ادەبيەت • 22 اقپان، 2022

ەستەت قالامگەر الەمى

73 رەت كورسەتىلدى

ل.ن.گۋميلەۆ اتىنداعى ەۋرازيا ۇلتتىق ۋني­ۆەر­سيتەتىندەگى «كاۋسار» مادەني-تا­نىمدىق بىرلەس­تى­گىنىڭ ۇيىتقى بولۋىمەن بەلگىلى قا­لامگەر، پرەزي­دەنت سىيلىعىنىڭ لاۋرەاتى، قازاقستاننىڭ ەڭ­بەك سىڭىرگەن قايراتكەرى قالي سارسەنبايمەن ادەمى اسەرگە تولى وقىرمانداردىڭ كەزدەسۋى ءوتتى. مازمۇندى ءىس-شاراعا پارلامەنت ءماجىلىسىنىڭ دەپۋتاتى، قالامگەر ساۋىتبەك ابدراحمانوۆ، «ەگەمەن قازاقستان» رگ» اق باسقارما توراعاسى دارحان قىدىرالى، ل.ن.گۋميلەۆ اتىنداعى ەۋرا­زيا ۇلتتىق ۋنيۆەرسيتەتىنىڭ رەكتورى ەرلان سى­د­ىقوۆ، «تۇران» ۋنيۆەرسيتەتىنىڭ رەكتورى راح­مان الشانوۆ، قازاقستان جازۋشىلار وداعى باسقار­ماسى توراعاسىنىڭ ورىنباسارى، جازۋشى مەرەكە قۇلكەنوۆ، ساتيريك كوپەن امىربەك، پۋبليتسيستەر جانبولات اۋپباەۆ پەن شارحان قازىعۇل جانە اقىندار عالىم جايلىباي مەن قاسىمحان بەگمانوۆ باستاعان ءبىر توپ زيالى قاۋىم وكىلدەرى قاتىستى.

«كاۋسار» مادەني-تانىمدىق بىرلەستىگىنىڭ جەتەكشىسى، قازاقستاننىڭ ەڭبەك سىڭىرگەن ءارتىسى، پروفەسسور كەنجەعالي مىرجىقباي بۇعان دەيىن دە اتالعان وقۋ ورنىندا حالقىمىزدىڭ ءبىرتۋار تۇلعالارىمەن بىرنەشە كەزدەسۋ وتكىزگەنى بەلگىلى. سونىڭ  جاراسىمدى جالعاسى رەتىندە وتكەن كەش شىمىلدىعىن ءانشى اعامىز  اسەم انمەن اشسا، ستۋدەنتتەر پاراساتتى ءپۋبليتسيستىڭ شىعارمالارىنان ءۇزىندى وقىپ، جينالعانداردى جىلى شۋاققا بولەدى.

جالپى قازاق وقىرماندارى ەستەت قالامگەر قالي سارسەنبايدى جاقسى بىلەدى. ول سوناۋ سەكسەنىنشى جىلداردان بەرى مەرزىمدى ءباسپاسوز بەتىندە  قوعامنىڭ سان تاراۋ وزەكتى ماسەلەسىن قوزعاپ، ۇلت ونەرىنىڭ كوكجيەگىن كەڭەيتكەن تۇلعالار تۋرالى جازعان ويلى ماقالالارىمەن  كوپشىلىككە تانىلدى. ۇزاق جىلدار «جاس الاش»، «ەگەمەن قازاقستان»، «پاراسات»، «الماتى اقشامى» سەكىلدى گازەت-جۋرنالداردا قىزمەت ىستەپ، قازاق ءباسپاسوزىنىڭ دامۋى­نا ۇلەس قوستى. قازىر «انا ءتىلى» گازەتىنىڭ باس رەداكتورى، پۋبليتسيستيكالىق، پروزالىق كىتاپتارى جارىق كورگەن.

