بۇل تۋرالى اجىعاليەۆ ءوزىنىڭ Facebook-تەگى جەكە پاراقشاسىندا جازدى.
«مەن بۇل كۇندى ۇمىتپايمىن. كەشەگى جازبادان ءبىر كۇن وتپەي, بۇگىن تۇستەن كەيىن ماعان بەيتانىس نومىردەن قوڭىراۋ شالدى. ول الەكساندر ۆينوكۋروۆتىڭ ءوزى بولىپ شىقتى. ول مەنىڭ جازبامدى وقىپ, وليمپياداداعى جوعارى ناتيجەممەن قۇتتىقتاۋ ءۇشىن ۇيىنە شاقىردى. مەن ءۇشىن ونىڭ قوڭىراۋى توسىن سىي بولدى. ماعان @vinobike ۆەلوسيپەدىن سىيلايدى دەپ ءتىپتى ويلامادىم! الەمدىك ۆەلوسپورتتىڭ اڭىزعا اينالعان چەمپيونى جانە ناعىز تۇلعا @alexandrvinokurov-قا العىسىمدى ايتامىن!
ءبىزدىڭ سپورتقا جاساپ جاتقان ىستەرىڭىز ءۇشىن جانە ماعان كورسەتكەن قولداۋىڭىز ءۇشىن راقمەت», دەپ جازدى سپورتشى.
اجىعاليەۆكە سىيلاعان ۆەلوسيپەد جاڭا جەڭىستەرگە جەتۋىنە سەپتىگىن تيگىزەتىنىن تىلەپ, جاۋاپ بەردى.
«@abzal_azhgaliyev-پەن جىلى كەزدەسۋ بولدى. بەيجىڭدەگى قىسقى وليمپيادا ويىندارىندا لايىقتى ونەر كورسەتكەنى ءۇشىن بۇكىل سپورت قاۋىمى اتىنان العىس ايتىپ, الەم چەمپيوناتىنا ساتتىلىك تىلەدىم. بۇل @Vinobike ۆەلوسيپەدى ساتتىلىك اكەلىپ, جەڭىسكە جەتۋگە كومەكتەسەدى دەپ سەنەمىن! #teamkz», دەدى ۆينوكۋروۆ.
ەستەرىڭىزگە سالا كەتەيىك, بەيجىڭدە وتكەن قىسقى وليمپيادا ويىندارىندا اجىعاليەۆ 500 مەترگە جۇگىرۋدەن ءتورتىنشى ورىن العان بولاتىن.
سونداي-اق, ول وليمپيادانىڭ اشىلۋ جانە جابىلۋ سالتاناتىندا قازاقستان تۋىن ۇستاپ شىققان بولاتىن.
