كوروناۆيرۋس • 20 اقپان، 2022

«سارى» ايماقتىڭ ساناتىندا دا ساقتىق كەرەك

95 رەت كورسەتىلدى

اقمولا وبلىسى كوروناۆيرۋس ىندەتىن جۇقتىرۋ كورسەتكىشى بويىنشا سارى ايماقتىڭ ساناتىنا ەنگەنىمەن، جالپى ەپيدەميالىق احۋال ءماز ەمەس. سوندىقتان دا، ىندەتتىڭ بەتى ءبىرجولا قايتتى دەپ ارقا-جەڭدى بوساتۋعا بولمايدى، دەپ جازادى Egemen.kz.

ايماقتا سوڭعى تاۋلىكتە ىندەت جۇقتىرۋدىڭ سەكسەنگە جۋىق جاعدايى تىركەلدى. وبلىس ەلىمىز بويىنشا التىنشى ورىندا. جىل باسىنان بەرى 18733 ادامنان كوروناۆيرۋس زەرتحانالىق جولمەن انىقتالىپ، قىرىققا جۋىق ادام ىندەتتەن كوز جۇمدى. اقپان ايىندا عانا ساقتىق شارالارىن  قولدانباۋدىڭ كەسىرى كورىنە باستادى. قازىر ادامداردىڭ ەتى ءولىپ كەتكەن. العاشقى بەتتەگىدەي بەتپەردە تاعۋ، سانيتارلىق تالاپتاردى بۇلجىتپاي ساقتاۋ بوساڭسي باستادى. سالعىرتتىقتىڭ ناتيجەسى دە كوزگە كورىنىپ تۇر. اقپان ايىندا 4167 ادام ىندەتكە شالدىقتى.

«بۇگىنگى تاڭدا وبلىس اۋرۋحانالارىندا جيىرماعا جۋىق ناۋقاس وتە اۋىر حالدە جاتىر. ءبىر ايتا كەتەرلىگى، ىندەت جۇقتىرعانداردىڭ باسىم كوپشىلىگى الپىس جاستان اسقاندار. وڭىردە جاسى الپىستان اسقان ءجۇز مىڭنان استام ادام بار. ولاردىڭ 59 پروتسەنتى ىندەتكە قارسى ەكپە السا، ون مىڭنان استامى رەۆاكتسينادان وتكەن. ءسوز اراسىندا رەۆاكتسينادان وتپەگەن ەگدە ادامدار ىندەت جۇقتىرا قالسا، قاۋىپپەن كۇرەسۋ قيىن بولاتىندىعىن تاعى ءبىر قايتالاپ ايتقىم كەلەدى. اشىعىن ايتقاندا، مۇلدە ەكپە الماعان ادامدار قاھارلى كوروناۆيرۋس بىلاي تۇرسىن، وميكرونعا دا توزە المايدى. ال، ەگەر ۋاقىتىندا ۆاكتسينا العان بولسا، قاي شتامى بولسىن جەڭىل وتەدى»، دەيدى وبلىستىڭ باس سانيتارلىق دارىگەرى ايناگۇل مۋسينا.

ۆاكتسينا الۋعا بارلىق جاعداي جاسالعان. وبلىستا قازىر 133 پۋنكت تۇراقتى جۇمىس ىستەپ تۇر. ەكپە ناۋقانى باستالعاننان بەرى ۆاكتسينانىڭ ءبىرىنشى كومپونەنتىمەن 347 946 ادام ەگىلگەن. بۇل وبلىس تۇرعىندارىنىڭ 47،3 پروتسەنتى. ۆاكتسينا سالدىرۋ بويىنشا ەگىندىكول اۋدانى مەن قوسشى قالاسىنىڭ تۇرعىندارى جوسپاردى 100 پروتسەنت ورىنداپ، كوش باستاپ كەلەدى. باس سانيتارلىق دارىگەردىڭ ايتۋىنا قاراعاندا، حالىققا قولايلى بولۋى ءۇشىن ەكپە پۋنكتتەرى جانىنان جىلجىمالى بريگادالار دا ۇيىمداستىرىلعان. ولار جۇكتى ايەلدەر مەن بالا ەمىزەتىن انالاردىڭ، زەينەتكەرلەردىڭ، مۇمكىندىگى شەكتەۋلى جانداردىڭ ءوتىنىشى بويىنشا  ۇيلەرىنە بارىپ ەكپە ەگىپ بەرەدى.

«بۇگىنگى تاڭدا 8805 ادام Pfizer ۆاكتسيناسىن الدى. بۇل وتە تومەن كورسەتكىش. قازىر ءبىز جاسوسپىرىمدەر اراسىندا دا ىندەتتىڭ ەتەك الىپ بارا جاتقاندىعىن كورىپ وتىرمىز. جىل باسىنان بەرى مەكتەپ وقۋشىلارى اراسىندا ىندەتكە دۋشار بولۋ دەرەكتەرى كوبەيىپ كەتتى. ءتىپتى، ستۋدەنتتەرگە قاراعاندا، وقۋشىلاردىڭ اراسىندا الاڭداتارلىق جاعداي تۋىنداپ وتىر. مۇنىڭ بارلىعى ەكپە الماعاننىڭ كەسىرى. بالالاردىڭ بويىندا ىندەتكە قارسى يممۋنيتەتتىڭ بولماۋى وسىنداي ولقىلىققا جول بەرىپ وتىر»، دەيدى باس سانيتارلىق دارىگەر.   

ەگەر ۆاكتسينانىڭ ءبىرىنشى كومپونەنتىن العاندار 21 كۇننەن كەيىن ەكىنشىسىن سالدىرمايتىن بولسا، وندا ولاردىڭ «Ashyq» قوسىمشاسىنداعى مارتەبەلەرى كوك تۇسكە وزگەرەدى. ازىرگە سارى ايماقتىڭ ساناتىندا بولعانىمىزبەن، قاۋىپتىڭ قاتەرى قاپەرىمىزدە جۇرگەنى ءجون.     

سوڭعى جاڭالىقتار

ەرلىككە تولى ەڭبەك

قازاقستان • كەشە

شيراز بۇلب ۇلى

ادەبيەت • كەشە

اتا جۇرتتا

ادەبيەت • كەشە

اباي وبلىسىنىڭ اتى وزدى

ايماقتار • كەشە

ۇقساس جاڭالىقتار