جەڭىلدەتىلگەن باعدارلاما بويىنشا قاراجات الۋدىڭ ەكى نۇسقاسى ۇسىنىلادى. ءبىرىنشى نۇسقانى ۇكىمەت جاريالادى. ياعني «وكم وپەراتوردان» الىنعان قارجىدان وسى باعدارلاماعا 100 ملرد تەڭگە باعىتتالادى. بۇل باعدارلاما 2016 جىلدان بەرى جۇمىس ىستەپ كەلەدى. جالپى, قازاقستان ازاماتتارى ءۇشىن بازالىق پارامەترلەر بىردەي بولاتىن كەزگە جاقىنداپ كەلەمىز. قازىر جاڭا كولىكتەردى جىلىنا 4 پايىزدىق مولشەرلەمەمەن 5 جىلعا دەيىن باستاپقى جارناسىز الۋعا مۇمكىندىك بار. بۇل مەملەكەتتىك باعدارلاما بويىنشا جۇزەگە اسادى.
ءبىزدىڭ قاۋىمداستىق قۇرامىنا رەسمي وندىرۋشىلەرمەن قاتار كولىك قۇرالىن يمپورتتاۋشىلار دا كىرەدى. وسى زاڭناماعا ساي ولار كادەگە جاراتۋ الىمىن تولەۋگە كەلىسەدى. ويتكەنى ولار دا الىم تولەۋشىلەر سانالادى. ودان كەيىن ۋتيل الىمى قاراجاتىن جيناۋمەن اينالىساتىن وپەراتور ءدال سول سومانى سوڭعى تۇتىنۋشىعا ۋتيلالىم تولەمى قوسىلماۋى ءۇشىن قايتارىپ بەرەدى. ۋتيل الىمىنان تۇسكەن قاراجات جىلدىق 4 پايىز مولشەرلەمەمەن جەڭىلدەتىلگەن نەسيە بەرۋ باعدارلاماسىنا جۇمسالادى.
قازاقستان نارىعىنداعى جاڭا كولىك ساتىپ الۋعا قاتىستى ورتاشا مولشەرلەمە شامامەن 17-25, ءتىپتى كەيبىر كومپانيالاردا 40 پايىزعا دەيىن جەتەدى. ال جىلدىق 4 پايىزدىق مولشەرلەمە – جاڭا كولىك ساتىپ الۋ ءۇشىن قولجەتىمدى قارجىلىق باعدارلاما. بۇل ءتىپتى ءبولىپ تولەۋدەن دە الدەقايدا جاقسى. قازىر نارىقتا اۆتوكولىككە دەگەن سۇرانىس ارتىپ كەلەدى. وتكەن جىلعى ءوسىم – 22 پايىز. بۇل جاڭا كولىكتەردىڭ ەسەبىنەن وسەدى دەگەن ءۇمىت بار.
ءدال قازىر ۋتيلالىمدى 50 پايىزدان دا تومەندەتۋ دەگەن ءسوز ايتۋعا عانا وڭاي. ءبىز قانشا اۋىر بولسا دا بۇل شەشىمدى قابىلداۋىمىز كەرەك. ەلدىڭ اۆتوكولىك يندۋسترياسى جولعا قويىلعاندا, وعان قاجەتتى قوسالقى بولشەكتەردى وزىمىزدە شىعارۋعا قول جەتكەن كەزدە شەتتەن كەلگەن ەسكى كولىكتەردەن ۋتيلالىم الۋ قاجەتتىگى وزىنەن ءوزى ىسىرىلىپ قالادى. ۋتيلالىمنىڭ قازىرگى مولشەرى اۆتوكولىك يندۋسترياسىنىڭ ءورىسىن اشادى دەپ ۇمىتتەنەيىك. زامانمەن بىرگە زاڭ دا جاڭارىپ جاتىر. ەركىن باسەكەلەستىك جاعدايىندا ءبىز بۇل مۇمكىندىكتى دە حالىقتىڭ يگىلىگىنە باعىتتايمىز.
انار ماقاشوۆا,
قازاقستان اۆتوبيزنەس قاۋىمداستىعىنىڭ ۆيتسە-پرەزيدەنتى
