بۇل كۇنى ءبىز وزەكتەن تەپپەي, باۋىرىنا تارتىپ, قاناتىمەن سۋ سەپكەن قارلىعاشتاي قامقورلىعىنا العانى ءۇشىن قازاق ەلىنە العىس ايتامىز. قيىن-قىستاۋ ۋاقىتتا ءبىر ءتىلىم نانىمەن ءبولىسىپ, سۇيەۋ بولعان قازاعىمىزدىڭ جەرىندە سول دوستىق, سول كەلىسىم مەن سول بەيبىتشىلىك ساقتالىپ كەلەدى. قازاق جەرى ءبىزدىڭ – وتانىمىز.
ەلىمىزدە تۇراتىن بارلىق ەتنوستار بۇل ايتۋلى كۇننىڭ ءمان-ماڭىزىن وتە جاقسى بىلەدى ءارى قۇرمەتتەيدى دەگەن سەنىمدەمىن. وزبىر ساياساتتان زوبالاڭ كورىپ, جاپا شەككەن ءتۇرلى ەتنوستار قازاق وتباسىلارىنان پانا تاپتى, قازاق ەلىنە وسىلايشا ءسىڭىسىپ كەتتى.
گەرترۋدا پلاتايستىڭ ەستەلىگىنىڭ جەلىسىمەن جازىلعان «قۇرت – اسىل تاس» وقيعاسىن بارشامىز جاقسى بىلەمىز. دارۋمەنگە باي, اشىققانعا قورەك, اش-جالاڭاش بالا-شاعا مەن تورىققان ايەلدەرگە تالشىق بولعان قازاقتىڭ ۇلتتىق تاعامى قۇرت – شىنىندا دا قاسيەتتى. مەرەكە قارساڭىندا اسسامبلەيا جاستارى قاراعاندىدا قۇرت تاراتۋ شاراسىن وتكىزىپ, وسى كۇننىڭ ماڭىزىن ءتۇسىندىردى.
مەيىرىمدىلىك, قوناقجايلىلىق – وسى كۇننىڭ سيمۆولىنا اينالدى. مەن بۇل جارقىن كۇننىڭ جاڭا ماعىناعا تولى بولعانىنا قۋانىشتىمىن. جاڭا قازاقستان – بەيبىتشىلىك پەن جاسامپازدىق ەلى! ءبىزدىڭ جاسامپاز كۇشتەرىمىز ەلدەگى بەيبىتشىلىك پەن كەلىسىمدى ودان ءارى نىعايتۋعا, يگى ىستەرىمىزگە باعىتتالعان. بەيبىت كۇننىڭ باتىرلارىنا اينالعان قۇتقارۋشىلارعا, جاس ساربازدارعا, اق حالاتتى ابزال جاندار – دارىگەرلەرگە العىس رەتىندە سىي-قۇرمەتىمىزدى كورسەتتىك. جاقسىلىقتى باعالاي ءبىلىپ, وعان جاقسىلىقپەن جاۋاپ قايتارۋ ءوزارا سىيلاستىق پەن قۇرمەتكە باستايدى. قۇندىلىقتاردىڭ قادىرىنە جەتە العان ەلدىڭ كەلەشەگى زور.
وسى ورايدا «ۆايناح» چەشەن-ينگۋش ەتنومادەني بىرلەستىگىنىڭ اتالعان مەرەكە قارساڭىندا 2 ملن تەڭگەنى قۇراعان قايىرىمدىلىق ءىس-شاراسىن ۇيىمداستىرعانىن ايتا كەتكىم كەلەدى. وسىلايشا, ءبىز كوپبالالى انالارعا, مۇقتاج وتباسىلارعا قولداۋ كورسەتتىك. البەتتە, يگى ىستەر كوپ بولسىن! تۋعان جەر – ول انا! ول ءبارىمىزدى ءوزىنىڭ جىلۋىمەن جانە نۇرىمەن ءوسىردى. ءبىز ونىڭ ريزاشىلىعىنا بولەنىپ, قازاقستان جەرىنە بەيبىتشىلىك پەن اماندىق تىلەيمىز!
ۋۆايس دجاناەۆ,
قاراعاندى وبلىستىق «ۆايناح» چەشەن-ينگۋش
ەتنومادەني بىرلەستىگىنىڭ توراعاسى
قاراعاندى
