بۇگىندە كوكشەتاۋ قالاسىندا وقىپ جۇرگەنىممەن, بۇيرەگىم ەلگە بۇرىپ تۇرادى. ءبىزدىڭ ەل زەرلى زەرەندىنىڭ كوركەم ءبىر پۇشپاعى, ۇياداي عانا ۇيالى اۋىلى. تابيعاتى قانداي تاماشا, اقكوڭىل اڭقىلداعان ادامدارى شە؟! زايىرى ادام كوڭىلى, ونىڭ كىرشىكسىز اپپاق نيەتى تۋعان جەرىنىڭ تابيعاتىمەن باۋىرلاسىپ جاتقانداي.
انام اۋەل باستا قازاق تىلىنە ءسال شورقاقتاۋ بولىپتى. جەرگىلىكتى ۇلتتىڭ ءتىلىن جەتىك بىلمەگەن سوڭ اۋىلدىڭ ادامدارىمەن توننىڭ ىشكى باۋىنداي ارالاسىپ, سىرلاسىپ كەتۋگە دە ءسال-ءپال تارتىنىپ تۇرادى ەكەن. اقكوڭىلدى اۋىل ادامدارى بولسا, انامدى جاتىرقاماي, جاتسىنباي باۋىرىنا تارتقان. قىزدار تىككەن كەستەدەي قۇلپىرىپ تۇراتىن كوركەم ءتىلدى عانا ەمەس, سان عاسىر بويى جالعاسىپ كەلە جاتقان, ءار مەزەرەتىنە سىر بۇككەن, ۇلاعاتىن ۇقساڭ يشاراسى مول ادەت-عۇرىپ, سالت-ءداستۇردى دە ۇيرەتكەن. ءبىر ايتا كەتەرلىگى, جالپاق جۇرت جان داۋاسىنا بالاعان وسى سالت-ءداستۇردىڭ كەز كەلگەنى كەمەل كىسىلىككە, اسقاق ادامگەرشىلىككە, پايىمدى پاراساتقا ۇندەيدى. بالكىم قازاقى ورتانىڭ يبالى دا يماندى بولارى وسىدان شىعار. ءتالىمدى تاربيەنىڭ ۋىزى دا, قوينىنا جاسىرعان قازىناسى دا وسى جەردە. جالپى مەنىڭ پايىمداۋىمشا, ەلىن, جەرىن ەلجىرەي سۇيەر ەلجاندىلىق سەزىم ءتىل ارقىلى قالىپتاسادى. ءتىلدى تەرەڭ بىلمەگەن ادام ۇلتىن ءسۇيۋى, ونىڭ جوعىن جوقتاپ, مۇڭىن مۇڭداۋى نەعايبىل كورىنەتىنى بار. سوندىقتان قازىر جاستاردىڭ, جەرگىلىكتى ۇلتتىڭ عانا ەمەس, وزگە ەتنوس وكىلدەرىنىڭ جاس بۋىنىن تاربيەلەۋىمىز كەرەك. ءتىلدى تەرەڭ مەڭگەرسە, وسى ەلدىڭ وركەندەۋىنە ورتان قولداي ازاماتى بولىپ ءوز ۇلەسىن قوسار ەدى.
كىشكەنتاي كەزىمنەن باستاپ اۋىلداعى قۇربىلارىممەن تاي-ق ۇلىنداي تەبىسىپ ءوستىم. انا ءتىلىم قازاق ءتىلى بولدى. ۇيالىداعى بەسىنشى سىنىپتى بىتىرەر كەزدە مەكتەبىمىز ورتەنىپ كەتتى. سودان سوڭ اقادىر اۋىلىندا ورتا مەكتەپتى ءبىتىردىم. سول ءبىلىم وشاعىنداعى ۇلاعاتتى ۇستازدارىم ءاليا بەكەنوۆا, گۇلميرا بورانشينالار تۇڭعيىق ءتىل ءبىلىمىنىڭ تەرەڭىنە سۇڭگىتتى. مەكتەپتە وقىپ جۇرگەندە وزگە ءتىل وكىلدەرى اراسىندا وتكىزىلەتىن سايىستارعا قاتىسىپ, ءبىلىم وشاعىنىڭ مەرەيىن ۇستەم ەتۋگە ۇلەس قوستىق.
كەيدە كوشەدە قۇربىلارىممەن قازاق تىلىندە سويلەسىپ كەلە جاتسام, نازار اۋدارىپ, تاڭىرقايتىن دا ادامدار كەزدەسەدى. ونىڭ ەشبىر ەرەكشەلىگى جوق. ءبىز وسى جەردە تۋىپ, وسى ەلدە وسكەننەن كەيىن بار ىرىزدىعى مەن ىقىلاسىن اياماي تارتۋ ەتىپ وتىرعان تۋعان ەلىمىزدىڭ ءتىلىن بىلۋگە مىندەتتىمىز.
قازىر كوكشەتاۋ قالاسىنداعى ش.ءۋاليحانوۆ اتىنداعى ۋنيۆەرسيەتتىڭ قازاق ءتىلى مەن ادەبيەتى فاكۋلتەتىندە ەكىنشى كۋرستا وقيمىن. جوعارى وقۋ ورنىندا سۇلۋشاش كاكەنقىزى, ءلايىس مۋسين, يباگۇل سۇلەيمەنوۆا ءتارىزدى بىلىكتى ۇستازدار ءدارىس وقيدى. وبلىس ورتالىعىندا اسسامبلەيانىڭ جانىنان قازاق ءتىلى كابينەتىن اشتىم, بۇل جەردە «ەرەكشە سويلە» كۋرسى بار. ءتىل يگەرۋ ءۇشىن كەلەتىن وزگە ەتنوس وكىلدەرى وتە كوپ. قازاق جاستارى دا از ەمەس. كەيبىرەۋلەر وسى ءبىر كورىنىستى قاتە تۇسىنەتىن دە جايت كەزدەسەدى. ولار كىنالى ەمەس قوي, قايتا انا ءتىلىمىزدى ۇيرەنەمىز دەپ ۇمتىلعاندارىنىڭ ءوزى قۇپتارلىق شارۋا ەمەس پە؟
بۇگىندە الدىمنان كەڭ جول اشقان, بولاشاعىمدى ايقىنداعان قۇربىلارىم عانا ەمەس, ءتىل بىلگەنىم ءۇشىن قۇرمەتتەيتىن اعا بۋىننىڭ ىقىلاسىنا بولەنگەندىكتەن سول بيىككە كوتەرگەن ءوز ەلىمە پەرزەنتتىك العىسىمدى ايتقىم كەلەدى.
ميلانا تاراسوۆا,
«اسسامبلەيا جاستارى» رقب وكىلدىگىنىڭ مۇشەسى
اقمولا وبلىسى
