«ەلىمىزدە تۋبەركۋلەزدىڭ الدىن الۋ, دياگنوستيكالاۋ جانە ەمدەۋ تەگىن جۇرگىزىلەدى. قازاقستان بيۋدجەت قاراجاتى ەسەبىنەن حالىقارالىق ستاندارتتارعا سايكەس تۋبەركۋلەزدى ەرتە دياگنوستيكالاۋدىڭ, ەمدەۋدىڭ جانە الدىن الۋدىڭ ەڭ زاماناۋي ادىستەرىن ەنگىزگەن ساناۋلى ەلدەردىڭ قاتارىنا جاتادى. تۋبەركۋلەزدى ەرتە انىقتاۋ ءۇشىن ددۇ ۇسىنعان جانە حالىقارالىق ستاندارتتارعا سايكەس كەلەتىن تۋبەركۋلەزدى جانە دارىگە ءتوزىمدى تۋبەركۋلەزدى باكتەريولوگيالىق جانە مولەكۋليارلىق-گەنەتيكالىق دياگنوستيكالاۋدىڭ جەدەلدەتىلگەن ادىستەرى ەنگىزىلدى», دەپ اتاپ ءوتتى ۇلتتىق فتيزيوپۋلمونولوگيا عىلىمي ورتالىعىنىڭ ديرەكتورى.
ول بۇگىندە اۋرۋدى تەز دياگنوستيكالاۋعا ارنالعان جابدىقپەن بارلىق ايماقتىق تۋبەركۋلەزگە قارسى مەكەمەلەر مەن اۋداندىق دەڭگەيدەگى زەرتحانالار (بارلىعى 128 xpertmtb/RIF اپپاراتتارى) قامتاماسىز ەتىلگەنىن ايتتى. تۋبەركۋلەز جاعدايلارىنىڭ 99,9%-ى دياگنوستيكانىڭ جاڭا جەدەل ءادىسىنىڭ ناتيجەسىندە انىقتالادى.
«ەلىمىزدە تۋبەركۋلەزبەن اۋىراتىن ناۋقاستاردى ەمدەۋدىڭ تيىمدىلىگى الەمدەگى ەڭ جوعارى كورسەتكىشتەردىڭ ءبىرى. 2021 جىلى سەزىمتال تۋبەركۋلەزبەن العاش انىقتالعان ناۋقاستار اراسىندا 87,5%-دى, ال دارىگە ءتوزىمدى تۋبەركۋلەز 82,5%-دى قۇرادى, بۇل الەمدىك ستاندارتتارعا سايكەس كەلەدى», دەپ تولىقتىردى م.ادەنوۆ.
ونىڭ سوزىنە قاراعاندا, مۇنداي كورسەتكىشتەرگە تۋبەركۋلەزدىڭ تارالۋىنا جول بەرمەۋ جونىندەگى نەگىزگى شارالاردى كۇشەيتۋ ارقىلى قول جەتكەن. ۇلتتىق فتيزيوپۋلمونولوگيا عىلىمي ورتالىعى الدىن الۋ جانە ەمدەۋدەن باسقا, قوعامدا ناۋقاستاردى كەمسىتپەۋگە قامقورلىق جاسايدى.
سونىمەن قاتار ۇلتتىق فتيزوپۋلمونولوگيا ورتالىعىنىڭ ديرەكتورى دۇنيەجۇزىلىك تۋبەركۋلەزگە قارسى كۇرەس كۇنىنە ارنالعان ايلىق 24 اقپاننان 24 ناۋرىزعا دەيىن جالعاساتىنىن جەتكىزدى. ايلىق اياسىندا فتيزياتر, فتيزيوپەدياترلاردىڭ تەگىن كەڭەستەرى, تۇرعىنداردى فليۋوروگرافيالىق تەكسەرىستەن وتكىزۋ سياقتى اۋقىمدى اكتسيالار جوسپارلانعان.
«پاتسيەنتتەردىڭ ەمدەلۋگە بەيىمدىلىگىن ارتتىرۋ ماقساتىندا جەرگىلىكتى اتقارۋشى ورگاندار, ۇكىمەتتىك ەمەس ۇيىمداردىڭ كومەگىمەن ەمدەلۋشىلەردىڭ امبۋلاتورلىق ساتىسىنداعىلارعا پسيحو-الەۋمەتتىك قولداۋ كورسەتىلدى. وعان قوسا 2021 جىلى ناۋقاستاردىڭ 92%-نا الەۋمەتتىك كومەك كورسەتىلدى», دەدى م.ادەنوۆ.
سونىمەن قاتار ول ازاماتتاردى اۋرۋدىڭ العاشقى بەلگىلەرى كەزىندە دەرەۋ مەديتسينالىق كومەككە جۇگىنۋگە شاقىردى.
«ۋاقتىلى انىقتاۋ جانە ۇزدىكسىز ەمدەۋ كەزىندە تۋبەركۋلەزدى تولىق ەمدەۋگە بولادى. تۋبەركۋلەزبەن اۋىرعان ادامدار باسقالارعا قاۋىپ توندىرمەي, وقىپ, جۇمىس ىستەي الادى, ايەلدەر دۇنيەگە دەنى ساۋ بالا اكەلە الادى جانە تولىققاندى ءومىر سۇرۋگە مۇمكىندىك بار», دەدى ول.
