ءبىزدىڭ قوعام ءسۋيتسيدتىڭ رۋحاني دەرت ەكەنىن باياعىدا-اق مويىنداعان. بۇگىندە ولىمگە اسىققان بوركەمىك بۋىننىڭ تاعدىرى مامانداردى عانا ەمەس, كوپشىلىكتى دە الاڭداتىپ وتىر. بۇل دەرتتىڭ سەبەبى كوپ. ال بارلىق سەبەپتىڭ استارىندا جاسوسپىرىمدەردىڭ رۋحاني «مۇگەدەكتىگىمەن» قاتار, جۇرەكتەرىندەگى تىنىشسىزدىعى جاتىر. جان-جاقتان اعىلعان قاجەتتى-قاجەتسىز اقپاراتتار, وزگەشە ءبىر الەم ىزدەگەن جاستاردىڭ مورالدىق-پسيحولوگيالىق تۇرعىدان قولداۋ تاپپاۋى – وسىنىڭ بارلىعى قۇردىمعا قاراي يتەرمەلەيدى. ماسەلەن, پسيحولوگ سۆەتلانا بوگاتىرەۆا: «جاستار مەن جاسوسپىرىمدەردىڭ ءوز وزىنە قول جۇمساۋ سەبەپتەرى تۋرالى سويلەسكەندە كوپ ادام وتباسىنىڭ الەۋمەتتىك جاعدايىن تالداۋعا تىرىسادى, باقىتسىز ماحاببات, اتا-انالارمەن قاقتىعىس تۋرالى ايتادى. بىراق بۇل ءسۋيتسيدتىڭ باستى سەبەپتەرى ەمەس, ولار تەك ىسكە قوسۋ مەحانيزمدەرى. ەڭ باستى سەبەپتىڭ ءبىرى – بالانىڭ پسيحيكالىق دەنساۋلىعى», دەيدى.
جاستىقتىڭ ەڭ شۋاقتى, الاڭسىز ءارى قىزىق پەن قۋانىشقا تولى شاعىندا نەگە جەتكىنشەك ءومىر سۇرۋگە ەمەس, اجالعا اسىعادى؟ ءومىردىڭ ءمانىن, جارىق دۇنيەنىڭ قادىرىن جەتە تۇسىنبەي جاتىپ, جابىعۋ مەن جالعىزسىراۋدىڭ قامىتىن كيۋىنىڭ سەبەبى نەدە؟ جىل سايىن وسى تەكتەس سۇراقتار ءتۇرلى جيىنداردا تالقىلانىپ جاتادى. جاستار اراسىنداعى ءسۋيتسيدتىڭ الىن الۋ بويىنشا جاسالىپ جاتقان ءىس-شارالار دا, ازىرلەنگەن جوبالار مەن قابىلدانعان باعدارلامالار دا جەتىپ ارتىلادى. بىراق كۇيزەلىستەن ارىلا الماي, اقىر سوڭى قىرشىننان قيىلىپ جاتقان جەتكىنشەكتەر سانى ازايار ەمەس. نەگە؟
ءدىن وكىلدەرى ءسۋيتسيدتى «اللادان الىستاعان ادامداردىڭ اۋرۋى» دەيدى. سەبەبى, ولار جاراتۋشىنىڭ قورعاۋىندا بولماعان ادامعا ازعىرۋشى شايتان ويىنداعىسىن ورىنداتادى دەپ سانايدى. ال پسيحولوگتەر جاقىندارىنان جىلىلىق سەزىنىپ, قولداۋ تاپپاعان جەتكىنشەك قانا ومىرلىك قيىندىققا توتەپ بەرە الماي, مورت سىناتىنىن ايتادى. ويتكەنى كەز كەلگەن پسيحيكالىق كۇيزەلىستىڭ سالدارى تراۆماتيكالىق بولۋى, ال ونىڭ ارتى قايعىلى جاعدايعا اكەپ سوعۋى مۇمكىن. سول سەبەپتى دە ماماندار ەڭ الدىمەن جاقىن ادامدار ءبىر-ءبىرىنىڭ جان دۇنيەسىنە ءۇڭىلىپ, قايعىسى مەن قۋانىشىن ءبولىسىپ وتىرۋى قاجەت دەگەندى ءجيى تىلگە تيەك ەتەدى. سوندا عانا جاستار اراسىنداعى جابىعۋ مەن جالعىزسىراۋدىڭ الدىن الار ەدىك دەگەن تۇجىرىم جاسايدى.
