...تىق ...تىق ...تىق...
«ەگەمەن قازاقستان» گازەتىنىڭ رەداكتسياسىنداعى – 41-كابينەتتە ءۇي ساعاتى ءىلىنىپ تۇر. ءيا, سول دومالاق ساعات. جۋرناليستەر تىنشي قالسا, ساعاتتىڭ ءۇنى باياۋ عانا ەستىلەدى. ياكي جۇمىسقا ەرتە كەلسەڭىز, بولماسا كەشقۇرىم جالعىز قالساڭىز, كابينەتتە ساعاتتان باسقا ەشكىم «سويلەمەيدى». ال كوبىنەسە ونىڭ تىقىلىن دا ەستىمەيمىز, ءتىپتى بار ەكەنىن دە بايقامايمىز.
بۇرىن ءاربىر ۇيدە ساعات ءتىلىنىڭ تىقىلى ەستىلىپ تۇرۋشى ەدى. سول ءبىر جىلدار بۇگىندە جىپ-جىلى نوستالگياعا اينالعان. قارىشتاپ دامىعان زاماناۋي تەحنولوگياداعى يگىلىكتەر ەسكىنىڭ ءبارىن جاڭارتتى: ول «ەسكىنىڭ» ىشىندە ءۇي ساعاتى دا بار. قازىر ەشكىم قابىرعا ساعاتىنا قارامايدى, سول ءۇشىن ساتىپ المايتىن دا بولار: بارىمىزدە تەلەفون. ءيا, بۇل – جاڭا عاسىر, جاڭا زامان.
* * *
ساعات دەگەنىڭىز ۋاقىت, ۋاقىت دەگەنىڭىز ءومىر: وپ-وڭاي فورمۋلا. ءۇي ساعاتى دا, ءومىر ساعاتى دا, تەك اقيقاتتى كورسەتەدى. بۇل تۋرالى بۇعان دەيىن دە تالاي فيلوسوفيالىق وي ايتىلدى, ءتۇرلى شىعارما جازىلدى. جالپى, ءومىردى جىرلاماعان, ءومىردىڭ ءمانىن ۇعۋعا تالپىنباعان جان جوق شىعار. ون ەكى ساندى اينالا تىقىلداعان ساعات ءتىلى سول ءومىردىڭ ءار سەكۋندىن حابارلايدى. سوندا نە دەيدى؟..
بالكي, قوعامعا ءبىر ءسوز ايتقىسى كەلەتىن بولار. الدە ءبارىمىزدى ءبىر جاققا اسىقتىرا ما؟ ال ءبىز سول ساعاتتىڭ ءۇنىن ەستي الدىق پا؟ ءومىردىڭ وتكىنشى ەكەنىن, ءار ءساتتىڭ باعالى ەكەنىن, وسىنىڭ ءبارى بىزدەن قالاتىنىن ءجيى سەزىنەمىز بە؟.. ءيا, ساعاتتى تىڭداساڭىز, سۇراق كوپ. ياعني ساعات «مەنىڭ داۋسىمدى ەستىڭدەر» دەيدى. ال ءبىز كەيدە ءوز جۇرەگىمىز-
ءدىڭ داۋسىن دا تىڭداماي جاتامىز.
* * *
ءدال وسى ساتتە, ءدال وسى سەكۋندتاردا قوڭىر تىرشىلىكتەن ءبىر ءسات الىس, اياۋلى مەكەنگە ءبىر جان كەتىپ بارا جاتقان بولار. سوناۋ ءبىر شاقتاردا قالعان جىپ-جىلى ەستەلىكتەرمەن مەزگىلسىز قاۋىشۋعا اسىعادى. ويشا ەركىن قۇستاي زەڭگىر كوك اسپاندا قالىقتاپ ۇشىپ بارادى. ال ەندى بىرەۋ تەڭىز جاعاسىندا اق كوبىكتەنگەن تولقىندارمەن بىرگە كۇندى شىعارىپ سالىپ تۇر. كۇننىڭ قىزارعان شۋاعىنا بەتىن توسىپ, ىشىنەن تىلەك تىلەۋدە. تاعى ءبىر مەكەندە تالانتتى جازۋشى جاقسى شىعارماسىن جازىپ وتىر. جەر بەتىنىڭ ءار تۇكپىرىندە بىرەۋ قۋانىپ, بىرەۋ مۇڭايىپ, بىرەۋ ءان ايتىپ, بىرەۋ اشۋلانىپ, بىرەۋ ۇيىقتاپ, بىرەۋ ەسىنەپ, بىرەۋ شارشاپ, بىرەۋ بۇل جارىق مەكەندى ەندى كورىپ, بىرەۋدىڭ جانازاسى وقىلىپ, ايتەۋىر ءومىر ءوتىپ جاتىر. بارلىق ءسات جىلدار مەن ساعاتتاردىڭ اعىسىمەن جىلجىپ بارادى.
* * *
ءسىزدىڭ دە, مەنىڭ دە, ونىڭ دا – اركىمنىڭ ءوز ساعاتى بار. ول ساعات توقتاعان كۇنى, ءبارىمىز بەلگىسىز ءبىر جاقسى مەكەنگە كەتەمىز دەيدى. ءومىردىڭ جالعاندىعى دا, وتكىنشىلىگى دە, ادىلەتسىزدىگى دە سول – ۋاقىتىڭ ايتەۋىر ءبىر كۇنى توقتايدى. مۇڭدى حيكايا سياقتى. دەگەنمەن, ءسىز ءدال وسى مەزەتتە جۇرەككە سالماق سالىپ, كۇڭىرەنىپ كەتپەڭىز. عالىمداردىڭ ايتۋىنشا, ادام رەاليست بولعان سايىن ءومىرى جەڭىلدەيدى ەكەن (بالكي, راس شىعار). ماسەلەن, قوعامدا ساعاتقا قارامايتىن, ۋاقىتپەن جارىسپايتىن جاندار دا بار. ولار تەك ساتتەرمەن ءومىر سۇرەدى. ەموتسيالارىن شەكتەمەيدى ءھام جاسىرمايدى. تابيعاتپەن, اسپانمەن, قوعاممەن ۇيلەسىمدە بولعىسى كەلەدى. «كوزىمە ءاجىم تۇسەدى» دەپ تە قام جەمەيدى: ەركىن كۇلەدى. ارينە, ەڭ باستىسى, رەاليست.
جالپى, ادامداردىڭ ءومىر ءسۇرۋ ۇزاقتىعى, ورتا ەسەپپەن العاندا, جەتپىس جاس. ول دەگەنىڭىز 25 550 كۇن, 613 200 ساعات. سوندا وسىنشا ۋاقىتقا قانشا ۇمىتىلماس ءسات, كۇلكى, جاس, ءان, ولەڭ سىيدىرۋعا بولادى دەپ ويلايسىڭ. قىزىق. كەيدە سول ۋاقىت وتپەستەي بولىپ كورىنەدى, ال شىن مانىندە زۋلاپ بارادى. مەيلى.
