نۇر-Cۇلتان قالاسىنا ءىسساپارى اياسىندا اكادەميانىڭ جاڭا عيماراتىنا ارنايى كەلگەن تۇركسوي باس حاتشىسى د. قاسەيىنوۆ تۇركى مۋزەيى مەن كىتاپحاناسىن جانە اكىمشىلىك كەڭسەسىن ارالاپ كوردى. باسقوسۋعا سونداي-اق اكادەميانىڭ ۆيتسە-پرەزيدەنتى فيزۋلي مادجيدلي مەن قىزمەتكەرلەرى قاتىستى.
كەزدەسۋ بارىسىندا تاراپتار ەكى ۇيىمنىڭ كۇن تارتىبىندەگى ماڭىزدى جوبالاردى تالقىلاپ, بىرلەسكەن ءىس-شارالار جونىندە پىكىر الماستى.
اكادەميا پرەزيدەنتى د. قىدىرالى د.قاسەينوۆتىڭ تۇركسوي ۇيىمىن باسقارعان كەزىندە جەمىستى قىزمەت ەتىپ, تۇركى الەمىندەگى مادەني بايلانىستاردى تەرەڭدەتۋ مەن دامىتۋ ماقساتىندا ماڭىزدى جوبالاردى جۇزەگە اسىرعانىن ايتتى.
ءوز كەزەگىندە باس حاتشى د. قاسەيىنوۆ حالىقارالىق تۇركى اكادەمياسىنىڭ جاڭا عيماراتىمەن قۇتتىقتاپ, ۇيىمنىڭ تۇركى الەمىنىڭ عىلىمي ينتەگراتسياسى باعىتىنداعى جۇمىسىن جوعارى باعالادى. سونىمەن قاتار, اكادەميانىڭ الداعى جۇمىسىنا ساتتىلىك تىلەپ, تۇركسوي باسىپ شىعارعان كىتاپتاردى سىيعا تارتتى.
كەزدەسۋ اياسىندا ا. بايتۇرسىن ۇلى مەن م.اۋەزوۆتىڭ مەرەيتويلارىن جوعارى دەڭگەيدە ۇيىمداستىرۋ ماقساتىندا ورتاق جوبالاردى جۇزەگە اسىرۋ جانە باسقا دا سالالاردا بىرلەسكەن ءىس-شارالار ۇيىمداستىرۋ تۋرالى شەشىم قابىلداندى.
سونىمەن قاتار اكادەميا باسشىسى د. قىدىرالى باس حاتشى د. قاسەيىنوۆتى نيزامي گانجاۋي مەن الىشەر ناۋاي مەرەيتويى جىلدارى اياسىنداعى جەمىستى ەڭبەگى, سونداي-اق تۇركى دۇنيەسىنىڭ مادەني-ادەبي بايلانىستارىن نىعايتۋعا قوسقان زور ۇلەسى ءۇشىن حالىقارالىق تۇركى اكادەمياسىنىڭ «الىشەر ناۋاي» التىن مەدالىمەن ماراپاتتادى.
كەزدەسۋ سوڭىندا د. قىدىرالى مارتەبەلى مەيمانعا ريزاشىلىعىن ءبىلدىرىپ, اكادەميانىڭ باعالى باسىلىمدارىن تارتۋ ەتتى.
