قۇزىرلى مينيسترلىك اتالعان ماسەلەگە ءجىتى كوڭىل ءبولىپ, ونىڭ شەشىلۋىنە بىلەك سىبانا كىرىستى. ويتكەنى, ەلدە سپورتقا قابىلەتتى 300 مىڭنان اسا مۇمكىندىگى شەكتەۋلى جان بار. بىراق, ولاردىڭ 12,7 پروتسەنتى عانا تۇراقتى شۇعىلدانادى.
وڭىرلەر بويىنشا شىعىس قازاقستان مەن نۇر-سۇلتان قالاسى بەلسەندى. قالعان ايماقتارداعى كورسەتكىش تومەن. ەندى ولاردى جاپپاي سپورتقا تارتۋ ءۇشىن سپورتتىق نىسانداردىڭ قوجەتىمدىلىگىن ارتتىرۋ باستاماسى قولعا الىندى. قازىر ەلىمىزدە 590 جابىق سپورتتىق كەشەن بار. بىراق, ونىڭ 20 پروتسەنتى عانا مۇگەدەكتەردىڭ ءجۇرىپ-تۇرۋىنا جانە ەمىن-ەركىن جاتتىعۋىنا قولايلى. ماسەلەن, ەلورداداعى «سارىارقا» ۆەلوترەگىنە 300-گە جۋىق مۇمكىندىگى شەكتەۋلى جان كەلىپ ءجۇر. سونىڭ ءبىرى - سەرىكباي اۋشانوۆ. تەمىر جول سالاسىنىڭ مامانى 2005 جىلى قىزمەت بارىسىندا قوس اياعىنان ايىرىلىپ, تاعدىر تاۋقىمەتىنە تاپ بولدى. بىراق, وعان مويىماي, سپورتپەن شۇعىلدانا باستادى. بۇگىنگە دەيىن پاراپاۋەرليفتينگ, پنەۆماتيكالىق اتۋ جانە قول كۇرەسى باعىتتارى بويىنشا جارىستارعا قاتىسىپ, ءتىپتى, بىرنەشە رەت ەل ۇزدىگى اتاندى. ءالى كۇنگە دەيىن جاتتىعۋدى ۇزگەن جوق. سونىڭ ارقاسىندا دەنساۋلىعىن بىرقالىپتى ۇستاپ, جۇرت قاتارلى ءومىر ءسۇرىپ ءجۇرمىن دەيدى كەيىپكەرىمىز.
«بۇندا بارلىق جاعداي قاراستىرىلعان. عيمارات اربامەن كىرىپ-شىعۋعا قولايلى. مۇگەدەكتەرگە ارنالعان ليفت تە بار. فيتنەس ورتالىقتا تا, باسسەيندە دە جاتتىعۋعا بولادى. نۇسقاۋشىلار قاجەت كەزدە كومەكتەسىپ, ءتىپتى, كاسىبي كەڭەس تە بەرەدى. مىسالى, باسسەينگە 2014 جىلدان بەرى كەلىپ ءجۇرمىن. العاشقىدا جۇزە المايتىنمىن. ەكى اياعىم بولماعاسىن اۋدارىلىپ كەتە بەرەم. ءبىرىنشى كۇندەرى باسسەيندى جاعالاپ, قولمەن ۇستاپ ءجۇردىم. بىرتە-بىرتە ۇيرەنىسىپ, قازىر ەركىن جۇزەمىن», دەيدى سەرىكباي اۋشانوۆ.
«نۇر-سۇلتان» وليمپيادالىق دايارلاۋ ورتالىعىنا قاراستى «سارىارقا» فيتنەس ورتالىعى تەگىن نەگىزدەگى قولداۋدى بىرنەشە جىل بۇرىن باستادى. قازىرگى باسشىلىق جانە ورتالىق ماماندارى ەندى وسى جۇمىستاردى جۇيەلەپ, ونى ودان سايىن دامىتۋدىڭ جولدارىن قاراستىرىپ جاتىر. ەلىمىزدەگى باسقا سپورتتىق نىساندار دا الداعى بىرەر جىلدا وسىنداي دەڭگەيگە جەتىپ, تولىقتاي ارنايى تالاپتارعا ساي بولۋى كەرەك.
«بىزگە قازىر جۇزدەگەن مۇمكىندىگى شەكتەۋلى جان كەلىپ ءجۇر. ارنايى ۇيىمدارمەن كەلىسىمشارتقا وتىرىپ, ۇسىنعان ادامدارىن قاجەتتى جاعدايمەن قامتاماسىز ەتەمىز. بۇدان بولەك, جەكە ازاماتتار دا كەلىپ, ءوتىنىش تاستاۋىنا بولادى. ەشقانداي شەكتەۋ جوق. كەيىن قالاعان ۋاقىتىندا كەلىپ, شىنىعا بەرەدى. ءتىپتى, قاسىنداعى كۇتۋشىسىمەن بىرگە كىرە الادى», دەيدى فيتنەس ورتالىعىنىڭ جەتەكشىسى ازامات نۇرلانوۆ.
قازىردىڭ وزىندە بارلىق سپورتتىق نىساندا 1-ءشى جانە 2-ءشى توپ مۇگەدەكتەرى تەگىن نەگىزدە دايىندالا الادى. ال, ءۇشىنشى توپتاعى ازاماتتارعا 50 پروتسەنت جەڭىلدىك قاراستىرىلعان. وسى ارقىلى ۇيدە وتىرعان جانداردى بارىنشا سپورتقا تارتۋ كوزدەلىپ وتىر. سوعان سايكەس, ىشكى باسەكەلەستىك ارتىپ, كاسىپقوي پاراليمپياداشىلاردىڭ شىعۋىنا دا مۇمكىندىك اشىلادى.
اسلان قاجەنوۆ,
«نۇر-سۇلتان» وليمپيادالىق دايارلاۋ ورتالىعىنىڭ ماركەتينگ بويىنشا ينسپەكتورى
