جوعارى وقۋ ورنىنىڭ قابىرعاسىندا وتكەن «يسلام-ىنتىماق جانە بىرلىك ءدىنى» جىلى: ماقسات, مىندەتتەر, اقساقالداردىڭ ورنى مەن ءرولى» اتتى فورۋمدا ۇلتتىق قۇندىلىقتار توڭىرەگىندەگى ماسەلەلەر جان-جاقتى سارالاندى. ءداستۇرلى جيىندا ءدىن مەن ءداستۇر ساباقتاستىعىن نىعايتۋ, جەرلەۋ, سالتتىق راسىمدەردى ءبىر ارناعا ءتۇسىرۋدى ناسيحاتتاۋ جونىندە ءسوز قوزعالدى. «قازاق قوعامىندا جانە ءداستۇرلى تاربيەدە اقساقالداردىڭ ءرولى زور ەكەنىن بىلەمىز. ء«داستۇردىڭ وزىعى بار, توزىعى بار» دەيدى قازاق. بۇل جولعى فورۋمنىڭ باستى ماقساتى – ەلدى ىنتىماققا ۇندەۋ جانە ءولىم-جىتىمدەگى راسىمدەرىندەگى ءداستۇردى بىرىزدىلىككە ءتۇسىرۋ. رەسپۋبليكالىق ءىV يمامدار فورۋمىندا ايتىلعان وسى باعىتتاعى ۇسىنىس-پىكىرلەردى ەسكەرىپ, ناسيحاتتاۋىمىز دا كەرەك. جەرلەۋ ءداستۇرىن بىرىزدىلىككە ءتۇسىرۋدىڭ ماڭىزىن دا ورتاعا سالىپ, اقساقالداردىڭ پىكىرلەرىن تىڭداۋىمىز كەرەك», دەدى وبلىستىق «حاليفا التاي» مەشىتىنىڭ باس يمام ەرمەك قاجى مۇقاتاي.
باس يمام قمدب جانىنان «قامقور-شاراپات» سالتتىق قىزمەت كورسەتۋ ورتالىعى قۇرىلىپ, جەرلەۋ راسىمدەرىن ەل كولەمىندە ءبىر جۇيەگە ءتۇسىرۋ جونىندە وسكەمەن ايماعىندا جۇمىستاردىڭ قولعا الىنعانىن اتاپ ءوتتى. راس, وسكەمەننىڭ ىرگەسىندەگى مۇسىلمان زيراتىندا قورشاۋلار ءبىر ۇلگىدە قالانىپ, ءبىر تيپتەس تاقتا تاستار قويىلادى.
جيىندا بىرقاتار قاريا كوتەرىلىپ وتىرعان ماسەلەگە بايلانىستى ءوز ويلارىن ورتاعا سالىپ, تاعى دا ۇسىنىستار ءبىلدىردى. اتاپ ايتقاندا اقساقالدار كەڭەسىنىڭ توراعاسى ماناربەك مۇحامەدجانوۆ ءوز سوزىندە قمدب تاراپىنان اقساقالدار ينستيتۋتىن قولدانىسقا ەنگىزىپ, ۇلتتىق قۇندىلىقتارعا باسىمدىق بەرۋگە تالپىنىپ وتىرعاندىعى قۇپتارلىق باستاما دەپ اتاپ ءوتتى. ال قازاقستاننىڭ مادەنيەت قايراتكەرى ءنابيولدا كەمەشەۆ ءولىمدى جەردە ىسىراپشىلدىقتى ءالى دە ازايتۋ كەرەكتىگىن ءسوز ەتتى. «جەرلەۋ راسىمدەرىن بىرىزدىلىككە ءتۇسىرىپ, ىسىراپقا جول بەرمەي, بۇرىنعى سالت-ءداستۇردى جاڭعىرتۋىمىز كەرەك. قازىردەن باستاپ, وسى ماسەلەنى تۇبەگەيلى رەتتەيىك. مارقۇمدى شىعارىپ سالۋ ءراسىمى بايلىق جارىستىراتىن فورماتتا ەمەس, وتكەن ادامعا قۇرمەت كورسەتۋدىڭ ونەگەسىن كورسەتۋ باعىتىندا بولعانى دۇرىس. مىسالى, «حاليفا التاي» مەشىتىنىڭ قاتىمحاناسىندا تاعام تۇرلەرى ىقشامدالدى», دەيدى ءنابيولدا كەمەشوۆ.
فورۋمدا ءسوز العان قاريالار سالت-ءداستۇردى جاڭعىرتۋ ماقساتىندا ىستەلىپ جاتقان جۇمىستارعا وتكەن جىلدارداعى فورۋمداردىڭ دا ىقپالى بار ەكەنىن ايتىپ ءوتتى.
شىعىس قازاقستان وبلىسى
