ەلباسى نۇرسۇلتان نازارباەۆ ءبىر سوزىندە «...شاكەن وڭلاسىن ۇلى جۇمىستارىن نەگىزىنەن پاتريوتتىق تۇرعىدا جازدى, ونىڭ قازاقستان رەسپۋبليكاسىنىڭ مەملەكەتتىك تۋىنىڭ اۆتورى بولۋى – تۋما تالانتىمەن قاتار, وتانىن شەكسىز سۇيگەندىگى دەپ بىلەمىز. تاۋەلسىزدىگىمىز باياندى بولعان سايىن شاكەن وڭلاسىن ۇلىنىڭ رۋحى حالقىمەن بىرگە ماڭگى ءومىر سۇرە بەرمەك», دەگەن بولاتىن. شاكەن نيازبەكوۆ تۋما تالانتى مەن وتانعا دەگەن شەكسىز سۇيىسپەنشىلىگىنىڭ ارقاسىندا ەلدىگىمىز بەن تاۋەلسىزدىگىمىزدى ايعاقتايتىن, بۇگىندە الەم جۇرتشىلىعى انىق تانيتىن ايشىقتى تۋىندىنى ۇسىنا ءبىلدى.
قازاقستان رەسپۋبليكاسىنىڭ مەملەكەتتىك تۋى – ورتاسىندا شۇعىلالى كۇن, ونىڭ استىندا قالىقتاپ ۇشقان قىران بەينەلەنگەن تىك بۇرىشتى كوگىلدىر ءتۇستى ماتا. تۋدىڭ سابىنىڭ تۇسىندا ۇلتتىق ورنەك تىك جولاق تۇرىندە ناقىشتالعان. كۇن, ونىڭ شۇعىلاسى, قىران جانە ۇلتتىق ورنەك بەينەسى التىن تۇستەس بولىپ كەلەدى.
كوكتە جەلبىرەگەن بايراعىمىز تۋرالى شاكەن اعا جۋرناليستەردىڭ «مەملەكەتتىك تۋدىڭ اۆتورى بولدىڭىز دەگەن حاباردى ەستىگەندە, قانداي سەزىمدە بولدىڭىز؟» دەگەن سۇراعىنا «ەڭ الدىمەن, پارلامەنت بەكىتكەن تۋدىڭ وسى ۇلگىسى حالقىمىزعا ۇناي ما ەكەن, حالقىمىزدىڭ تاڭداۋىنا, تالعامىنا سايكەس كەلە مە ەكەن دەگەن قوبالجۋ سەزىمى باسىم بولدى. بويىمدى ءبىر ءتۇرلى قورقىنىش سەزىمى بيلەگەندەي كۇي كەشتىم», دەپ جاۋاپ بەرگەن ەدى.
شاكەننىڭ جاقىن تۋىسى بولىپ كەلەتىن ءىنىسى, مەديتسينا عىلىمدارىنىڭ دوكتورى سايلاۋبەك شالقاروۆ شاكەن اعانىڭ تۋدىڭ دۇنيەگە كەلگەن ءساتى تۋرالى بىلاي دەيدى: «اعانىڭ ءۇيى بۇرىنعى كوممۋنيستتىك داڭعىلى بويىنداعى «قاراكوز» كافەسىنىڭ ءۇشىنشى قاباتىندا بولاتىن. الماتىداعى جۇمىس ورنىمدى تۇركىستان قالاسىنا اۋىستىرعانعا دەيىن شاكەن اعامەن ءجيى ارالاسىپ تۇردىم. اعا ءبىر كۇنى مەنى ۇيىنە شاقىرىپ الىپ, پرەزيدەنت اكىمشىلىگىندە ەربول شايمەردەنوۆ دەگەن ىنىشەك مەملەكەتتىك تۋدى ازىرلەۋ ءۇشىن كونكۋرسقا ءتۇسۋىمدى قالاپ وتىرعاندىعىن ايتتى. وسىلايشا, كونكۋرسقا قاتىسۋعا بەل بايلاعانىن جەتكىزدى. «مىنا جوبا-سىزبالارىمدى قاراشى», دەپ سالعان بىرنەشە تۋىندىسىن كورسەتۋمەن بولدى. ءبىر سۋرەتى ءبىر سۋرەتىنەن ارتىق سالىنعانداي كورىنەدى. شاكەن اعا بۇل سۋرەتتەر جايلى ەمەس, قازاق تاريحىنا ويىسىپ كەتە بەرگەنى ەسىمدە. كۇندە ۇيىنە شاقىرادى. ءار سالعان جوبالارى كۇننەن-كۇنگە وزگەشە بولىپ شىعادى. سۋرەتتەرىندە جالپى تاريح باياندالادى. مەن سونى كورىپ بىلگەندەي بولدىم. كۇنىگە پىكىرىن تىڭداتۋ ءۇشىن شاقىرادى. مەن قارسى بولمايمىن. بارامىن. كوپ ۇزاماي كوك تۋدىڭ ناعىز نۇسقاسى دۇنيەگە كەلدى. سونداعى اعانىڭ جۇزىندەگى قۋانىشتى ايتىپ جەتكىزۋدىڭ ءوزى ءبىر باقىت ەكەن!»
قازاقستاندىق پاتريوتيزم – بۇل مەملەكەتىمىزدىڭ رۋحى. كورنەكتى تۇلعانىڭ بىرەگەي تۋىندىسى سانالاتىن تۋىمىزدى ەل تىزگىنىن ۇستاعان ازاماتتار ءسۇيىپ, حالىق الدىندا انت بەرەدى. قاستەرلەپ, ايرىقشا باعالايدى. جىگەر مەن نامىسقا ارقا سۇيەپ, بيىك تۇعىردان كورىنگەن سپورت ساڭلاقتارىمىز جاھاندى جالت قاراتقان ساتتە كوك بايراعىمىز جەلبىرەيدى. پاتريوتيزم – يدەولوگيامىز باستاۋ الاتىن كۇش-قۋات كوزى بولسا, مەملەكەتتىك تۋىمىز – رۋح پەن جىگەردىڭ قوزعاۋشى كۇشى ىسپەتتى.
تاعى ءبىر ايتا كەتەتىن دۇنيە – قازاقستانعا ايبار مەن قايرات بەرىپ تۇرعان ءۇش تەرەك بار. ءۇش تەرەك دەپ وتىرعانىمىز – تۋ, ەلتاڭبا جانە ءانۇران. بۇل ۇشەۋىن بىرىكتىرەتىن بايلانىستىڭ ەلەمەنتتەرى دارا ءھام ەركىن. ولار ورگانيكالىق جاعىنان ءبىرتۇتاس. ولار رۋحاني سۇلۋلىقتىڭ, ادىلەتتىلىك پەن سابىرلىلىقتىڭ بەينەسىن ءبىلدىرىپ, ءبىر-ءبىرىن ۇيلەسىمدى تولىقتىرىپ تۇر. وعان شاكەن وڭلاسىن ۇلىنىڭ قوسقان ۇلەسى – ۇشان-تەڭىز.
عالىمجان مىرزالى,
قازاقستان رەسپۋبليكاسى
ءبىلىم بەرۋ ءىسىنىڭ
قۇرمەتتى قىزمەتكەرى
