مىسالى, وسى قالاداعى كەزىندە جابىلىپ قالعان اۆتوبازا عيماراتىن الماتىلىق Sunpaper كومپانياسى ساتىپ الدى. كاسىپكەرلەر ىسكە بىلەك سىبانا كىرىسكەن: عيماراتتى قايتا قالپىنا كەلتىرىپ, تسەحتار مەن قويمالاردى ىسكە جارامدى قىلدى. ودان كەيىن الماتىدان وندىرىستىك ستانوكتار اكەلىنىپ, ولار بىرتىندەپ ىسكە قوسىلا باستادى. ءبىر سوزبەن ايتقاندا, بۇرىنعى اۆتوبازانىڭ ورنىنا زاماناۋي تۇرعىدا جابدىقتالعان تسەحتارى بار زاۋىت پايدا بولدى.
بۇگىندە اتالعان كاسىپورىن شىعاراتىن دارەتحانا قاعازدارى مەن مايلىقتار, قاعاز سۇلگىلەردەن باستاپ دارەتحانا جابىندارىنا دەيىنگى تاۋارلار تۇرعىندار اراسىندا ءتاپ-ءتاۋىر سۇرانىسقا يە بولا باستادى. زاۋىت شىعاراتىن ءونىمنىڭ ساپالى بولاتىن باستى سەبەبىنىڭ ءبىرى – مۇنداعى تاۋارلار 100 پايىز تسەلليۋلوزادان جاسالادى.
قازىر ساران قالاسىنداعى زاۋىت سەكسەنگە جۋىق ادامدى جۇمىسپەن قامتىپ وتىر. ولاردىڭ اراسىندا قالا تۇرعىندارى عانا ەمەس, جاقىن ماڭداعى اۋىلدىق جەرلەردىڭ ادامدارى دا بار. ۇجىمدا ايەلدەردىڭ ۇلەسى باسىم. ولار نەگىزىنەن كونۆەيەردىڭ بويىندا تۇرىپ, قالاۋشى-قاپتاۋشى بولىپ جۇمىس ىستەيدى. ال ەر ادامدار بولسا, نەگىزىنەن تسەحتارداعى ستانوكتاردىڭ توقتاۋسىز جۇمىس ىستەۋىن قاداعالايدى. مۇنداعى جۇمىسشىلاردىڭ دەنى جاستار. ولاردىڭ جۇمىسقا دەگەن قۇلشىنىسى دا زور. ويتكەنى قولعا الاتىن تۇراقتى ەڭبەكاقىلارى وزگەلەرمەن سالىستىرعاندا اناعۇرلىم كوپ.
ايتا كەتۋ كەرەك, كاسىپورىن باسشىلارى قىزمەتكەرلەرگە دەگەن جاعدايدىڭ ءبارىن جاساۋعا تىرىسادى. مىسالى, مۇنداعى جۇمىسشىلار ىستىق تاماقتى تەگىن ىشەدى. سونىمەن قاتار ولاردى ارنايى اۆتوبۋس ۇيدەن جۇمىسقا, جۇمىستان ۇيگە اپارىپ تاستاپ وتىرادى. ەڭ باستىسى, كومپانيا قاجەتتى دەگەن مامانداردى وزدەرى وقىتىپ, دايارلاپ شىعارادى.
جالپى, كومپانيا مەنەدجەرلەرىن نارىقتىڭ تامىرىن تاپ باسقان دەپ ايتۋعا بولادى. نەگە دەسەڭىز, كاسىپتىڭ مۇنداي تۇرىمەن ەلىمىزدە اينالىساتىن كومپانيالار جوققا ءتان دەۋگە بولادى. سوندىقتان دا, Sunpaper كومپانياسى وندىرگەن مايلىقتار, قاعاز سۇلگىلەر, «دجۋمبو» دارەتحانا قاعازى سياقتى قاعازدان جاسالعان ساپالى ونىمدەر نارىقتاعى ءوزىنىڭ ورنىن ويىپ تۇرىپ الدى. قازىرگى ۋاقىتتا كەرەگەسىن كەڭەيتكەن كاسىپورىننىڭ الماتى مەن ەلوردادا بولىمشەلەرى جۇمىس ىستەي باستاعان.
مەنەدجمەنتتى مىقتى مەڭگەرگەن كومپانيا بيىل جاڭا جوبانى قولعا العالى وتىر. قازىر شيكىزات شەتەلدەن ساتىپ الىنسا, الداعى ۋاقىتتا قاعاز نەگىزىن زاۋىت وزىندە دايىندايتىن بولادى. مامانداردىڭ ايتۋىنشا, مۇنىڭ ءوزى كاسىپورىننىڭ قۋاتىن جىلىنا 21,4 مىڭ تونناعا دەيىن ارتتىرۋعا مۇمكىندىك بەرەتىن كورىنەدى. مۇنداي جوبالاردى جۇزەگە اسىرۋ ءۇشىن, البەتتە, مىقتى قولداۋ بولۋ كەرەك. بۇل تۇرعىدا Sunpaper كومپانياسىنىڭ ۇپايى تۇگەل. ناقتىراق ايتقاندا, كاسىپورىن «مونوقالالاردى دامىتۋ», «بيزنەستىڭ جول كارتاسى» مەملەكەتتىك باعدارلامالارىنىڭ قاتىسۋشىسى بولىپ سانالادى.
كاسىپورىن جىلدان-جىلعا ستانوكتار پاركىن جاڭارتىپ, شىعاراتىن ءونىم تۇرلەرىن دە كوبەيتىپ كەلەدى. جانە ولاردىڭ يمپورتتىق تاۋارلاردان ءبىر دە ءبىر كەم تۇسپەيتىنى دە راس. سوندىقتان دا «قاراعاندىدا جاسالعان» وتاندىق ونىمگە دەگەن سۇرانىس مول.
قاراعاندى وبلىسى,
ساران قالاسى
