الايدا بارلىق بازاردا زاڭناماعا سايكەس سانيتارلىق-ەپيدەميالىق تالاپتارمەن قاتار, ءورت قاۋىپسىزدىگى, ساۋلەت, قۇرىلىس, ۆەتەرينارلىق, ەكولوگيالىق جانە باسقا دا تالاپتار ساقتالۋى كەرەك-اق. ءبىر سوزبەن ايتقاندا, بازار بارلىق جاعىنان قاۋىپسىز بولۋعا ءتيىس. دەگەنمەن تاراز قالاسىنداعى بىرقاتار بازاردا اتالعان تالاپتاردىڭ كوبى ساقتالماي وتىر. جەرگىلىكتى بيلىك تاراپىنان بازار قوجايىندارىنا تالاي رەت ەسكەرتۋ ايتىلعانىمەن, ناتيجەسى ماردىمسىز.
وبلىس ورتالىعىندا ورنالاسقان ەڭ ۇلكەن بازار – «اۋىل-بەرەكە» بازارى. كونە شاھاردىڭ كوپشىلىك تۇرعىنى وسى جەردەن نەسىبەسىن تاۋىپ كەلەدى. بىراق ءورت ءسوندىرۋ قىزمەتى بازارلارعا تەكسەرۋ جۇرگىزگەن كەزدە, وسى «اۋىل-بەرەكە» بازارىندا ءورت قاۋىپسىزدىگى تالاپتارىنىڭ بۇزىلۋىنىڭ 4 دەرەگى انىقتالعان. سونىمەن قاتار «بەك» بازارىندا 5 جانە «مىڭبۇلاق» بازارىندا 4 دەرەك تىركەلگەن. ءورت شىققان جاعدايدا بۇل بازارلار قاۋىپتىڭ الدىن الۋعا دايىن ەمەس. سونداي-اق قالا ىشىندەگى «داۋلەت», «جىبەك جولى», «سالتانات», «ارزان», «نۇرالى», «ياككا ساراي», «بەرەكە» جانە «ىستى» سياقتى 8 بازارعا جاڭعىرتۋ جۇمىستارىن جۇرگىزۋ قاجەت ەكەن. بۇل ورايدا, ساۋدا ورىندارىنىڭ يەلەرى بۇل جۇمىستى بيىلعى ناۋرىز-ءساۋىر ايىنان باستايتىندارىن ايتىپ وتىر.
جالپى, وڭىردەگى بازارلاردى جاڭعىرتۋ كۇن تارتىبىندەگى كۇردەلى ماسەلەنىڭ ءبىرى. بۇل رەتتە جامبىل وبلىسىنىڭ اكىمى بەردىبەك ساپارباەۆ جەرگىلىكتى بازارلاردىڭ جايىن اتاپ كورسەتىپ, وعان جاڭعىرتۋ جۇمىستارىنىڭ جۇرگىزىلەتىنىن ايتقان. ال, ونى جاڭعىرتۋ جۇمىسى جەرگىلىكتى بيلىك ورگاندارىمەن بەكىتىلىپ, «ديزاين كودقا» سايكەس كەلۋى كەرەك.
قازىرگى كەزدە تاراز قالاسىنىڭ اكىمى ەرجان جىلقىباەۆ جاۋاپتى ماماندارعا «اۋىل-بەرەكە» بازارىنداعى الەۋمەتتىك ماڭىزى بار ازىق-ت ۇلىك پەن باسقا دا ونىمدەردىڭ باعاسىن باقىلاۋدا ۇستاۋدى تاپسىرعان. اتالعان ساۋدا ورنى قالالىقتاردىڭ ەڭ كوپ باراتىن جەرى بولعاندىقتان, مۇنداعى باعا تۇراقتىلىعى دا ماڭىزدى. بىراق «اۋىل-بەرەكە» بازارىنداعى
1 402 ساتۋشىنىڭ جارتىسىندا جەكە كاسىپكەرلىك قۇجاتى جوق بولىپ شىقتى. وسى ورايدا, قالا اكىمى بۇل ماسەلەگە بايلانىستى جۇيەلى ءارى تىڭعىلىقتى تەكسەرۋ جۇمىستارىن جۇرگىزىپ, ءتيىستى قۇجاتتاردى تۇگەندەپ, كاسسالىق اپپاراتتارىن ورناتۋدى تالاپ ەتۋ قاجەتتىگىن ايتۋدا. بۇل تالاپتاردىڭ بارلىعى دەرلىك ورىندالسا, قالاداعى ساۋدا نىساندارىنىڭ تۇرعىندارعا قىزمەت كورسەتۋ ساپاسى ارتىپ, ءاربىر بازار قاۋىپسىز ورىنعا اينالاتىن ەدى.
جامبىل وبلىسى
