وسىعان بايلانىستى ءبىز دە جۇمىس بەرۋشىلەر مەن جۇمىسشىلاردىڭ اراقاتىناسىن رەتتەپ وتىراتىن كاسىپوداق قۇرۋ تالابىن باستاعانبىز. بىراق سىر بويىندا مۇناي وندىرەتىن «كازپەترولگرۋپپ» كومپانياسى باسشىلىعى ءبىزدىڭ بۇل تالابىمىزدى تەرىس كوردى. قۇپتاماعانى بىلاي تۇرسىن, سول ءۇشىن جۇمىسىمىزدان بوساتىلدىق. دەگەنمەن, العان بەتىمىزدەن تايمادىق. ەڭ باستىسى – ادىلدىكتىڭ جەڭەرىنە سەندىك. وبلىستىق كاسىپوداقتار ورتالىعىنا, ەڭبەك سالاسىنداعى باقىلاۋ باسقارماسىنا جۇگىنىپ, قالالىق سوت شەشىمى ارقىلى جۇمىسىمىزعا قايتا ورالدىق.
باقانداي ءتورت اي بويى ءبىزدى سارساڭعا سالعان ماسەلە بىلتىرعى جىلدىڭ قىركۇيەك ايىنان باستالعان ەدى. «كازپەترولگرۋپپ» مۇناي كومپانياسىندا جۇمىس ىستەيتىن ءبىر توپ جۇمىسشى ءوزارا اقىلداسا كەلىپ, كاسىپوداق ۇيىمىن قۇرۋدى ءجون دەپ تاپقانبىز. بىراق, بۇل ويىمىزدى باسشىلىق قۇپتاي قويعان جوق. كەرىسىنشە, ءتۇرلى جولمەن قاتارىمىزدى سيرەتۋگە تىرىسىپ باقتى. ول ويلاعاندارى ىسكە دە اسىپ جاتتى. تەك 12 جۇمىسشى عانا باستاپقى ويىمىزدان اينىماي, «قىزىلوردا وبلىسى كاسىپوداق ورتالىعى» ارقىلى كەڭەستەر الدىق. بىراق جۇمىس بەرۋشى مەن جۇمىسشى اراسىنداعى قارىم-قاتىناستى رەتتەيتىن ۇيىم قۇرۋعا كىرىسكەنىمىزگە اي تولماي جاتىپ بىزبەن كومپانيا اراسىندا جاسالعان كەلىسىم-شارت بۇزىلدى. مىنا زاماندا جۇمىسسىز قالۋ كىمگە دە وڭاي ەمەس. ماسەلەنى زاڭدى جولمەن شەشۋ ءۇشىن «قىزىلوردا وبلىسى كاسىپوداق ورتالىعىنان», ەڭبەك سالاسىنداعى باقىلاۋ باسقارماسىنان قۇقىقتىق كومەك سۇرادىق. ولار از ۋاقىتتىڭ ىشىندە ماسەلەنى زەرتتەپ, قۇقىعىمىزدى قورعاۋعا بەلسەنە ارالاستى. كاسىپوداق ورتالىعىنىڭ باستاماسىمەن ماسەلەمىز الەۋمەتتىك ارىپتەستىك جونىندەگى وبلىستىق ۇشجاقتى كوميسسيانىڭ قاراۋىنا شىعارىلىپ, كاسىپوداق الاڭىندا بىرنەشە رەت تالقىلاندى.
جاسىراتىنى جوق, كوتەرگەن باستاماڭنىڭ دۇرىستىعىن دالەلدەي الماي جىگەرىڭ – قۇمعا, ىنتاڭ – ۇنعا اينالاتىن كەزدەر دە بولادى. وسىندايدا ءتيىستى ورىندارعا جۇگىنەسىڭ. بۇل رەتتە قالالىق سوتتىڭ جۇمىس بەرۋشىنىڭ بىزبەن ەڭبەك شارتىن بۇزۋ ارەكەتىن زاڭسىز دەپ تانىعانى ءبىزدىڭ تالابىمىزدىڭ دۇرىستىعىن دالەلدەي ءتۇستى. سوتتا بىزبەن ەڭبەك شارتى بۇزىلعاندا ەڭبەك كودەكسىنەن 2020 جىلعى 4 مامىردا الىنىپ تاستالعان 50-باپتىڭ 3-تارماعى نەگىزگە الىنۋى زاڭسىز ەكەندىگى انىقتالدى. سۋديا مەرۋەرت توعىزباەۆاعا ءىستى ءادىل قاراپ, ءبىزدىڭ جۇمىسىمىزعا قايتا تۇرۋ, ءماجبۇرلى بوس جۇرگەن ۋاقىتىمىزعا جالاقى تولەۋ تۋرالى ارىزىمىزدى قاناعاتتاندىرعانى ءۇشىن العىس ايتامىز.
بۇل سوت ءىسى كاسىپوداقتار فەدەراتسياسىنىڭ ەرەكشە نازارىندا بولدى. «قىزىلوردا وبلىسى كاسىپوداق ورتالىعى» اۋماقتىق كاسىپوداقتار بىرلەستىگى توراعاسى ماقسۇت نالىباەۆ, ونىڭ ورىنباسارى مارات بايىمبەتوۆ, وسى ورتالىق وكىلى مايرا بورانباەۆا قيىن ساتتە قاسىمىزدان تابىلدى.
سونىمەن ادىلدىك جەڭدى. سوت شەشىمىمەن جۇمىسىمىزعا قايتا ورنالاستىق. اقپاننىڭ جيىرما ءبىرى كۇنى «ۆاحتاعا» اتتانىپ كەتتىك. كاسىپوداق ۇيىمىن قۇرۋ تۋرالى ويىمىزدان ءالى اينىعانىمىز جوق. ۇجىمداعى جاعدايدى كاسىپوداقتار فەدەراتسياسىنىڭ باقىلاۋىندا ۇستايتىن بولدى. وسى ورايدا ءبىزدىڭ قۇقىعىمىزدى قورعاۋعا كومەك بەرگەن ازاماتتاردىڭ بارلىعىنا العىس ايتۋ كۇنى ءوزىمىزدىڭ ريزاشىلىعىمىزدى جەتكىزگىمىز كەلەدى.
ازامات قالجانوۆ,
«كازپەترولگرۋپپ» كومپانياسىنىڭ مۇنايدى دايىنداۋ جانە ايداۋ وپەراتورى
