قازاق حالقى كەشەگى قيىن-قىستاۋ زاماندا وزگە ەتنوس وكىلدەرىنىڭ باسىنا تۇسكەن اۋىرتپالىقتى قايىسپاي بىرگە كوتەرە ءبىلدى. بۇل بۇگىنگى تاڭدا ەلىمىزدەگى ءتۇرلى ەتنوس وكىلدەرىنىڭ اراسىندا ادامگەرشىلىك قارىم-قاتىناستىڭ ونەگەلى ولشەمىنە اينالدى. ءبۇتىن نانىن ءبولىپ بەرىپ, ءۇيىنىڭ ءتورىن ۇسىندى. ەشكىمدى دە وزگە دەپ وگەيسىنبەي, باۋىرىنا باسقان بولاتىن. سوندىقتان دا ءبىز, وزگە ەتنوس وكىلدەرى قازاق حالقىنا العىسىمىزدى ايتامىز. قازاق حالقىنىڭ جەرى قانداي كەڭ بولسا, پەيىلى دە سونداي دارحان.
بۇگىندە بۇكىل الەمنىڭ قازاقستاننان ۇلگى الۋىنا بولادى. سەبەبى دوستىعى مەن بىرلىگى مىقتى ەل قاشاندا دارالانىپ تۇرادى. قازاقستان جەرىندە ءومىر ءسۇرىپ جاتقانىن ماقتان تۇتاتىن ەتنوستىڭ ءبىرى – بىزدەر. بۇل مەرەكەنى تويلاۋ بارىسىندا وسكەلەڭ ۇرپاعىمىزعا دوستىق, ءبىر-بىرىنە دەگەن قۇرمەت پەن سىيلاستىق ەلىمىزدىڭ باستى بايلىعى ەكەنىن ۇعىندىرۋ كەرەك. ادامزات بالاسىن ءوزارا جاقىنداستىراتىن قۇندى قاسيەت – ونىڭ ادامگەرشىلىگى. ادامگەرشىلىگى مىقتى جاننىڭ اركەزدە دە وزگەلەرگە كومەكتەسىپ, العىس الاتىنى انىق. ءبىز العىس ايتۋ ارقىلى ارامىزداعى دوستىقتى نىعايتا بەرەمىز دەپ ويلايمىن.
قازاقستان – مەنىڭ ءوز ەلىم. مەن ءوز ەلىمدە ەركىن ءومىر ءسۇرىپ جاتقانىم ءۇشىن قازاق حالقىنا العىس بىلدىرەمىن! سونداي-اق, مەنى بار مەيىرىمىمەن تاربيەلەگەن اتا-اناما العىس ايتامىن! باستى بايلىعىم – بالالارىما, بىرگە جۇمىس ىستەپ كەلە جاتقان ارىپتەستەرىمە دە العىس دەيمىن! جالپى, تەك العىس ايتۋ كۇنى عانا ەمەس, ءاردايىم ءبىر-بىرىمىزگە كومەكتەسىپ, ءبىر-بىرىمىزگە العىس ايتىپ, العىسقا بولەنىپ جۇرەيىك دەپ تىلەيمىن!
دينارا نۇراليەۆا,
تاراز قالاسىنداعى №34 مەكتەپتىڭ ديرەكتورى, «ۆىنحۋا» دۇڭگەن ەتنومادەني بىرلەستىگىنىڭ بەلسەندى مۇشەسى
جامبىل وبلىسى
