تاشكەنت قالالىق سوتىنىڭ ءباسپاسوز قىزمەتىنىڭ حابارلاۋىنشا, ۇكىم بويىنشا ەر ادام 155 (تەرروريزم), 159 (وزبەكستان رەسپۋبليكاسىنىڭ كونستيتۋتسياسىنا نۇقسان كەلتىرۋ), 161 (ديۆەرسيا), 164 (توناۋ) باپتارى بويىنشا كىنالى دەپ تانىلدى.
223 (وزبەكستان رەسپۋبليكاسىنىڭ شەكاراسىنا زاڭسىز شىعۋ نەمەسە وزبەكستان رەسپۋبليكاسىنا زاڭسىز كىرۋ), 242 (قىلمىستىق قوعامداستىق ۇيىمداستىرۋ) جانە 244-2-باپ ء(دىني-ەكسترەميستىك, سەپاراتيستىك, فۋندامەنتاليستىك نەمەسە وزگە دە تىيىم سالىنعان ۇيىمدار قۇرۋ, ولارعا باسشىلىق ەتۋ, ولارعا قاتىسۋ) بويىنشا كىناسى دالەلدەنىپ. قىلمىستىق كودەكستىڭ 1-بابىنا سايكەس ءومىر بويىنا باس بوستاندىعىنان ايىرىلدى.
ەسكە سالا كەتسەك, 1999 جىلى 16 اقپاندا تاشكەنتتە بىرقاتار لاڭكەستىك ارەكەت ۇيىمداستىرىلىپ, سالدارىنان 13 ادام قازا تاپقان. جۇزدەن استام ادام جارالانعان بولاتىن.
بۇعان دەيىن مەملەكەتتىك قاۋىپسىزدىك قىزمەتىنىڭ ءباسپاسوز قىزمەتى 2022 جىلدىڭ قىركۇيەگىندە 23 جىل بۇرىن ىزدەۋ جاريالانعان «تۇركىستان يسلام قوزعالىسى» حالىقارالىق لاڭكەستىك ۇيىمىنىڭ مۇشەسى شەتەلدە ۇستالىپ, تاشكەنتكە جەتكىزىلگەنىن حابارلاعان.
ول 1969 جىلى تاشكەنت وبلىسىندا دۇنيەگە كەلگەن. 1998 جىلدىڭ باسىندا شەشەنستانعا بارىپ, يوردانيالىق لاڭكەس حاتتاب قۇرعان سودىرلار لاگەرىندە ارنايى دايىندىقتان ءوتىپ, كەيىن اۋعانستانداعى حالىقارالىق لاڭكەستىك ۇيىمعا قوسىلعان. 1999 جىلى قاڭتاردا تۇركىستان يسلام قوزعالىسى جەتەكشىلەرىنىڭ بۇيرىعىمەن تاشكەنتكە كەلىپ, اۋقاتتى ازاماتتاردىڭ ۇيلەرىنە شابۋىل جاساپ, ۇرلانعان اقشا مەن باعالى زاتتاردى اۋعانستانعا تاسىمالداۋمەن شۇعىلدانعان.
ۇستالعان ازامات 1999 جىلى 16 اقپان مەن 30 ناۋرىزدا تاشكەنتتە بولعان لاڭكەستىك ارەكەتتەرگە دە قاتىسقان. ودان كەيىن 1999-2006 جىلدار ارالىعىندا شەت مەملەكەتتەردە حالىقارالىق لاڭكەستىك ۇيىمداردىڭ قاتارىندا سوعىسقان.
