ادەبيەت • 22 اقپان، 2022

جىردىڭ جەزكيىگى

بيىل كورنەكتى اقىن، مەملەكەت جانە قوعام قايراتكەرى كاكىمبەك سالىقوۆتىڭ تۋعانىنا 90 جىل تولدى. سوعان وراي استاناداعى ۇلتتىق اكادەميالىق كىتاپحانادا ارداقتى اقىندى ەسكە الۋعا ارنالعان «جىر الەمىنىڭ جەزكيىگى» اتتى ادەبي كەش ءوتتى.

ازامات ەسەنجول

مازمۇندى كەشتى اشىپ جۇرگىزگەن اقىن، قازاقستان جازۋشىلار وداعىنىڭ نۇر-سۇلتان قالالىق فيليالىنىڭ ديرەكتورى داۋلەتكەرەي كاپ ۇلى كاكىمبەك اعامىزدىڭ بيىلعى ايتۋلى مەرەيتويىنا بايلانىستى بىرقاتار ءىس-شارا جوسپارلانعانىن ايتا كەلىپ، استاناداعى اقىن تۇرعان ۇيگە ەسكەرتكىش-تاقتا ورناتىلاتىندىعىن جەتكىزدى.

ودان كەيىن بەلگىلى اقىن، حالىقارالىق «الاش» ادەبي سىيلىعىنىڭ لاۋرەاتى عالىم جايلىباي ول كىسىنى ون بەس جاسىنان باستاپ تانىپ، كوزى تىرىسىندە اعالى-ىنىلىدەي جاقىن سىيلاسقاندىعىن ءسوز ەتتى.

– كاكىمبەك سالىقوۆ – ەسىمى ۇلكەن ارىپپەن جازىلاتىن، جالپاق قازاق تانيتىن تۇلعا. ول ەكى فورماتسيادا ءومىر ءسۇرىپ، كەشەگى كەڭەس وداعىن باسقارعان برەجنەۆ، چەرنەنكولارمەن قاتار جۇمىس ىستەپ، قازاقتىڭ ءبىر بالاسى رەتىندە بيىككە شىققان، اڭىز ادام. ول كىسى اكادەميك «قانىش ساتباەۆ» قورىن باسقارعاندا مەنى بىرگە جۇمىس ىستەۋگە قاسىنا شاقىرىپ الدى. سوندا اسىل اعانى جاقىن تانىپ، ادامي عاجايىپ اسىل قاسيەتتەرىنە ءتانتى بولدىم. قازاقتى ءبولىپ-جارماي تۇتاس جاقسى كورەتىن. تۇماعاڭدارمەن دوستىعى دا كەرەمەت ەدى. العاشقى جىر جيناقتارىمەن وقىرماندارىنىڭ ىقىلاسىنا بولەندى. اقىندىق پەن كەنشىلىكتى قۇستىڭ قوس قاناتىنداي قاتار الىپ جۇرگەن اقىننىڭ پوەزياسى تەرەڭدىك پەن بيىكتىك دەگەن ولشەمگە لايىق، – دەدى ول.

سونداي-اق جازۋشى-دراماتۋرگ وتەن احمەت، قارىمدى قالامگەر بايانعالي ءالىمجانوۆ، تاريح عىلىمدارىنىڭ دوكتورى مارات ابسەمەتوۆ، كۇيشى جانعالي ءجۇزباي جانە تاعى باسقا زيالى قاۋىم وكىلدەرى تۇعىرلى تۇلعانىڭ جان-جاقتى قىرىنا توقتالىپ، جىلى اسەرگە تولى ەستەلىك ءوربىتتى. كەش بارىسىندا ارقالى اقىننىڭ ولەڭىنە جازىلعان «جەزكيىكتەن» باستاپ، ەل ءسۇيىپ تىڭدايتىن بىرقاتار ءان ورىندالدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز