مەرەيتويدىڭ سالتاناتتى اشىلۋ ءراسىمى «الاش قايراتكەرلەرى» ەسكەرتكىشىنە گۇل شوقتارىن قويىپ, ۇلت قايراتكەرىنە قۇرمەت كورسەتۋدەن باستالدى.
ق. قۋانىشباەۆ اتىنداعى مەملەكەتتىك اكادەميالىق قازاق مۋزىكالىق-دراما تەاترىندا «احمەت بايتۇرسىن ۇلى – الاشتىڭ رۋحاني كوسەمى» اتتى حالىقارالىق عىلىمي-تاجىريبەلىك كونفەرەنتسيا ءوتتى. وعان قازاقستان رەسپۋبليكاسىنىڭ مەملەكەتتىك حاتشىسى ەرلان قارين قاتىسىپ, ءسوز سويلەدى.
– ءبىز الاش قايراتكەرلەرىنىڭ دارا جولىنان ونەگە الىپ قانا قويماي, ونى ءاردايىم باستى باعدار ەتىپ ۇستانامىز. ويتكەنى احاڭ سياقتى جاسامپاز تۇلعالاردىڭ ەڭبەگى تاۋەلسىزدىك قۇندىلىقتارىمەن تىكەلەي استاسىپ جاتىر. «ەل – بۇگىنشىل, مەنىكى – ەرتەڭ ءۇشىن» دەمەيتىن بە ەدى احاڭنىڭ ءوزى. ءبىز – سول احاڭ ءدال جەتكىزىپ ايتقان ەرتەڭدە ءومىر ءسۇرىپ جاتقان جانە ونى بولاشاققا جالعايتىن ۇرپاقپىز, – دەدى مەملەكەتتىك حاتشى.
كونفەرەنتسيادا ءسوز العان يۋنەسكو-نىڭ الماتى قالاسىنداعى كلاستەرلىك بيۋروسىنىڭ باسشىسى كريستا پيككات احمەت بايتۇرسىن ۇلىن الەمدىك دەڭگەيدەگى تۇلعا رەتىندە اتاپ ءوتتى.
جيىنعا پارلامەنت دەپۋتاتتارى, احمەت بايتۇرسىن ۇلىنىڭ 150 جىلدىق مەرەيتويىن دايىنداۋ جانە وتكىزۋ جونىندەگى مەملەكەتتىك كوميسسيا مۇشەلەرى, زيالى قاۋىم وكىلدەرى, وتاندىق جانە شەتەلدىك الاشتانۋشى, احمەتتانۋشى عالىمدار, قوعام قايراتكەرلەرى قاتىستى. عالىمدار م. قويگەلديەۆ, ا. ىسماقوۆا, ش. قۇرمانباي ۇلى, د. قامزابەك ۇلى, ا. فازىلجانوۆا جانە ناسيمي اتىنداعى ازەربايجان ۇلتتىق عىلىمي اكادەمياسى ءتىل ءبىلىمى ينستيتۋتىنىڭ دوتسەنتى ە. يبراگيموۆ بايانداما جاسادى.
«احمەت بايتۇرسىن ۇلى جانە قازاق ءتىل ءبىلىمىنىڭ ماسەلەلەرى», «احمەت بايتۇرسىن ۇلى جانە قوعامدىق-گۋمانيتارلىق عىلىمدار» تاقىرىپتارىندا وتكەن سەكتسيالىق وتىرىستاردا 20-دان استام وتاندىق جانە شەتەلدىك عالىمدار ۇلت ۇستازى تۋرالى جان-جاقتى بايانداما جاسادى.
