قىرعىزستان پرەزيدەنتىمەن كەزدەستى

قازاقستان پرەزيدەنتى نۇرسۇلتان نازارباەۆ قىرعىز رەسپۋبليكاسىنىڭ پرەزيدەنتى المازبەك اتامباەۆپەن كەزدەستى, دەپ حابارلادى پرەزيدەنتتىڭ ءباسپاسوز قىزمەتى. الماتىداعى كەزدەسۋدە مەملەكەت باسشىلارى ساۋدا-ەكونوميكالىق, ينۆەستيتسيالىق, سۋ-ەنەرگەتيكالىق جانە مادەني-گۋمانيتارلىق ىنتىماقتاستىقپەن قاتار, ەكىجاقتى قارىم-قاتىناستاردى نىعايتۋ ماسەلەلەرىن تالقىلادى. سونداي-اق, بىرلەسكەن قازاق-قىرعىز ينۆەستيتسيالىق قورى جۇمىسىنىڭ باعىتتارى دا قارالدى. بۇعان قوسا, نۇرسۇلتان نازارباەۆ پەن المازبەك اتامباەۆ ەۋرازيا كەڭىستىگىندەگى ينتەگراتسيالىق بىرلەستىكتەر اياسىنداعى ءوزارا ىقپالداستىقتىڭ نەگىزگى جولدارىن تالقىلادى. قازاقستان پرەزيدەنتى مۇنداي كەلىسسوزدەردىڭ الداعى ۋاقىتتا ەكى ەلدىڭ ەكونوميكالىق دامۋىنا ىقپال ەتەتىن ماڭىزدىلىعىن اتاپ ءوتتى. – ەكىجاقتى تاۋار اينالىمى 2011 جىلمەن سالىستىرعاندا 41%-عا ءوسىپ, 1 ميلليارد دوللار­دان استى. قازاقستان تاۋەلسىزدىك جىلدارى قىرعىزستان ەكونوميكاسىنا 1 ميلليارد دول­لاردان استام ينۆەستيتسيا سالدى. الدا ءالى دە كوپ جۇمىس بار. ءبىز مەملەكەتارالىق كوميس­سيانى جانە قازاقستان مەن قىرعىزستان جوعا­رى مەملەكەتارالىق كەڭەسىنىڭ وتىرىسىن وتكىزۋىمىز كەرەك. وسىعان بايلانىستى ىنتى­ماقتاستىعىمىزدىڭ بارلىق باعىتىن تالقىلاۋعا دايىنبىز, – دەدى مەملەكەت باسشىسى. قىرعىز رەسپۋبليكاسىنىڭ پرەزيدەنتى كەزدەسۋ ءۇشىن العىسىن بىلدىرە كەلە, قازاقستاننىڭ بەيبىتشىلىك پەن تۇراقتىلىقتى قامتاماسىز ەتۋ ىسىندە دە, الەۋمەتتىك-ەكونوميكالىق كورسەتكىشتەر تۇرعىسىنان دا ورتالىق ازياداعى جەتەكشى ەل ەكەنىن اتاپ كورسەتتى. – كەزدەسۋلەرىمىز كەزىندە مەن ءاردايىم ءوزىم ءۇشىن پايدالىنى ويعا تۇيەمىن جانە سىزدەن ارقاشان كوپ نارسەنى ۇيرەنۋگە بولاتىنىن ايتقىم كەلەدى, – دەدى ا.اتامباەۆ. تاراپتار وڭىردەگى قاۋىپسىزدىكتىڭ جاي-كۇيى مەن حالىقارالىق كۇن ءتارتىبىنىڭ وزەكتى جايتتارى جونىندە دە پىكىر الماستى. ----------------------------------------- سۋرەتتى تۇسىرگەندەر س.بوندارەنكو, ب.وتارباەۆ.