەۋ. بىرلەستىك مۇشەلەرى كوپتى كورگەن بىرنەشە ۇل-قىز وسىرگەن انالار. ءبىزدىڭ الدىمىزعا ومىرلىك قيىن جاعدايعا تاپ بولعان جاستار كوپ كەلەدى. ولارعا انالىق اقىل-كەڭەسىمىزدى ايتامىز, قاي كەزدە دە اسىعىس شەشىم قابىلداۋدان ساقتاندىرىپ, تۇرمىستىق قيىنشىلىقتى بايىپپەن شەشۋگە كەڭەس بەرەمىز. مىنەزدەرى جاراسپاي قالىپ اجىراسقالى جاتقان تالاي جاستى تاتۋلاستىردىق. بىرلەستىك مۇشەلەرى وقۋ جىلى باستالار الدىندا جالعىزباستى انالارعا بالالارىنىڭ وقۋ كيىمدەرى مەن مەكتەپ قۇرالدارىن الىپ بەرۋدى داستۇرگە اينالدىردى.
1 ناۋرىز – العىس ايتۋ كۇنىنە وراي ەڭ الدىمەن قازاقستاننىڭ اسپانى اشىق, بەيبىتشىلىك بولسىن دەگەن تىلەگىمدى بىلدىرەمىن. بەيبىت كۇننىڭ قادىرىن بىلەيىك, قولىمىزدان كەلگەنشە ادال ەڭبەك ەتىپ, وتانىمىزدىڭ كۇش-قۋاتىن نىعايتايىق, ساليقالى دا پاراساتتى ۇرپاق وسىرەيىك. ءاردايىم جان-جاعىمىز تىنىش بولسىن دەپ تىلەيمىن.
ءبىز پاندەميانىڭ الەمدى ءبىر ۋىسقا سىيدىرىپ جىبەرگەنىنە كۋا بولدىق. سونداي قيىن كەزەڭدە حالىق دەنساۋلىعى ءۇشىن جاندارىن شۇبەرەككە ءتۇيىپ, ءوز مىندەتتەرىن مۇلتىكسىز اتقارعان بارلىق مەديتسينا سالاسىنىڭ قىزمەتكەرلەرىنە, ۇيدە وتىرعان بالالارىمىزدىڭ ءبىلىم الۋى ءۇشىن ايانباي ەڭبەك ەتكەن مۇعالىمدەرىمىزگە العىس ايتامىن! كەز كەلگەن قيىندىقتى پاراساتتىلىعىمىزبەن, اۋىزبىرشىلىگىمىزبەن جەڭەمىز! ەلىمىز امان, جۇرتىمىز تىنىش بولسىن!
رامزيا ەسەنباەۆا,
اقتوبە وبلىسى قحا جانىنداعى «انالار كەڭەسى» توراعاسىنىڭ ورىنباسارى, «شاتلىك» تاتار مەن باشقۇرت ەمب جانىنداعى «اك كالفاك» كەڭەسىنىڭ توراعاسى
