تۇركسوي جۇلدەگەرلەرى

انادولى جەرىندە تۇركيا جۋرناليستەر قوعامى جانە ەسكىشاھار 2013 تۇركى الەمى مادەنيەت استاناسى اگەنتتىگىنىڭ ۇيىتقى بولۋىمەن تىلشىلەردىڭ فورۋمى ءوتتى. جۋرناليستەر فورۋ­مىنا 31 ەلدەن 370 جۋرناليست قاتىستى. فورۋمنىڭ العاشقى كۇنى تۇركسوي ۇيىمى ۇيىم­داستىرعان «2014 تۇركى الەمى مادەنيەت استاناسى قازان» كورمەسى اشىلدى. فوتوسۋرەت كورمەسىندە حالىقارالىق تۇركى مادەنيەت ۇيىمىنىڭ قازان قالاسىنىڭ سۇلۋلىقتارىن پاش ەتەتىن تۋىندىلارى ورىن الدى. ەسكىشاھارداعى انادولى ۋنيۆەرسيتەتىندە تۇرىك جۋرنا­ليس­تەرىن ماراپاتتاۋ ءراسىمى ءوتتى. تۇركى الەمىنىڭ مادەني استا­ناسى سانالعان ەسكىشاھار ءوز لاۋازىمىن قازان قالاسىنا تابىستادى. سالتاناتتى جابىلۋ راسىمىندە تۇركسوي ۇيىمى تۇركى مادەنيەتى مەن رۋحاني قۇن­دىلىقتارىن ناسيحاتتاعان ءباسپاسوز وكىلدەرىن ماراپاتتادى. حالىقارالىق تۇركى مادەنيەتى ۇيىمى – تۇركسوي باس حاتشىسى دۇيسەن قاسەيىنوۆ ءباسپاسوز جۇلدەلەرىن تاعايىنداۋدا تۇركى الەمىنىڭ ورتاق مۇراسى وعىز قاعان­نان نەگىز العانىن, اتالعان سىيلىقتىڭ تۇركى الەمىنە شىن مانىسىندە تەر توگەتىن ءارىپ­تەستەرگە بۇيىراتىنىن ايتتى. جيىن بارىسىندا تۇركسوي باس حاتشىسى تۇركى الەمىن تانىستىرۋعا اتسالىسقان ءباسپاسوز وكىلدەرىنە ءوز العىسىن ءبىلدىردى. بيىلعى جىلدىڭ ۇزدىكتەرى قاتارىندا قازاقستاندىق تاۋەلسىز جۋرناليست ناتاليا زادەرەتسكايا, قازاقستان پەن كلۋبى توراعا­سى بيگەلدى عابدۋللين مەن حالىقارالىق «تۇركىستان» گازەتى­نىڭ باس رەداكتورى ءشامشيدين پاتتەەۆ تە بار. «بۇل ءتۇبى ءبىر تۇركىنىڭ بىرلىگىن نىعايتۋعا قوسقان ۇلەسىمىز جانە تۇركسوي تاراپىنان ۇسىنىلعان بۇگىنگى سىيلىق گازەتىمىزدىڭ تالاي جىلعى ەڭبەگىنىڭ جەمىسى دەپ ويلايمىن. كسرو قۇرامىندا بولعان ورتالىقازيالىق مەم­لەكەتتەردىڭ كوپشىلىگى اقپاراتتى رەسەيدەگى بۇقارالىق اقپارات قۇرالدارىنان الادى. مەنىڭشە, تۇركى ەلدەرىنە ورتاق اقپارات كوزدەرى بولۋى ءتيىس. تۇركىتىلدەس ەلدەردىڭ ىشىندە ەڭ دامىعانى تۇركيا بولعاندىقتان, تۇركيا­لىق باق-تى بارىنشا كەڭ اۋقىمدا پايدالانىپ, تۇركى مەملەكەتتەرىنىڭ ءبىر-بىرىنە جاقىن­داسۋىنا سەپتىگىن تيگىزۋگە جۇمىلدىرۋ قاجەت. وكىنىشكە قاراي, تۇركسوي ۇيىمى تەك مادەني ماسەلەلەرمەن عانا شەك­تەلەدى. ال تۇركىگە ورتاق اقپا­را­تتىق كەڭىستىكتە مامان دايارلاۋدى دا قولعا الۋ كەرەك. مەملەكەتتەرىنىڭ ءبىر-بىرىنە جاقىنداسۋىنا جۋرناليستەر قوساتىن ۇلەس زور دەپ ويلايمىن», – دەدى «تۇركىستان» گازەتىنىڭ باس رەداكتورى ش.پاتتەەۆ. جيىرما جىلدىق تاريحى بار تۇركسوي تۇركى ەلدەرىنەن كەلگەن جيىرما ءجۋرناليستى مەرەيتوي قۇرمەتىنە وراي ماراپاتتادى. جيىرما ءجۋرناليستىڭ قاتارىنا ەنىپ وتىرعان «تۇركىستان» گازەتى­نىڭ دە اقپارات كەڭىستىگىندە جەل­كەنىن كەرگەنىنە بيىل تۋرا – 20 جىل. گۇلزينا بەكتاس.