وتكەن جىلدان بەرى ەل كولەمىندە «جاستار اراسىندا ءسۋيتسيدتىڭ الدىن الۋ جونىندەگى شارالار كەشەنىن ازىرلەۋ جانە ىسكە اسىرۋ» رەسپۋبليكالىق جوباسى ىسكە اسىرىلىپ كەلەدى. اقپارات جانە قوعامدىق دامۋ مينيسترلىگىنىڭ تاپسىرىسى بويىنشا قازاقستاننىڭ تەڭ قۇقىق پەن تەڭ مۇمكىندىك ينستيتۋتى جانە ازاماتتىق باستامالاردى قولداۋ ورتالىعىنىڭ ۇيىتقى بولۋىمەن قولعا الىنعان اۋقىمدى جوبانىڭ كوزدەگەنى – سۋيتسيد تۋرالى ەڭ الدىمەن اتا-انالاردىڭ ويلارى مەن كوزقاراسىن وزگەرتۋ. نەگە جاستاردىڭ ءوزى ەمەس؟ نەلىكتەن اتا-انا؟ كاسىبي پسيحولوگتەر بۇل سۇراققا جاۋاپ بەرۋ كەزىندە مىنانداي دەرەكتەردى العا تارتادى. ەلىمىزدە جاستار اراسىندا تىركەلەتىن ءاربىر ءۇشىنشى سۋيتسيدكە جەتكىنشەك پەن اتا-انا اراسىنداعى ۇرىس-كەرىس پەن داۋ-داماي تۇرتكى بولادى ەكەن. سونداي-اق جالعىزدىق سەزىمى – 12, دوستارمەن قارىم-قاتىناستىڭ ءۇزىلۋى – 10, وقۋ ورنىنداعى قاقتىعىستار, قولايسىز قارجىلىق جاعداي 3 پايىزدى قۇراعان.
جوبا شەڭبەرىندە 14 وبلىس پەن رەسپۋبليكالىق ماڭىزى بار 3 قالادا 200-دەن استام ماماننىڭ قاتىسۋىمەن مىڭنان استام اتا-انا مەن قامقورشىعا ترەنينگتەر وتكىزىلىپ, «قيىن قادامعا بارعان جاسوسپىرىمدەرگە قالاي كومەكتەسۋگە بولادى؟ سۋيتسيدتىك مىنەز-ق ۇلىقتىڭ سەبەپتەرى مەن بەلگىلەرى قانداي؟ كۇندەلىكتى ومىردە سۋيتسيد تۋرالى ءجيى بەتپە-بەت كەلەتىن اقپاراتتاردىڭ اق-قاراسىن قالاي اجىراتۋعا بولادى؟» دەگەن سۇراقتار بويىنشا اڭگىمەلەسۋلەر ۇيىمداستىرىلعان. ەلىمىزدىڭ ءار وڭىرىندە وتكىزىلگەن وسىنداي ءىس-شارالاردان كەيىن كاسىبي ماماندار كۋرس تىڭداۋشىلارى ءۇشىن ءسۋيتسيدتىڭ وتە اۋىر تاقىرىپ بولعانىن مويىنداپ وتىر.
وسىنداي ترەنينگتەردىڭ بىرىندە ءوز وزىنە قول جۇمساماق بولعان جەتكىنشەكتىڭ اناسى پسيحولوگتەن «بالامنىڭ بويىندا بۇل دەرت ەندى ماڭگى قالا ما؟» دەپ سۇراپتى. س.بوگاتىرەۆا قوعامدا سۋيتسيدكە قاتىستى كەڭ تارالعان ءميفتىڭ ءبىرى وسى دەيدى. پسيحولوگتىڭ ايتۋىنشا, سۋيتسيد جاساۋعا تىرىسۋ – بۇل كومەككە شاقىرۋ دەگەن ءسوز. دەمەك, ەڭ ءبىرىنشى اتا-انا ۇل-قىزىنىڭ جان دۇنيەسىن تۇسىنۋگە بارىنشا تىرىسۋى قاجەت. ويتكەنى ىنتىماعى جاراسقان, ءبىر-بىرىنە دەگەن جىلىلىعى مەن مەيىرىمى ورتايماعان وتباسىندا دۇنيەگە كەلىپ, اتا-انا ماحابباتىنا مالىنىپ وسكەن جاس اجالعا ەمەس, العا قاراي ۇمتىلارى انىق. ءومىر كورمەي جاتىپ اجالعا اسىققان جاستار ەڭ الدىمەن جاقىنىنىڭ جىلىلىعىنا, جۇرەگىنىڭ يمانىنا ءزارۋ سەبەبى.