قازاقستاننىڭ حالىق جازۋشىسى قادىر مىرزا ءالي «كوركەمونەردى كوركەم جىگىتتەر جاسايدى» دەگەن ماقالاسىندا: «قالي نە نارسەنى جازسا دا، ءبىلىپ جازادى. ءبىلىپ جازۋ ءۇشىن الدىمەن قۇداي بەرەتىن جازعىشتىق قاسيەتتى ايتپاعاندا، بىلىمپازدىق، ىزدەنىمپازدىق جانە كەرەك. بۇل كريتەريلەر بولماسا، الگى قاسيەتتى ۇستاپ تۇرۋ بەكەرشىلىك.  وسى ورايدا قاليدىڭ ەستەتتىك الەمىنە باسا نازار اۋدارعان بولار ەدىم.  كۇندەلىكتى شىعىپ جاتقان گازەتتە اعىمدىق ماسەلەلەرگە ىلەسىپ وتىرۋى، وي ۇشقىرلىعىن تانىتۋى ءوز الدىنا، ونىڭ تەرەڭ تولعانىستارعا قۇرىلعان دۇنيەلەرى ماعان الدەقايدا قىمبات كورىنەدى» دەپ تالانتتى ءجۋرناليستىڭ ەڭبەگىن جوعارى باعالاعان.

كەزدەسۋ بارىسىندا كەش يەسى وقىرماندارمەن وي ءبولىسىپ،  ەركىن پىكىر الماستى.  جۋرناليستيكاعا قالاي كەلگەنى جايىندا قىزىقتى اڭگىمە ايتىپ، ەسىمدەرى ەل ەسىندە قالعان شەرحان مۇرتازا، كامال سمايىلوۆ، ورالحان بوكەي، امانگەلدى سەمبين تۋرالى  ماعىنالى ەستەلىك ءوربىتتى. كەيىنگى جازىپ جۇرگەن وي-تولعانىستارىن وقىپ، جاستاردىڭ سۇراقتارىنا جاۋاپ بەردى. سونىمەن قاتار ءوزى باسقارىپ وتىرعان «انا ءتىلى» گازەتىندە قولعا العان جوبالارى جايىندا اڭگىمەلەدى.

− ۇلتتىڭ مۇڭىن مۇڭداپ، جوعىن جوقتاپ جۇرگەن ۇلت باسىلىمدارى ساناۋلى. سونىڭ ءبىرى – «انا ءتىلى» گازەتى. وسىندا وتىرعانداردىڭ بارلىعىن ءبىزدىڭ باسىلىمنىڭ وقىرماندارى دەپ بىلەمىن. نەگىزى، حالىقتى تاربيەلەۋدىڭ ءتۇرى كوپ، سونىڭ ىشىندە ءوزىم تۇلعاتانۋ ارقىلى تاربيەلەۋدى ءجون كورەمىن.  وسى باعىتتا ءبىراز جوبانى قولعا الىپ، «تۇلعا-تاعدىر»، «اعالار ايتىپ كەتىپتى»، «ارىستار مەن اعىستار» اتتى ايدارلاردى اشتىق. الداعى ناۋرىزدان باستاپ، اتاقتى اكتەر ءاسانالى ءاشىموۆتىڭ جاڭا جازىپ بىتىرگەن كىتابىنان ۇزىندىلەر جاريالايمىز، − دەي كەلىپ، وسى كەشتىڭ وتۋىنە مۇرىندىق بولعان ازاماتتارعا ريزاشىلىعىن جەتكىزدى.

سونداي-اق كەش اياسىندا اۆتوردىڭ  «تۇنگى قويىلىم» جانە ء«دۇلدۇل» اتتى قوس كىتابىنىڭ تانىستىرىلىمى ءوتىپ، ساتيريك كوپەن امىربەك ءبىر ساپتا جۇرگەن قالامداسى تۋرالى ىزگى لەبىزىن ءبىلدىردى. كەزدەسۋ سوڭىندا ۋنيۆەرسيتەت رەكتورى، اكادەميك ەرلان سىدىقوۆ قالي سارسەنبايعا عىلىمي كەڭەستىڭ شەشىمىمەن اتالعان وقۋ ورنىنىڭ «كۇلتەگىن» مەدالىن تابىس ەتتى.

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار