مەملەكەت باسشىسىنىڭ ايتۋىنشا, بۇگىنگى كەزدەسۋ گەوساياسي احۋالدىڭ وتە قاتتى ۋشىعىپ تۇرعان كەزىندە ءوتىپ جاتىر.
ء«بىزدىڭ ەكونوميكالىق وداعىمىز بەلگىلى سەبەپتەرگە بايلانىستى سانكتسيالىق قارسىلىقتاردىڭ سالدارىنان تۋىندايتىن ساياسي تەكەتىرەستەردىڭ كۇشەيۋىنە جانە ونىڭ ەلدەرىمىزدىڭ ەكونوميكاسى مەن قارجى جۇيەسىنە كەرى اسەرىنە الاڭداۋشىلىق بىلدىرەدى. ۆاليۋتا باعامىنا, تولەم جۇيەسىنە, ەكىنشى دەڭگەيلى بانكتەرگە قاتىستى تاۋەكەل-قاتەرلەر كۇشەيە ءتۇستى. ءبىز قازاقستاندا داعدارىسقا قارسى شارالار قابىلداپ جاتىرمىز. بۇل تەك باسى عانا, الدا وتە كۇردەلى جۇمىستار تۇر. بۇل جۇمىستاردى ەۋرازيالىق ەكونوميكالىق وداق اياسىنداعى ارىپتەستەرىمىزبەن كەلىسە وتىرىپ جۇرگىزەمىز دەپ ويلايمىن. ەكونوميكالىق, قارجىلىق جانە ونەركاسىپتىك جۇيەلەردەگى تىعىز ىقپالداستىقتى ەسكەرە وتىرىپ, تاۋەكەل-قاتەرلەردى باعالاۋعا جانە جاعدايدىڭ كەرى اسەرىن تومەندەتۋگە باعىتتالعان ەكونوميكالىق شارالاردى ازىرلەۋ ءۇشىن جۇمىس توبىن قۇرۋ كەرەك», دەدى پرەزيدەنت.
قاسىم-جومارت توقاەۆ قارجى رەتتەۋشىلەرىن قاتىستىرا وتىرىپ, ەكونوميكالىق ۆەدومستۆولار دەڭگەيىندەگى اتالعان جۇمىس توبىن ۇيىمداستىرۋدى ۇسىندى. ۇيلەستىرۋ جۇمىستارىن ەۋرازيالىق ەكونوميكالىق كوميسسيا ءوز قولىنا الۋعا ءتيىس. ونىڭ پىكىرىنشە, سىرتقى ماكروورتاداعى كۇردەلى جاعدايعا قاراماستان, ەۋرازيالىق ەكونوميكالىق وداقتىڭ ەكونوميكالىق كورسەتكىشتەرى وڭ قارقىن كورسەتۋدە.
«2021 جىلدىڭ قورىتىندىسى بويىنشا وداقتىڭ سىرتقى ساۋداسى 34 پايىزدان استى, ال ىشكى ساۋدا كولەمىنىڭ كورسەتكىشى ودان دا جوعارى, ياعني 67 پايىزعا جەتتى. بۇل – ەۋرازيالىق وداقتىڭ ىشكى ساۋدا-ەكونوميكالىق بايلانىستارىنىڭ نىعايعانىن بىلدىرەتىن جاقسى كورسەتكىش. ىشكى جالپى ءونىمنىڭ جيىنتىق ءوسىمى – 4,4 پايىز. بۇل بولجانعان كورسەتكىشتەن ەداۋىر جوعارى. ءوزارا ساۋدا-ساتتىقتى كەڭەيتۋ, ەكونوميكا سالالارىنداعى باسەكەگە قابىلەتتىلىكتى ارتتىرۋ جونىندەگى باعىتىمىزدىڭ دۇرىس ەكەنىنە قۋانىشتىمىن», دەدى مەملەكەت باسشىسى.
قاسىم-جومارت توقاەۆ ەۋرازيالىق ۇكىمەتارالىق كەڭەستىڭ كۇن ءتارتىبى وتە تىعىز ەكەنىن اتاپ ءوتتى. ونىڭ پىكىرىنشە, بارلىق ماسەلە, سونىڭ ىشىندە وتە وزەكتى پروبلەمالار جەمىستى ءارى تابىستى تالقىلاندى.
كەزدەسۋ بارىسىندا ەۋرازيالىق ەكونوميكالىق وداققا مۇشە مەملەكەتتەر ۇكىمەتتەرىنىڭ باسشىلارى ەۋرازيالىق ينتەگراتسيانىڭ قازىرگى جانە پەرسپەكتيۆتى ماسەلەلەرى جونىندە پىكىر الماستى.
پرەمەر-مينيسترلەردىڭ ءسوزىن تىڭداعان قازاقستان پرەزيدەنتى سوڭعى وقيعالارعا بايلانىستى اۋقىمدى جۇمىستار اتقارۋ كەرەك ەكەنىن اتاپ ءوتتى.
«ەلدەرىمىزدىڭ ۇكىمەتتەرى اسا كۇردەلى پروبلەمالاردى شەشۋدىڭ ءتيىمدى جولدارىن تابۋعا ءتيىس. بۇل وتە ماڭىزدى. ەۋرازيالىق ەكونوميكالىق وداقتىڭ جۇمىسىنان زور ناتيجە كۇتەمىز. ءبىز بار كۇش-جىگەرىمىزبەن جانە ەڭبەگىمىزبەن مەملەكەتتەرىمىزدىڭ ستراتەگيالىق مۇددەلەرىنە ساي كەلەتىن ەۋرازيالىق ەكونوميكالىق وداقتىڭ ابىرويى مەن بەدەلىن ساقتاۋىمىز قاجەت. شىن مانىندە, ازاماتتارىمىز بۇل وداقتان ناقتى ناتيجەلەر كۇتەدى», دەدى قاسىم-جومارت توقاەۆ.
كەزدەسۋ سوڭىندا قازاقستان پرەزيدەنتى ۇكىمەتتەر باسشىلارىنا ورتاق ماقساتتار مەن مىندەتتەردى جۇزەگە اسىرۋ ىسىندە تابىس تىلەدى.
